Manino ty Vavolombelo Jehovah ro Tsy Mankalaza Aniversera?

Tsy mankalaza aniversera ty Vavolombelo Jehovah satria mino zahay fa tsy tea Ndranahary fankalazà io. Tsy mivola mivanta ty Baiboly hoe tsy azo atao ty mankalaza aniversera. Fe hita soa amy Baiboly ao ty hevitsy Ndranahary mikasiky ty raha atao amy fotoa rey. Retoa misy ohatsy efatsy miaraky amy ty torolala amy Baiboly ao mifandramby amy zay.

1. Baka amy mpanompo sampy ty fankalazà aniversera. Manazava ty nifotora fety io ty diksionera hoe Funk & Wagnalls Standard Dictionary of Folklore, Mythology, and Legend. Nino ty olo taloha hoe lafa mimpoly ty andro nahaterahan’olo raiky le misy “fanahy raty noho hery raty afaky mampijaly azy.” “Fe mety ho voaaro ie lafa miaraky aminy eo ty namany, sady mitso-drano azy.” Volany ty boky The Lore of Birthdays fa taloha tany, le fa nianatsy mikasiky ty astrolojia ty olo, na hoe, nianatsy nampifandramby ty raha an-danitsy eny amy ty raha miseho an-tany etoy. Nataon-drozy raha zay mba hamoròna tononandro, ka vatan-draha amin-drozy ty nanao an-tsoratsy ty andro nahaterahan’olo. Mivola koa boky io fa “nino ty olo taloha hoe misy hery mahatseriky amy labozỳ ampiasà amy aniversera rey, satria afaky manatanteraky ty fanirian’olo iny.”

   Kanefa mivola ty Baiboly fa tsy mety ty manao sikily, mifandramby amy fanahy raty noho “ze kila raha manahaky reo.” (Deoteronomia 18:14; Galatianina 5:19-21) Zay mihintsy aza ty antony nanasazia Ndranahary any Babylona, azy tanà fa ela iny. Zatsy nampiasa astrolojia ty olo tao, kanefa fifandrambesa amy fanahy raty koa raha zay. (Isaia 47:11-15) Tsy sahira mila ty nifotora ze kila fety noho fombafomba iaby zahay Vavolombelo Jehovah, fe lafa manome tari-dala mazava ty Baiboly le orihinay raha zay.

2. Tsy nankalaza aniversera ty Kristiana voalohany. Mivola ho zao ty The World Book Encyclopedia: “Nieritseritsy rozy fa lily ty mpanompo sampy ty mankalaza aniversera.” Atoro ty Baiboly hoe tokony horihy ty Kristiana iaby ty raha natao ty apostoly noho ty olo hafa nampianary Jesosy mivanta.—2 Tesalonianina 3:6.

3. Ty nahafatesa Jesosy avao ro fankalazà nampanaovy ty Kristiana, fa tsy ty andro nahateraha Jesosy na ahy ty olo hafa. (Lioka 22:17-20) Tsy mahatseriky raha zay satria mivola ty Baiboly hoe “aleo andro ahafatesa tozay ty andro ahateraha.” (Mpitoriteny 7:1) Lafa nimaty Jesosy le nahazo laza soa taloha Ndranahary teo. Ka zay ro mahavy ty andro nahafatesany ho vatan-draha marè mandilatsy ty andro nahaterahany.—Hebreo 1:4.

4. Tsy volany ty Baiboly mihintsy hoe nisy mpanompo Ndranahary nankalaza aniversera. Tsy hoe tsy niambin-drozy ty nitantara raha zay. Satria misy fankalazà andro nahateraha roe voasoratsy amy Baiboly ao, fe samby tsy mpanompo Ndranahary ty olo nanao raha reo. Raha raty avao koa ro tantarany Baiboly mikasiky fankalazà roe reo.—Genesisy 40:20-22; Marka 6:21-29.

Mahatiaro ho matiantoky va ty anaky Vavolombelo Jehovah satria tsy mankalaza aniversera?

Manahaky ty baba noho reny iaby avao ty Vavolombelo Jehovah satria atoron-drozy mandavantao hoe tean-drozy ty anan-drozy. Manome fanomeza ho ahy ty anany koa rozy sady miaraky mifalifaly aminy. Miezaky hanahaky a Ndranahary rozy, ka manome raha soa ho ahy ty anany. (Matio 7:11) Tsy mahatiaro ho matiantoky mihintsy ty anan-drozy. Mba henteo moa ty safàn’ajà retoa!

• “Vomaiky soa marè ty mahazo fanomeza lafa tsy nampoizinao raha iny.”—Tammy, 12 tao.

• “Ndre tsy mahazo fanomeza aza aho amy aniverserako, le ivilian-dry Babako amy Mamako avao, amy andro hafa. Teako raha zay satria tsy nampoiziko mihintsy.”—Gregory, 11 tao.

• “Folo minity, mihina gatô kelikely, manao hira raiky, le zay! Zay avao fety zao? Mandehana aminay ao laha ta hahita fety zao!”—Eric, 6 tao.