Ty taratasy voalohany ho ahi-ty Korintianina
11 Tahafo aho, manahaky ty anahafako an’i Kristy.
2 Midera anareo aho, satria mahatiaro ahy nareo amy raha iaby sady orihinareo soa ty fampianara nampitako taminareo. 3 Fe teako ho hainareo fa Kristy ro lohan’ny lahilahy iaby, ty lahilahy ro lohan’ny ampela, le Ndranahary ro lohan’i Kristy. 4 Ze lahilahy mivavaky na maminany ka misaron-doha, le manao ze hahamenatsy an’ny lohany iny. 5 Fa ze ampela mivavaky na maminany ka tsy misaron-doha, le manao ze hahamenatsy an’ny lohany iny, satria sahala ampela nisolà mihintsy ie. 6 Fa laha tsy misaron-doha ty ampela, le tokony hotampahy boribory ty volony. Fe laha mahamenatsy azy ty hoe hotampahy boribory volony iny na hosolà, le tokony hisaron-doha ie.
7 Fa ty lahilahy tsy tokony hisaron-doha satria tarehi-Ndranahary noho voninahitsi-Ndranahary ie, fa ty ampela voninahitsin’ny lahilahy. 8 Tsy zay fa tsy ty lahilahy ro baka amy ampela, fa ty ampela ro baka amy lahilahy. 9 Ankoatsini-zay le tsy niforony ho ahi-ty ampela ty lahilahy, fa ty ampela ro niforony ho ahi-ty lahilahy. 10 Zay ro mahavy ty ampela hanao saron-doha, zany hoe hanao marikin’ny fanajà fahefà, mba ho hitan’ny anjely.
11 Fe amy mpianatsin’ny Tompo rey eo, le tsy misy ty ampela laha tsy eo ty lahilahy, sady tsy misy ty lahilahy laha tsy eo ty ampela. 12 Tsy zay fa manahaky ty niavian’ny ampela baka amy lahilahy ro niavian’ny lahilahy baka amy ampela koa. Fe baka amy Ndranahary ty niavian’ny raha iaby. 13 Nareo mihintsy ro tokony hitsara: Mety va laha mivavaky amy Ndranahary ty ampela kanefa tsy misaron-doha? 14 Tsy fa namorona ty olombelo va ty hoe henatsy ho ahi-ty lahilahy laha lava volo ie, 15 fa voninahitsy ho ahi-ty ampela ty lava volo? Tsy zay fa ty volony ro namea azy mba hanaronany ty lohany. 16 Fe laha misy tsy maneky an’ny raha zay fa ta hanaraky fomba hafa, le samby tsy mana fomba hafa, ndre zahay ndre ty fiangona-Ndranahary.
17 Fe tsy midera anareo aho laha manome toromariky anareo, satria tsy mahasoa anareo ty fivorianareo fa vomaiky manimba anareo. 18 Voalohany tse, le nireko hoe misy fisaratsaraha aminareo eo lafa mivory ty fiangonanareo, sady mino aho fa marina raha zay. 19 Fa tsy maintsy hisy olo hananga antokom-pinoa* aminareo eo, mba hiseho mazava hoe ia aminareo ty mahazo hatò.
20 Lafa mivory amy pilasy raiky nareo, le tsy hoe hihina ty Sakafo Harivan’ny Tompo ro tena foto-dianareo. 21 Satria lafa mihina an’ny raha zay nareo, le fa baka nihina hariva ty sisany. Misy aminareo zany mosarè, le misy mamo. 22 Tsy mana trano ihinana noho inoma va nareo? Sa tsy misy dikany aminareo ty fiangona-Ndranahary, ka ataonareo ze hahamenatsy ani-azy tsy manan-draha rey? Ka ino ty hovolaniko aminareo? Tokony hidera anareo va aho? Tsy hidera anareo amy raha zay aho.
23 Satria ho zao ty niazoko baka amy Tompo ka nampitako taminareo koa: Nandramby mofo Jesosy Tompo tamy haly hamadiha azy iny. 24 Ka lafa baka nisaotsy a-Ndranahary ie, le nitampahiny mofo iny sady hoy ty asany: “Toy ty* vatako azy amea ho anareo iny. Anovo avao zao ho fahatiarova ahy.” 25 Ho zay koa ty nataony tamy kopy iny, lafa rozy baka nihina hariva iny. Le nivola ie hoe: “Kopy toy ro* fifanekea vaovao, le hampanan-kery an’ny fifanekea io ty lioko. Anovo avao zao ho fahatiarova ahy, saky mino amy raha toy nareo.” 26 Fa saky mihina an’ny mofo zay noho mino amy kopy zay nareo, le manambara ty fahafatesan’ny Tompo avao, zisiky iaviany.
27 Ka ndre ia ndre ia mihina ty mofo na mino amy kopin’ny Tompo, kanefa tsy maeva an’ny raha zay, le tsy mampisy dikany* ty vatan’ny Tompo noho ty liony olo zay. 28 Tokony handiniky soa ty vatany tse ty olo kiraidraiky mba hahitany laha maeva ie na tsy maeva, zay vo hihina an’ny mofo iny noho hino amy kopy iny. 29 Fa ze mihina noho mino kanefa tsy miezaky hahay soa ty vatan’ny Tompo, le mihina noho mino sazy ho ahi-ty vatany. 30 Raha zay ro mahavy ty maro aminareo halemilemy noho harary, sady maro koa ty fa nimaty.* 31 Fe tsy hotsarà tsika laha miezaky hahay soa ty vatantsika. 32 Kanefa lafa tsarà tsika, le lilovin’i Jehovah mba tsy hosazỳ miaraky amy zao tontolo zao. 33 Ka zao zany rahalahiko, lafa mivory mba hihina an’ny raha zay nareo, le tokony hifandiny. 34 Laha misy olo mosarè le tokony hihina an-tranony any ie, mba tsy hosazỳ nareo lafa mivory. Fa ty raha hafa, halamiko lafa avy any aho.