Ino ty Soa ho Azonao Laha Mivory Miaraky amy Vavolombeloni-Jehovah?

Fa nisy nanasa anao hivory miaraky amy Vavolombeloni-Jehovah va? Laha mbo tsy tany mihintsy iha, le mety hihafahafa tse iha amy voalohany. Mety hieritseritsy iha hoe: ‘Ino ty raha atao amy fivoria io any? Manino ro vatan-draha ty mivory? Manino aho ro mila mandeha any?’ Ho hitanao ato fa hanampy anao hifandramby marìny amy Ndranahary ty mivory miaraky aminay, sady hanampy anao amy fiainanao manoka.

1. Ino ty antony bevata marè mahavy antsika mivory?

Niresaky mikasiky ani-zay ty mpanoratsy Baiboly raiky. Ho zao ty nivolaniny: ‘Anivoni-fiangona eo ro hiderako ani-Jehovah.’ (Salamo 22:22) Manahaky ty mpanomponi-Jehovah taloha avao ty Vavolombeloni-Jehovah, ka falifaly lafa miaraky mivory. Mivory sankerinandro ty Vavolombeloni-Jehovah amy tany toy iaby mba hidera a-Ndranahary noho hihira voho hivavaky. Manao fivoriambe vitsivitsy koa rozy santao.

2. Ino ty raha hianaranao lafa am-pivoria any?

Baka amy Safà-Ndranahary ao iaby ty raha ampianary any, sady ezahinay ‘hazavany soa ty hevitsiny.’ (Vakio Nehemia 8:8.) Hahay soa ani-Jehovah noho ty toetsiny iha laha mamonjy fivoria. Hifandramby marìny aminy iha satria ho hitanao hoe tena tea anao ie. Ho hitanao koa hoe manampy anao hana fiaina soasoa ie.​—Isaia 48:17, 18.

3. Manino ro afaky manampy anao ty olo miaraky mivory aminao?

Mivola amintsika Jehovah hoe tokony ‘hifandiniky tsika mba hifandrisiky ho amy fitiava noho asa soa, ka tsy hahafoy ty fiarahantsika mivory.’ (Hebreo 10:24, 25) Lafa mivory miaraky aminay iha, le ho hitanao fa tena be fitiava ty olo any sady ta hahay soa a-Ndranahary manahaky anao koa. Haharè an-drozy miresaky hevitsy mampahery baka amy Baiboly ao iha. (Vakio Romanina 1:11, 12.) Hanampy anao ty mifampiresaky amin’olo any, satria mety fa nahazo an-drozy koa ty problemo mahazo anao. Antony vitsivitsy avao reo ahità hoe manino tsika ro teani-Jehovah hivory!

DINIHO LALIKY

4. Fivoriani-Vavolombeloni-Jehovah

Niaraky nivory avao ty Kristiana tamy taonjato voalohany mba hanompoa ani-Jehovah. (Romanina 16:3-5) Vakio Kolosianina 3:16, le iaraho midiniky fanontanea toy:

• Akory ty nataoni-Kristiana voalohany reo lafa nanompo ani-Jehovah?

VIDEO: Ino ty Raha Atao amy Efitrano Fanjakà Any? (2:12)

• Ino ty hitanao hoe mampitovy ty fivoria atao amy Efitrano Fanjakà any noho ty raha resahy amy Kolosianina 3:16 ao?

• Lafa baka nanenty ani-video iny na sary io iha, misy raha hafa teateanao koa va ty am-pivoria any?

Vakio 2 Korintianina 9:7, le iaraho midiniky fanontanea toy:

• Manino ro tsy foroseva handoa drala iha lafa mamonjy ty fivoriani-Vavolombeloni-Jehovah?

Henteo miaraky amy ty mpampianatsy anao hoe ino koa ty raha hodinihy amy fivoria manaraky.

• Ino amy ty raha am-pivoria any ro teanao na mahasoa anao?

Fa nihainao va?

Azonao hentea amy jw.org ao, ty pilasy noho fotoa anaova fivoria amy tany toy iaby.

1. A. Misy lahateny, fampiofana, noho video ty fivorianay. Atomboky noho tampery amy hira noho vavaky ty fivoria

2. B. Misy fiaraha midiniky koa ty sisany amy fandahara any, le afaky mandramby anjara amy valin-teny ty mpanatriky

3. D. Afaky mivory iaby, ndre lahilahy ndre ampela, ndre be tao ndre ajà

4. E. Tsy misy rakitsy ty fivoriani-Vavolombeloni-Jehovah

5. Mila ezaky ty mamonjy fivoria

Diniho ty modely nengani-fianakaviani-Jesosy. Niala baka a Nazareta any rozy santao mba hamonjy ty fetini-Paska ta Jerosalema any, sady nandeha tomboky 100 kilomety eo ho eo tamy lala feno vohibohitsy. Vakio Lioka 2:39-42, le iaraho midiniky fanontanea retoa:

• Akory ty hevitsinao, nila ezaky va ty nandeha a Jerosalema any?

• Sarotsy aminao va ty mandeha mivory? Ino ty antony?

• Tsapanao va hoe mahasoa anao ty miezaky mivory ndre tsy mora aza raha zay? Ino ty antony?

• Manino tsika ro tokony hivory avao?

FAMINTINA

Hahay ani-Jehovah soa iha lafa mamonjy fivoria, sady hifandramby marìny aminy. Afaky manompo azy miaraky amin’olo hafa koa iha am-pivoria any.

Famerena

• Manino Jehovah ro mampirisiky antsika hivory?

• Ino ty raha ianaranao lafa mivory miaraky amy Vavolombeloni-Jehovah?

• Mbo misy raha hafa hitanao va mampiseho hoe mahasoa ty mamonjy fivoria?

DINIHO KOA RETOA

Manao akory laha matahotahotsy hamonjy fivoria iha? Henteo ato fa lasa nazoto nivory ty lahilahy raiky ndre nikamokamo aza ie tamy voalohany.

Tsy ho Halinonay Mihintsy Fandrambesa Anay Iny (4:16)

Ino ty raha niteani-mpamaraky raiky lafa nanatriky fivoria ie, le ino ty nataony mba hamonjea fivoria avao?

Hafa Mihintsy ty Am-pivoria Any! (4:33)

Henteo ato hoe manao akory ty fahitan’olo sisany ty famonjea fivoria.

“Fa Maninona Aho no Tokony Handeha Hivory?” (Lahatsoratsy amy jw.org ao)

Ianaro ato hoe nanino ro niova ty fiainani-malaso raiky toy lafa namonjy ty fivoriani-Vavolombeloni-Jehovah ie.

“Tsy Nisaraka Tamin’ny Basiko Mihitsy Aho” (Ny Tilikambo Fiambenana 1 Jolay 2014)

5. Niova ty fiaina nanomboky tamy 1914

Alefaso VIDEO toy.

VIDEO: Niova ty Fiaina Nanomboky Tamy 1914 (1:10)

Fa nivolanini-Jesosy hoe hanao akory ty fiaina lafa manjary Mpanjaka ie. Vakio Lioka 21:9-11, bakeo iaraho midiniky fanontanea toy:

• Aia amy raha reo ro fa hitanao na fa renao?

Nivolanini-apostoly Paoly ty toetsin’olo amy andro farany amy fanjakàn’olombelo. Vakio 2 Timoty 3:1-5, bakeo iaraho midiniky fanontanea toy:

• Aia amy toetsy reo ro fa hitanao henanizao?

6. Tokony handrisiky antsika hanao ino ty fahaiza hoe fa manjaka ty Fanjakà-Ndranahary?

Vakio Matio 24:3, 14, bakeo iaraho midiniky fanontanea retoa:

• Ino ty asa bevata mampiseho hoe fa manjaka ty Fanjakà-Ndranahary?

• Ino ty tokony hataonao laha ta handramby anjara amy asa io iha?

Fa manday Fanjakà iny henanizao, sady kely sisa le hanjaka amy tany toy iaby koa ie. Vakio Hebreo 10:24, 25, bakeo iaraho midiniky fanontanea toy:

• Mila manao ino tsika lafa mahay hoe “fa mihamarìny ty andro”?