Ty taratasy voalohany ho ahi-ty Korintianina

10 Teako ho hainareo rahalahy, fa nandeha tambanin’ny rahona eo iaby razambentsika rey, sady nandeha mbamy riaky mbeo rozy iabiaby. 2 Le natao batisa tamy rahona noho riaky rozy, tamy rozy nanaraky an’i Mosesy. 3 Nihina hany ara-panahy mitovy koa rozy iaby, 4 sady nino raha finomy ara-panahy mitovy iaby. Tsy zay fa nino tamy vatolampy ara-panahy nanaraky an-drozy iny rozy, tsy ia vatolampy zay fa Kristy.* 5 Fe ndre zay, tsy nahazo hatò tamy Ndranahary ty ankamaroan-drozy, satria niripaky tamy dezera* any.

6 Anatsy ho antsika raha zay, mba tsy haniriantsika raha raty, manahaky an-drozy naniry an’ny raha raty rey. 7 Miambena soa nareo tsy no ho lasa mpanompo sampy manahaky ty sisany tamin-drozy, araky ty voasoratsy hoe: “Nipetraky vahoaky rey mba hihina noho hino. Bakeo nitsanga rozy mba hanao fety.” 8 Tsy tokony hijangajanga* tsika, manahaky ty nijangajangan’ny* sisany tamin-drozy, ka 23 000 tamin-drozy ro nimaty tanatin’ny andro raiky. 9 Le tsy tokony hitsapa toetsy an’i Jehovah tsika, manahaky ty sisany tamin-drozy nitsapa toetsy azy, ka nimatin’ny bibilava. 10 Ka mimenimeny manahaky ty sisany tamin-drozy. Nimatin’ny mpandripaky, azy olo nimenimeny rey. 11 Nahazo an-drozy raha rezay mba ho anatsy, sady nisoraty mba hampitandrema antsika, zany hoe ho antsika ze velo amy fotoa hiavian’ny farani-zao tontolo zao.*

12 Ka ze mieritseritsy ty vatany hoe fa mitsanga, le tokony hiamby soa tsy no ho lavo. 13 Tsy misy fakam-panahy mahazo anareo, laha tsy ze mpahazo olo avao. Fe tsy mivaliky amy ty safàny Ndranahary, ka tsy hanenga anareo ho azon’ny fakam-panahy mandilatsy ani-ze zakanareo. Fa lafa misy fakam-panahy le hasiany lala hiboaha koa, mba hahazakanareo an’ny raha zay.

14 Ka laha zay ie namako teako, le ilaiso ty fanompoa sampy. 15 Miresaky aminareo manahaky miresaky amin’olo mana fahendrea aho,* ka nareo mihintsy ro tokony hitsara ze raha volaniko. 16 Tsy mahazo raha soa baka amy lion’i Kristy koa va tsika, lafa mino amy kopy fisaora isaorantsika iny? Le tsy mahazo raha soa baka amy vatan’i Kristy koa va tsika, lafa mihina ty mofo tampahintsika? 17 Tsy zay fa raiky avao ty mofo, le midika zay fa vata raiky tsika ndre maro aza, satria samby mihina amy mofo raiky io tsika iaby.

18 Henteo ty Israelita:* Tsy sahala hoe miaraky mihina amy Ndranahary va ze olo mihina soro baka amy alitara eo? 19 Ta hivola va zaho hoe misy dikany ty soro atao ho ahi-ty sampy, na hoe misy dikany ty sampy? 20 Tsy zay mihintsy, fa ty teako hovolany le hoe ze soro amean’olo firenena hafa le ataon-drozy soro ho ahi-ty demonia, fa tsy ho ahi-Ndranahary. Ka tsy teako hana raha iharoa amy demonia nareo. 21 Tsy azonareo atao ty mino amy kopin’i Jehovah noho mino amy kopin’ny demonia. Tsy azonareo atao ty mihina amy “latabon’i Jehovah” noho mihina amy latabon’ny demonia. 22 Sa “manao ze hahavy an’i Jehovah hamarahy tsika”? Mahery mandilatsy azy va tsika?

23 Azo atao ty raha iaby, fe tsy ty raha iaby ro mahasoa. Azo atao ty raha iaby, fe tsy ty raha iaby ro mampahery. 24 Tokony hila ze hahasoa ty olo hafa avao ty olo kiraidraiky, fa tsy ze hahasoa ty vatany.

25 Hano ze hena avily am-bazary eny fa ka manontany, amy zay halio ty eritseritsinareo, 26 satria “ahin’i Jehovah ty tany noho ze raha iaby aminy eo.” 27 Laha misy olo tsy mpino manasa anareo ka ta ho any nareo, le hano ze raha apetrany alohanareo eo, fa ka manontany tsy no hampikoronta ty eritseritsinareo raha zay. 28 Fe laha misy olo mivola aminareo hoe: “Raha baka natao soro toy”, le ka mihina mba tsy haminga an’ny olo nivola an’ny raha zay taminareo iny noho mba tsy hampikoronta eritseritsin’olo. 29 Fe tsy ty eritseritsinao ro teako hovolany, fa ty eritseritsin’olo iny. Fa manino ty fahafahako ro tokony hotsaran’ny eritseritsin’olo hafa? 30 Laha mihina aho sady misaotsy a-Ndranahary amy raha haniko iny, le manino moa aho ro tokony hamea tsiny amy hany anaovako fisaora iny?

31 Ka ndre mihina nareo ndre mino, ndre ino ndre ino ty raha ataonareo, le anovo mba hanomeza voninahitsy a-Ndranahary ty raha iaby. 32 Ka manao ze hahavoafinga ty Jiosy na ty Grika na ty fiangona-Ndranahary, 33 fa manaova manahaky ahy. Miezaky aho hanao ze raha hahafalifaly ty olo iaby amy raha iaby, ka tsy mila ze hahasoa ahy fa ze hahasoa ty olo maro, mba ho avotsy rozy.