Ty taratasy voalohany ho ahi-ty Korintianina
4 Tokony ho mpanompon’i* Kristy noho mpanompo miandraikitsy ty sekirè masi-Ndranahary ty fahitan’olo anay. 2 Dikani-zay, ty mpanompo zany le tamany fa ho azo atokisa. 3 Laha ty amiko, le tsy mampanino ahy ty olo handiniky mikasiky ahy, ndre nareo zay ndre ty fitsaràn’olombelo. Tsy zay fa ndre zaho aza tsy manao an’ny raha zay amy ty vatako. 4 Satria tsy hitako ze hadisoako, kanefa tsy midika raha zay hoe marina aho. Jehovah ro mandiniky ty mikasiky ahy. 5 Le ka mitsara ndre ino ndre ino alohan’ny fotoa voatondro, zisiky hiavian’ny Tompo. Ie ro hampiseho amy mazava eo ty sekirè amy maìky ao noho hanambara ty eritseritsin’ny fo. Amy zay samby hahazo fiderà baka amy Ndranahary ty olo kiraidraiky.
6 Rahalahy, nirambesiko ho ohatsy zahay amy Apolosy, lafa nivola an’ny raha zay aho mba hahasoa anareo, ka hianaranareo an’ny fitsipiky ho zao iny hoe: “Ka mihoatsy ani-ze raha voasoratsy.” Amy zay tsy hirengirengy nareo, ka hieritseritsy hoe soa marè mandilatsy ty olo sisany ty olo hafa. 7 Ka ino moa ty tsy mampitovy anao amin’olo hafa? Ino vatany moa ty raha anananao ka tsy namea anao? Ka laha namea anao raha iny, manino iha ro mirengirengy sahala hoe tsy nisy nanome?
8 Fa afa-po sahady va nareo? Fa panarivo sahady va? Fa nanomboky nanjaka tsy nisy anay va nareo? Tena teako laha mba fa nanomboky nanjaka nareo, amy zay koa zahay mba afaky miaraky manjaka aminareo! 9 Tsy zay fa amiko, le sahala hoe zahay apostoly ro natao-Ndranahary niakatsy sehatsy farany, manahaky olo voasazy mba hovonoa rey, satria naseho tanabo sehatsy eny zahay mba hohenteani-zao tontolo zao noho ty anjely noho ty olo. 10 Zahay moa gegy satria mpanori-dia an’i Kristy, fa nareo mahihitsy amy Kristy ao! Zahay malemy, fa nareo mahery! Nareo amea voninahitsy, fa zahay afahy baraka! 11 Zisiky henanizao* le mbo mosarè zahay, marandrano, zara laha misiky,* vangoa,* tsy mana trano ipetraha, 12 sady miasa mafy amy tananay. Lafa misy manambanimbany anay le mirary soa ho an-drozy zahay, lafa enjehy zahay le miaritsy avao, 13 lafa misy mandratiraty anay le mamaly moramora* zahay. Lasa sahala fakoni-zao tontolo zao noho kafon’ny raha iaby zahay zisiky henanizao.
14 Fe tsy ty hahamenatsy anareo ro anoratako an’ny raha zay, fa ty hananatsy anareo manahaky anako teako io. 15 Fa ndre 10 000 aza ty mpiteza* anareo amy Kristy ao, le azo antoky fa tsy maro ty babanareo. Tsy zay fa lasa babanareo amy Kristy Jesosy ao aho, satria nitory ty vaovao soa taminareo. 16 Ka le mampirisiky anareo aho mba hanahaky ahy. 17 Zay ty antony anirahako an’i Timoty aminareo any, satria anako teako ie sady azo atokisa amy Tompo ao. Hampitiaroviny anareo ty fomba fiasako* amy fanompoa ampanovin’i Kristy Jesosy ahy, zany hoe azy fomba fiasa ampianariko amy fiangona iaby iny, ndre aia zay ndre aia.
18 Mirengirengy ty olo sisany, satria mieritseritsy rozy hoe tsy ho avy aminareo any aho. 19 Fe ho avy aminareo any tsy ho ela aho, laha sitrapon’i Jehovah. Le tsy ty raha nivolanin’olo mirengirengy rey ty teako ho hay, fa ty herin-drozy. 20 Satria tsy ty raha volanin’olo ro manaporofo hoe maneky ty Fanjakà-Ndranahary ie, fa ty herin’ny fanahi-Ndranahary aminy eo. 21 Ka aia ty teanareo: Handay kobay aho lafa avy aminareo any, sa ho be fitiava noho soa fanahy?