Ty taratasy voalohany ho ahi-ty Korintianina

9 Tsy olo afaky va aho? Tsy apostoly va aho? Tsy fa nahita an’i Jesosy Tompontsika va aho? Tsy nareo va ty vokatsin’ny asako amy Tompo ao? 2 Ndre tsy apostoly ho an’olo hafa aza aho, le tena azo antoky fa apostoly ho anareo! Fa nareo ro kasè* manamarina hoe apostoly aho, amy Tompo ao.

3 Ho zao zany ty fiarovako ty vatako amin’olo miresaky raha raty mikasiky ahy rey: 4 Tsy mana zo* hihina noho hino va zahay? 5 Tsy mana zo hanambaly ampela mpino noho handay azy hiaraky aminay va zahay, manahaky ataon’ny apostoly hafa rey noho ty rahalahin’ny Tompo noho Kefasy?* 6 Sa zahay amy Barnabasy avao ro tsy mana zo hijano tsy hanao asa fiveloma? 7 Aia koa hisy maramila hianto-bata? Ia ty mamboly voaloboky ka tsy mihina ty voany? Na ia ty miaraky aondry ka tsy mino amy rononon’aondry rey?

8 Hevitsin’olo avao va zany raha volaniko zay? Tsy zay koa va ty volanin’ny Lalàna? 9 Satria ho zao ty voasoratsy amy Lalànan’i Mosesy ao: “Ka fehezy ty vavan’ny aomby miasa* am-baibò eny.” Ty aomby va ro nahavy a-Ndranahary nanome an’ny Lalàna zay? 10 Sa tsika mihintsy ro antony nivolanany an’ny raha zay? Tsika mihintsy ro antony nanorata an’ny raha zay, satria ze miasa tany noho ze miasa am-baibò eny le tokony hanao an’ny raha zay sady hitamà hahazo anjara.

11 Laha namafy raha ara-panahy taminareo eo zahay, le manararaotsy marè va zahay laha mba mahazo fanampea baka aminareo? 12 Laha ty olo hafa aza mana zo hitaky an’ny raha zay aminareo, handraky va zahay? Fe tsy mampiasa an’ny zo* zay zahay, fa miaritsy ty raha iaby mba tsy hanakantsakananay ty fiparitahan’ny vaovao soa mikasiky an’i Kristy. 13 Tsy hainareo va fa ze manao asa masy amy tempoly ao le mihina ty raha ao, sady ze manompo tsy tampaky amy alitara eo le mahazo anjara baka amy alitara? 14 Manahaky ani-zay koa fa nanome didy Tompo hoe tokony hivelo amy vaovao soa ze mitory ty vaovao soa.

15 Fe tsy nampiasa an’ny zo rezay mihintsy aho. Sady tsy hoe nanoratsy an’ny raha reo aho mba hanaova an’ny raha rezay amiko, fa aleoko aza maty tozay... Tsy misy olo hengako handrava ty antony irengirengeako! 16 Ka laha mitory ty vaovao soa aho, le tsy misy antony irengirengeako, fa tsy maintsy manao an’ny raha zay aho. Ho azon-draha vatany aho laha tsy mitory ty vaovao soa! 17 Laha an-tsitrapo ro anaovako an’ny raha zay, le mana valisoa aho. Fe ndre tsy an-tsitrapo aza ro anaovako an’ny raha zay, le mbo mana asa nankiny amiko koa aho. 18 Ka ino zany ty valisoa azoko? Lafa mitory ty vaovao soa aho, le afaky manome an’ny raha zay tsy misy takalony. Amy zay tsy hanararaotsy ty fahefàko* aho lafa mitory ty vaovao soa.

19 Fa ndre afaky adidy amin’olo iaby aza aho, le fa nataoko ho mpanompon’olo iaby ty vatako, mba hahazoako olo maro araky ze azo atao. 20 Tamy ty Jiosy le nanao manahaky ty Jiosy aho, mba hahazoako ty Jiosy. Tamy ze olo tambanin’ny lalàna, le lasa nanahaky ty olo tambanin’ny lalàna aho, ndre tsy ambanin’ny lalàna aza, mba hahazoako ani-ze olo ambanin’ny lalàna. 21 Tamy ze olo tsy mana lalàna, le lasa nanahaky ani-ze olo tsy mana lalàna aho, ndre mana ty lalàna-Ndranahary noho ambanin’ny lalànan’i Kristy aza, mba hahazoako ani-ze olo tsy mana lalàna. 22 Tamy malemy, le lasa malemy aho, mba hahazoako ty malemy. Lasa raha iaby tamy karazan’olo iaby aho, mba hisy havotako ndre amy fomba akory ndre amy fomba akory. 23 Fa ataoko ho an’ny vaovao soa ty raha iaby, mba hitoriako an’ny raha zay amin’olo hafa.

24 Tsy hainareo va fa samby lomay iaby ty mpanao korsa lafa manao kirebaky, fe raiky avao ro mahazo loka? Lomaisa koa zany, amy zay hahazo loka nareo. 25 Mifehy ty vatany amy raha iaby koa ze olo mandramby anjara amy kirebaky.* Mazava ho azy fa mba hahazoa satroboninahitsy mety simba ty antony anaovan-drozy an’ny raha zay, fa tsika manao an’ny raha zay mba hahazoa ani-azy tsy mety simba iny. 26 Ka lafa lomay aho le tsy lomalomay fahatany, sady tsy sahala mamango tsioky aho lafa mikomondro, 27 fa asiako marè* ty vatako le andevoziko, tsy no zaho koa ro lasa tsy hahazo hatò* kanefa fa nitory tamin’olo hafa.