Ty taratasy voalohany ho ahi-ty Korintianina

7 Ho zao ty valin’ny fanontanea nisoratinareo tamiko iny: Soa laha tsy mitolo* ampela ty lahilahy. 2 Fe miparitaky marè ty fijangajangà,* ka tokony samby hana ty valiny ty lahilahy kiraidraiky, le samby hana ty valiny ty ampela kiraidraiky. 3 Tokony hanao ty adidiny* amy valiny ty lahilahy, le tokony hanao manahaky ani-zay amy valiny koa ty ampela. 4 Tsy mana fahefà amy ty vatany ty ampela, fa ty valiny ro mana an’ny fahefà zay. Ho zay koa fa tsy mana fahefà amy ty vatany ty lahilahy, fa ty valiny ro mana an’ny fahefà zay. 5 Tsy tokony hisy handà tsy hanao ty adidiny amy valiny, laha tsy hoe fa nifanaraky nareo hoe tsy hanao an’ny raha zay anatin’ny fotoa kelikely, mba hanokananareo fotoa hivavaha. Le hiaraky ndraiky nareo bakeo, tsy no hampilitsy fakam-panahy aminareo avao Satana, ka tsy hahafehy ty vatanareo nareo. 6 Fe soso-kevitsy avao raha volaniko zay fa tsy didy. 7 Fa teako laha mitovy amiko ty olo iaby. Fe samby nahazo fanomeza baka amy Ndranahary ty olo kiraidraiky, ka ty raiky hanahaky ani-zao, le ty hafa hanahaky ani-zao.

8 Ho zao ty volaniko amy ze olo tsy manambaly noho ze ampela maty valy: Soa laha mijano manahaky ahy rozy. 9 Fe laha tsy mahafehy ty vatan-drozy rozy, le afaky manambaly, satria aleo manambaly tozay ho resin’ny* faniria tsy voafehy.

10 Manoro hevitsy ty olo manambaly aho, fe tsy zaho fa ty Tompo, hoe tsy tokony hiala* amy valiny ty ampela. 11 Fe laha miala amy valiny ie, le tsy tokony hanambaly na tokony himpoly amy valiny. Le ty lahilahy tsy tokony hiala amy valiny.

12 Fe ho zao ty volaniko amin’olo hafa, kanefa zaho fa tsy ty Tompo: Laha misy rahalahy manambaly tsy mpino, sady mbo maneky hiaraky mipetraky aminy avao ty valiny, le tsy tokony hiala aminy ie. 13 Laha misy koa ampela manambaly tsy mpino, sady mbo maneky hiaraky mipetraky aminy avao ty valiny, le tsy tokony hiala aminy ie. 14 Tsy zay fa hamasìny amy alalan’ny valiny ty lahilahy tsy mpino, le hamasìny amy alalan’ny rahalahy iny koa ty valiny tsy mpino. Laha tsy zay, le tsy malio ty ananareo, kanefa masy rozy henanizao. 15 Fa laha azy tsy mpino iny ro ta hiala,* le engao ie hiala. Laha zay ty raha miseho, le tsy voatery hiaraky mipetraky aminy rahalahy na anabavy valiny iny, fa Ndranahary fa nikaiky anareo mba hanome anareo fiadana.* 16 Ho anao ampela manambaly, hainao aia va ndre ho vitanao ty hanavotsy ty valinao? Le ho anao lahilahy manambaly, hainao aia va ndre ho vitanao ty hanavotsy ty valinao?

17 Fe ndre zay, le tokony samby mandeha araky ze nikaiha-Ndranahary azy ty olo kiraidraiky, arakaraky ze anjara namean’i Jehovah azy. Le toromariky zay ro ameako ty fiangona iabiaby. 18 Misy fa nisavary va tamy ie nikaihy? Tsy tokony haravany savatsy natao taminy zay. Misy tsy nisavary va tamy ie nikaihy? Tsy tokony hosavary ie. 19 Tsy misy dikany ty hoe nisavary sady tsy misy dikany ty hoe tsy nisavary, fa ty manoriky ty didi-Ndranahary ro tena ilà. 20 Ndre manao akory ndre manao akory ty olo kiraidraiky tamy ie nikaihy, le tokony hijano manahaky ani-zay avao ie. 21 Mpanompon’olo va iha ro nikaihy? Ka miasa loha amy raha zay. Fe laha azonao atao ty hanjary olo afaky, le hararaoto raha zay. 22 Fa ze nikaihy ho amy Tompo ao tamy ie mpanompon’olo, le fa nafahy sady ahin’ny Tompo. Ho zay koa fa ze nikaihy tamy ie olo afaky, le mpanompon’i Kristy. 23 Fa nivilỳ nareo, le ka maneky ho lasa mpanompon’olo sasy. 24 Rahalahy, ndre manao akory ndre manao akory ty olo kiraidraiky tamy ie nikaihy, le tokony hijano manahaky ani-zay avao ie anatreha-Ndranahary eo.

25 Fa laha ty mikasiky ty virjiny,* le tsy nahazo didy baka amy Tompo aho. Fe manome ty hevitsiko aho, satria nampisehoan’ny Tompo fiferinesa ka azo atokisa. 26 Ka laha ty hevitsiko, le soa laha mijano amy ie henanizao avao ty olo kiraidraiky, satria anatin’ny fotoa sarotsy tsika henanizao. 27 Lahilahy fa manambaly* va iha? Ka mila hevitsy mba hisaraha.* Lahilahy tsy manambaly* va iha? Ka mila valy sasy. 28 Fe ndre hanambaly aza iha, le tsy manota. Laha misy koa virjiny manambaly, le tsy manota ie. Fe hahita fijalea amy ty nofotsin-drozy ze olo manambaly, ka tsy teako hahazo anareo raha zay.

29 Zao koa ty raha volaniko rahalahy: Fa kelikely sisa ty fotoa tavela. Manomboky henanizao, ze manambaly le tokony ho sahala tsy manambaly, 30 ze tomany ho sahala tsy tomany, ze falifaly ho sahala tsy falifaly, ze mivily ho sahala tsy mana, 31 le ze mampiasa ani-zao tontolo zao, ho sahala tsy tandrena mampiasa azy tanteraky, satria miovaova ty sehatsini-zao tontolo zao. 32 Tena teako laha tsy miasa loha mihintsy nareo. Ty lahilahy tsy manambaly le miasa loha amy fanompoa an’ny Tompo, zany hoe ty fomba hahazoany hatò amy Tompo. 33 Fa ty lahilahy manambaly miasa loha amy raha amy zao tontolo zao eo, zany hoe ty fomba hahazoany hatò amy valiny, 34 ka lasa voazarazara ie. Ankoatsini-zay, ty ampela tsy manambaly noho ty virjiny le miasa loha amy fanompoa an’ny Tompo, mba ho masy ty vatany noho ty sainy. Fa ty ampela manambaly miasa loha amy raha amy zao tontolo zao eo, zany hoe ty fomba hahazoany hatò amy valiny. 35 Ty hahasoa anareo ro ivolanako an’ny raha zay, fa tsy hoe ta hamehifehy* anareo aho. Fa ta hampirisiky anareo aho mba hanaovanareo raha soa noho hanompoanareo an’ny Tompo avao kanefa tsy misy raha manelingely.

36 Fe laha misy mieritseritsy hoe hanaontao fahatany* ie laha tsy manambaly,* sady fa tsy anatin’ny fotoa fivelaran’ny fahatanorà iny sasy ie,* le engao ie hanao ze teany. Tsy manota ie. Engao rozy hanambaly. 37 Fa laha misy tapa-kevitsy am-pony ao sady tsy misy raha mitanjaky azy, fa mahafehy ty faniriany ie ka manapa-kevitsy am-pony ao hoe tsy hanambaly mihintsy,* le soa raha ataony zay. 38 Dikani-zay, soa ty manambaly,* fe mbo soa mandilatsy ani-zay ty tsy manambaly.

39 Voafehin’ny fanambalea ty ampela laha mbo velo ty valiny. Fa laha maty* ty valiny, le afaky manambaly ze teany ie, fe amy Tompo ao avao. 40 Fe laha ty hevitsiko, le mbo sambatsy marerè ie laha mijano amy zao avao. Matoky aho fa zaho koa mana ty fanahi-Ndranahary.