Ty taratasy voalohany ho ahi-ty Korintianina

15 Henanizao rahalahy, ampitiaroviko anareo ty vaovao soa nitoriko taminareo, azy nekenareo sady ivaharanareo iny. 2 Hanavotsy anareo koa vaovao zay, laha inoanareo avao vaovao soa nitoriko taminareo iny. Fa laha tsy zay, le hisera avao ty nahavy anareo ho mpino.

3 Tsy zay fa anisan’ny raha voalohany nianarako koa ka nampitako aminareo ty hoe: Maty vokatsin’ny fahotantsika Kristy, araky ty Soratsy Masy, 4 le nalevy ie bakeo nivelomy ndraiky tamy andro fahatelo, araky ty Soratsy Masy. 5 Niseho tamy Kefasy* ie, bakeo tamy Apostoly 12 rey. 6 Tafarani-zay, le niseho indraiky mandeha tamy rahalahy 500 mahery ie, le mbo amintsika eto ty ankamaroan-drozy, fa ty sisany fa nimaty.* 7 Bakeo niseho tamy Jakoba ie, le niseho tamy apostoly iabiaby rey tafarani-zay. 8 Le ty tena farany, mba niseho tamiko koa ie, sahala hoe niseho tamy ajà teraky tsy tonga vola.

9 Tsy zay fa zaho ro farany kelikely amy apostoly rey, le tsy maeva hokaihy hoe apostoly aho, satria nenjehiko ty fiangona-Ndranahary. 10 Fe ty hasoam-panahy miavaky naseho-Ndranahary ro nahavy ahy hanahaky ani-zao. Le tsy misera ty hasoam-panahy miavaky nasehony tamiko, fa niasa mafy mandilatsy an-drozy iaby aho. Fe tsy zaho ro tena niasa mafy, fa azy hasoam-panahy miavaky naseho tamiko iny. 11 Ka ndre zaho ndre rozy, le samby mitory an’ny raha zay, sady ninoanareo raha zay.

12 Laha torỳ hoe fa nivelomy ndraiky Kristy, le akory ty ivolanan’ny sisany aminareo fa tsy misy ty fameloma ty maty? 13 Laha tsy hovelomy ty maty, le tsy ho nivelomy Kristy. 14 Fe laha tsy nivelomy Kristy, le vatany misera ty fitoriantsika, sady misera koa ty finoanareo. 15 Ho hita koa fa vavolombelo mivola vandy mikasiky a-Ndranahary tsika, satria manambara fa nivelominy ndraiky Kristy. Fe tsy ho nivelominy ie laha tsy hovelomy vatany ty maty. 16 Fa laha tsy hovelomy ty maty, ndre Kristy aza tsy ho nivelomy. 17 Le laha tsy nivelomy Kristy, le tsy misy dikany ty finoanareo, sady tsy afaky amy fahotanareo nareo. 18 Le ho rava tanteraky koa azy maty tamy Kristy ao rey. 19 Laha amy fiaina henanizao avao tsika ro mitamà an’i Kristy, le tsika ro farani-ze mahaferinay amin’olo iaby.

20 Fe fa nivelomy ndraiky Kristy, azy voaloham-bokatsy amy azy fa nimaty rey iny. 21 Ka laha baka amin’olo raiky zany ty fahafatesa, le baka amin’olo raiky koa ty fameloma ty maty. 22 Fa manahaky ty ahafatesan’olo iaby vokatsin’ny raha nataon’i Adama, ro hameloma ty olo iaby vokatsin’ny raha nataon’i Kristy. 23 Fe samby mana ty filaharany ty kiraidraiky: Kristy ro voaloham-bokatsy, le bakeo ze ahin’i Kristy, anatin’ny fotoa anatrehany. 24 Le amy farany, hanome an’ny Fanjakà iny amy Ndranahary Babany ie, lafa baka naripakiny ty fanjakàn’olombelo noho ty fahefà noho ty hery iabiaby. 25 Tsy zay fa tsy maintsy manjaka ie, zisiky hanaova-Ndranahary ty fahavalo iaby ho ambany tombony eo. 26 Ka ty fahavalo farany horavà le ty fahafatesa. 27 Tsy zay fa ‘nampanekeni-Ndranahary azy ty raha iaby, ka nataony ambany tombony eo.’ Fe lafa nivolany hoe: ‘Nampanekeny azy ty raha iaby’, le mazava ho azy fa tsy anatini-zay Azy nahavy ty raha iaby haneky azy iny. 28 Fe lafa nampanekeny an’ny Anaky iny ty raha iaby, le Anaky iny mihintsy koa ro haneky ani-Azy nahavy ty raha iaby haneky azy iny, mba ho Ndranahary ro raha iaby ho ahin’olo iaby.

29 Laha tsy zay, le ino ty soa ho azoni-azy atao batisa amy fahafatesa rey? Laha tsy hovelomy mihintsy ty maty, manino rozy ro atao batisa amy fahafatesa? 30 Manino koa tsika ro mirisiky avao sanandro? 31 Atahora ho maty avao aho sanandro. Rahalahiko, tena marina raha zay, sady tena mirengirengy amy Kristy Jesosy Tompontsika ao aho satria mana anareo. 32 Laha nialy tamy bibinala ta Efesosy any manahaky ty olo sisany* aho, ino ty soa azoko baka amy raha zay? Laha tsy hovelomy ty maty, le “ndao tsika hihina noho hino, satria ho maty avao hamaray.” 33 Ka maneky ho voafitaky* nareo. Manimba ty fahazara mahasoa* ty naman-draty. 34 Mba mandiniha le manaova raha marina, sady ka zatsy manota, satria tsy mahay a-Ndranahary ty olo sisany. Ty hahamenatsy anareo ro ivolanako an’ny raha zay.

35 Ndre zay aza, le hisy hivola hoe: “Akory ty hameloma ty maty? Karaza vata manao akory ty hananany lafa hovelomy ie?” 36 Olo tsy mandiniky iha, tsy hovelomy ze raha afafinao laha tsy maty tse. 37 Le tsy raha mitiry* hiboaky eo iny ro afafinao, fa voa iny avao, ndre voam-barimbazaha zay ndre voa hafa. 38 Fe amea-Ndranahary vata araky ze itiavany azy voa iny, sady samby ameany vata iaby ty voa kiraidraiky. 39 Tsy mitovy ty nofotsy iaby, fa hafa ty ahin’olombelo, hafa ty nofotsin’aomby, hafa ty nofotsin’ny voro, le hafa ty ahin’ny fia. 40 Hafa koa ty vatani-ze an-danitsy any, le hafa ty vatani-ze an-tany etoy. Hafa ty voninahitsin’ny vatani-azy an-danitsy any rey, le hafa ty voninahitsin’ny vatani-azy an-tany etoy rey. 41 Hafa ty voninahitsin’ny masoandro, hafa ty ahin’ny vola, le hafa ty ahin’ny basia. Laha ty marina, ndre ty basia aza samby mana ty voninahitsiny.

42 Ho zay koa ty fameloma ty maty. Vata mety lo ie lafa afafy, fa tsy mety lo lafa velomy. 43 Afahy baraka ie lafa afafy, fa be voninahitsy lafa velomy. Malemy ie lafa afafy, fa mahery lafa velomy. 44 Vata nofotsy ie lafa afafy, fa vata ara-panahy lafa velomy. Laha misy vata nofotsy, le misy koa vata ara-panahy. 45 Fa ho zao ty voasoratsy: “Lasa rahamananay Adama, azy lahilahy voalohany iny.” Le Adama farany iny lasa fanahy ahazoa fiaina. 46 Fe tsy ze ara-panahy ro voalohany. Ze nofotsy ro voalohany, zay vo ty ara-panahy. 47 Baka amy tany sady namboary tamy lemboky lahilahy voalohany iny, fa lahilahy faharoe iny baka an-danitsy any. 48 Manahaky ani-azy namboary tamy lemboky iny azy namboary tamy lemboky rey, le manahaky ani-azy baka an-danitsy any iny azy an-danitsy any rey. 49 Manahaky ty itovizantsika tarehy amy azy namboary tamy lemboky iny ro itovizantsika tarehy amy azy baka an-danitsy any iny.

50 Fe zao ty volaniko rahalahy: Tsy afaky mandova ty Fanjakà-Ndranahary ty nofotsy noho lio, sady ze mety lo tsy afaky mandova ty tsy mety lo. 51 Sekirè masy raha volaniko aminareo toy: Tsy fonga ho maty tsika iabiaby, fa tsika iaby le hovà 52 tsielatsiela anatin’ny indraiky mipỳ maso avao, lafa maneno ty antsiva farany. Tsy zay fa haneno ty antsiva, le hovelomy ty maty ka ho lasa tsy mety lo, le hovà tsika. 53 Fa tsy maintsy hisiky ty tsy mety lo azy mety lo toy, le tsy maintsy hisiky ty tsy mety maty azy mety maty toy. 54 Fe lafa lasa tsy mety lo azy mety lo toy, sady lasa tsy mety maty azy mety maty toy, le ho tanteraky safà voasoratsy ho zao iny hoe: “Horavà tsy hisy mandrakizay ty fahafatesa.” 55 “Fahafatesa, aia fandreseanao zao? Fahafatesa, aia fitsibohanao zao?” 56 Ty ota ro fitsiboha mahavy fahafatesa, le ty Lalàna ro herin’ny ota.* 57 Fe isaora Ndranahary, satria manome antsika fandresea amy alalan’i Jesosy Kristy Tompontsika!

58 Dikani-zay rahalahiko teako, le ka maneky ho voahozonkozo sady ka miovaova mihintsy. Miezaha avao ho maro raha atao amy asan’ny Tompo, satria hainareo fa tsy misera ty asa mafy ataonareo ho an’ny Tompo.