Ty taratasy voalohany ho ahi-ty Korintianina

8 Laha resaky hany amea ho an’ny sampy, le haintsika fa mana fahaiza mikasiky an’ny raha zay tsika iaby. Fe ty fahaiza mampirengirengy, fa ty fitiava mampahery. 2 Laha misy mieritseritsy hoe mahay raha raiky, le mbo tsy mahay an’ny raha zay araky ty tokony hahaizany azy ie. 3 Fa laha misy olo tea a-Ndranahary, le hai-Ndranahary ie.

4 Laha resaky fihinana hany amea ho an’ny sampy, le haintsika fa tena tsy misy dikany ty sampy, sady tsy misy Ndranahary laha tsy raiky avao. 5 Fa ndre misy aza azy kaihy hoe ndranahary rey, ndre an-danitsy any zay ndre an-tany etoy, sady marina vatany fa misy “ndranahary” maro noho “tompo” maro, 6 le Ndranahary raiky avao ty ahintsika, tsy ia zay fa ty Baba, azy niavia ty raha iaby iny, le ho azy tsika. Raiky avao koa ty Tompo, tsy ia zay fa Jesosy Kristy. Ie ro nampiasà mba hampisy ty raha iaby noho hampisy antsika koa.

7 Fe tsy ty olo iaby ro mana an’ny fahaiza zay. Fa ty olo sisany, azy nanompo sampy taloha rey, le mbo mieritseritsy hoe raha natao soro ho an’ny sampy avao ty haniny lafa mihina ie, ka lasa maloto ty eritseritsin-drozy satria malemy. 8 Fe tsy hanampy antsika hihamarìny a-Ndranahary ty hany. Tsy matiantoky tsika laha tsy mihina, sady tsy mahazo tombony laha mihina. 9 Marina fa mana zo hifily nareo. Fe mitandrema avao tsy no hanjary vato maminga ho ani-azy malemy rey raha zay. 10 Fa laha iha mahay raha aza hitan’olo mihina amy tempolin’ny sampy ao, tsy hampirisiky ani-azy malemy iny va ty eritseritsiny, ka lasa hahasaky hihina hany amea ho an’ny sampy ie? 11 Ty fahaizanao zany ro hanimba ani-azy malemy iny, tsy ia zay fa azy rahalahinao namoizan’i Kristy ty ainy iny. 12 Manota amy Kristy nareo, lafa manota manahaky ani-zay amy ty rahalahinareo ka manimba ty eritseritsin-drozy mbo malemy. 13 Ka laha hany ro maminga ty rahalahiko, le tsy hihina hena sasy aho, tsy no haminga ty rahalahiko raha zay.