Ho an’i Filemona
1 Baka amy Paoly, azy gadra satria mino an’i Kristy Jesosy iny, noho baka amy Timoty rahalahintsika.
Ho an’i Filemona rahalahy teanay sady mpiaraky miasa aminay, 2 noho Apia anabavinay, noho Arkipo maramilan’i Kristy manahaky anay, noho ho ahi-ty fiangona mivory an-tranonao ao,
3 Enganè Ndranahary Babantsika iny noho Jesosy Kristy Tompo mba hampiseho hasoam-panahy miavaky* aminareo sady hanome fiadana anareo!
4 Tsy mieny misaotsy a-Ndranahary aho lafa mahatiaro anao amy vavaky, 5 satria reko hoe manam-pinoa iha sady tea an’i Jesosy Tompo noho ty olo masy iaby. 6 Mivavaky aho hoe enganè ty finoanao noho ty ahin’olo finoa raiky aminao mba hahavy anao haneky hoe nahazo raha maro biby tamy alalan’i Kristy tsika. 7 Tena nahafalifaly noho nampahery ahy, rahalahy, ty naharè hoe be fitiava iha, satria iha namelombelo ty fon’olo* masy.
8 Ka azoko atao soa ty mandidy anao hanao ani-ze raha tokony hataonao, amy maha apostolin’i Kristy ahy. Fe ndre zay, 9 le aleoko mangataky anao moramora satria be fitiava iha. Zaho Paoly moa fa antitsy sady gadra amy ty finoako an’i Kristy Jesosy. 10 Misoloho ho an’i Onesimosy anako aho, satria lasa sahala babany aho amy zaho gadra* henanizao. 11 Tsy nahasoa anao ie taloha, fa mahasoa ahy sady mahasoa anao ie henanizao. 12 Ampimpolìko aminao any ie, ie azy teako biby iny.*
13 Teako hijano amiko atoy ie mba hisolo anao hikarakara ahy amy zaho gadra io. Gadra aho satria nitory ty vaovao soa. 14 Fe tsy ta hanao raha mihintsy aho laha tsy fa maneky iha, mba ho sitraponao fa tsy forosè ty raha soa ataonao. 15 Toy vasa ty tena nahavy azy hilay tsielatsiela:* Mba ho ahinao ndraiky ie zisiky farany. 16 Le tsy ho mpanompo sasy ie amy zay fa ho soa mandilatsy ani-zay, satria fa lasa rahalahy teantsika ie. Tena teako ie, le mino aho fa iha mbo ho tea azy mandilatsy ahy, satria mpanomponao sady rahalahinao amy Tompo ao ie. 17 Ka laha namanao vatany aho, le rambeso soa ie, manahaky ty andrambesanao ahy. 18 Laha nisy raha tsy mety nataony taminao, le anovo sahala hoe zaho ro nanao an’ny raha zay. Laha anananao trosa koa ie, le anovo sahala hoe trosako raha zay. 19 Zaho Paoly mihintsy ro manoratsy ani-toy: Honerako raha zay. Iha koa aza mbo ananako trosa, le iha mihintsy trosa zay. 20 Enganè iha, rahalahy, mba hanampy ahy amy raha zay, satria samby mpanompon’ny Tompo tsika! Enganè iha hamelombelo ty foko* satria mpanori-dia an’i Kristy iha!
21 Matoky aho fa haneky iha, ka zay anoratako aminao io. Haiko fa hanao mandilatsy ani-ze raha volaniko iha. 22 Mba anomano trano hipetrahako koa aho, fa mitamà aho hoe habototsy ka ho avy* aminareo any ndraiky, satria mivavaky ho ahy nareo.
23 Mampamangy anao zao Epafra, azy gadra miaraky amiko amy ty finoany an’i Kristy Jesosy iny. 24 Mampamangy koa hoasan’i Marka, Aristarko, Demasy, noho Lioka, azy samby mpiaraky miasa amiko rey.
25 Loniky lahy Jesosy Kristy Tompo hampiseho hasoam-panahy miavaky aminareo satria mana toe-tsay soa nareo!