Mahamenatsy ty ankamaroan’olo ty hiresaky mikasiky firaisa. Fe miresaky mivanta ani-raha zay ty Baiboly sady mihaja soa ty fomba iresahany azy. Tena mahasoa antsika ty raha volany ao mikasiky ani-zay. Baka amy Jehovah, azy Mpamoro antsika iny ty Baiboly, sady ie ro tena mahay ze hahasoa antsika. Volaniny amintsika ty raha tokony hatao mba hampifalifalea ty fony noho hahavy antsika hahazo tavy ty fiaina zisiky farany.

1. Akory ty fiheverani-Jehovah ty firaisa?

Fanomeza baka amy Jehovah ty firaisa. Teany laha ty lahilahy noho ampela fa mpivaly ro manao ani-raha io. Natao mba hahavy ty mpivaly ho afaky hiteraky noho hifaneho fitiava sady hahazo fahafinareta fanomeza io. Zay mahavy ty Safà-Ndranahary mivola hoe: “Mifalifalea amy valini-fahatanoranao.” (Ohabolana 5:18, 19) Mitamà Jehovah fa hifankatea marè avao ty mpivaly ka tsy hijangajanga mihintsy.​—Vakio Hebreo 13:4.

2. Ino ty atao hoe fijangajangà?

Mivola ty Baiboly fa ‘tsy handova ty Fanjakà-Ndranahary ty mpijangajanga.’ (1 Korintianina 6:9, 10) Nampiasa ty safà grika hoe pôrneia ty mpanoratsy Baiboly mba hivolana ty fijangajangà. Retoa iaby ty tafilitsy amy zay: 1) firaisaa ataon’olo tsy mpivaly, 2) firaisa ataoni-lahilahy samby lahilahy na ampela samby ampela, le 3) firaisa ataon’olo amy biby. Falifaly ty foni-Jehovah laha tsy mijangajanga tsika. Hahasoa antsika koa raha zay.​—1 Tesalonianina 4:3.

DINIHO LALIKY

3. Ilaiso ty fijangajangà

Mpanompo-Ndranahary tsy nivaliky Josefa. Niezaky avao ie mba halio fandaisam-bata. Vakio Genesisy 39:1-12, bakeo iaraho midiniky fanontanea retoa:

• Nanino Josefa ro nilay lafa nitao azy hijangajanga ampela iny?​—Henteo ty andininy 9.

• Nahay nandramby fanapahan-kevitsy va Josefa araky ty hevitsinao? Ino ty antony?

VIDEO: Ilaiso ty Fijangajangà (5:06)

Teani-Jehovah hilay lavitsy ty fijangajangà tsika iaby. Vakio 1 Korintianina 6:18, bakeo iaraho midiniky fanontanea retoa:

• Ino ty raha mety hitariky ty olo raiky hijangajanga?

• Ino ty azonao atao laha ta hilay ty fijangajangà iha?

4. Afaky manohitsy fakam-panahy iha

VIDEO: Mamakia Baiboly le ho Vitanao ty Handresy Fakam-panahy (3:02)

• Ino ty nataoni-rahalahy iny lafa hitany hoe manaly hitariky azy handranto ty raha nieritseretiny noho nataony?

Ndre ty Kristiana tsy mivaliky kindraiky mila mialy ay mba tsy hieritseritsy raha raty. Ino ty hanampy anao tsy hieritseritsy raha raty? Vakio Filipianina 4:8, bakeo iaraho midiniky fanontanea retoa:

• Karazan-draha manao akory ro tokony hoeritseretintsika?

• Manino ty famakia Baiboly sanandro noho ty fanaova fanompoa matetiky ro manampy antsika hanohitsy fakam-panahy?

5. Mahasoa antsika ty fitsipikini-Jehovah

VIDEO: Mahaiza Mandiniky Soa (9:31)

• Nanino mpamaraky iny ro nilitsy amy raha hitariky fakam-panahy ho azy?​—Henteo Ohabolana 7:8,  9.

• Raty ty vokatsini-fijangajangà laha hentea ty Ohabolana 7:23, 26. Ino iaby ty problemo tsy hahazo antsika mihintsy laha malio fandaisam-bata avao tsika fa tsy mijangajanga?

• Manino tsika ro afaky hahazo tavy ty fiaina zisiky farany laha malio fandaisam-bata avao?

Misy mieritseritsy hoe malay olo hifankatea ty Baiboly lafa mandrara ty lahilahy samby lahilahy na ty ampela samby ampela miaraky. Fe Ndranahary fitiava Jehovah, le teany laha mahazo tavy fiaina zisiky farany ty olo kiraidraiky. Tsy maintsy manaraky ty fitsipikiny zany tsika laha ta ho velo zisiky farany. Vakio 1 Korintianina 6:9-11, bakeo iaraho midiniky fanontanea toy:

• Ty lahilahy miaraky amy lahilahy na ty ampela miaraky amin’ampela avao va ro tsy teani-Jehovah?

Mila manao fiovà tsika iaby laha teantsika ty hampifalifaly ani-Jehovah. Matiantoky va tsika laha miezaky miova? Vakio Salamo 19:8, 11, bakeo iaraho midiniky fanontanea retoa:

• Mamehifehy va ty fitsipikini-Jehovah araky ty hevitsinao? Ino ty antony?

FAMINTINA

Fanomeza baka amy Jehovah ty firaisa, ka teany laha ampela noho lahilahy fa mpivaly ro manao azy.

Famerena

• Ino iaby ty tafilitsy amy hoe fijangajangà?

• Ino ty hanampy antsika hilay lavitsy ty fijangajangà?

• Ino ty soa ho azontsika laha manaraky ty fitsipikini-Jehovah tsika?

DINIHO KOA RETOA

Manino ro vatan-draha amy Jehovah ty hoe tokony ho mpivaly ara-dalàna ty lahilahy noho ampela mifankatea.

“Inona no Lazain’ny Baiboly Momba ny Tokantranomaso?” (Lahatsoratsy amy jw.org ao)

Mampirisiky antsika halay ty lahilahy miaraky amy lahilahy na ty ampela miaraky amin’ampela va ty Baiboly?

“Ratsy ve ny Firaisan’ny Samy Lehilahy na Samy Vehivahy?” (Lahatsoratsy amy jw.org ao)

Manino ro miaro antsika ty lalàna-Ndranahary mikasiky firaisa?

“Tena Firaisana ve ny Firaisana Amin’ny Vava?” (Lahatsoratsy amy jw.org ao)

Niaraky tamy lahilahy manahaky azy ty lahilahy raiky taloha. Fe ino ty nanampy azy hiova ka nanao raha mampifalifaly ani-Jehovah?

“Manova Olona ny Baiboly” (Ny Tilikambo Fiambenana 1 Aprily 2011)

Mieritseritsy ty ankamaroan’olo amy tany sisany hoe tsy ho sambatsy mihintsy ty olo raiky laha tsy manambaly. Fe tsy ze kila olo manambaly ro sambatsy. Misy koa olo tsy manambaly fe mahatiaro sambatsy. Volanini-Baiboly fa samby fanomeza baka amy Jehovah iaby ty hoe manambaly noho ty hoe tsy manambaly.

1. Ino ty tombony ho an’olo tsy manambaly?

Mivola ty Baiboly hoe: ‘Ze manambaly le manao soa, fa ze tsy manambaly le manao soa marerè.’ (Vakio 1 Korintianina 7:32, 33, 38.) Manino ty olo tsy manambaly ro volany hoe “manao soa marerè”? Satria tsy misy valy hokarakarà rozy ka mana fotoa noho hery hanaova raha maro. Afaky mampitombo soa ty fanompoan-drozy rozy, ohatsy hoe mifindra amy tanà hafa mba hitory ty vaovao soa. Toy ty tena vatan-draha, afaky manoka fotoa maro rozy mba hifandrambesa marìny amy Jehovah.

2. Ino ty tombony ho an’olo mpivaly ara-dalàna?

Manahaky olo tsy manambaly rey avao, le misy tombony koa azon’olo manambaly. Mivola ty Baiboly fa “soa ty roe tany ty raiky.” (Mpitoriteny 4:9) Tena mahatsapa an’io soa ty olo manambaly, sirtò ty mpivaly manoriky ty torolalani-Baiboly. Manao voady ty olo roe mpivaly ara-dalàna hoe hifankatea noho hifanaja zisiky farany. Vokany, milamy soa ty sain-drozy laha ohary amy mpivaly manao tokantranomaso. Milamin-tsay koa ty ajà lafa mahay hoe mpivaly ara-dalàna ty babany noho reniny.

3. Akory ty fiheverani-Jehovah ty fanambalea?

Lafa namoro ty fanambalea voalohany Jehovah, le hoy ty asany: “Ty lahilahy hiala amy ty babany noho reniny, ka hiharo amy ty valiny.” (Genesisy 2:24) Teani-Jehovah zany laha mifankatea noho miaraky mipetraky avao ty mpivaly laha mbo samby velo. Antony raiky avao ro azon-drozy isaraha, tsy ino zay fa ty fijangajangà. Laha nanao firaisa tamin’olo hafa ty valin’olo raiky, le afaky mifily ie hoe hisaraky amy valiny nijangajanga iny va, sa hanenga ty hadisoany.a (Matio 19:9) Tsy teani-Jehovah ty olo manambaly maro na mampirafy.​—1 Timoty 3:2.

DINIHO LALIKY

4. Ampiasao amy fomba soa ty fiainanao laha tsy manambaly iha

Fanomeza ty fahitani-Jesosy ty hoe tsy manambaly. (Matio 19:11, 12) Vakio Matio 4:23, bakeo iaraho midiniky fanontanea toy:

• Ino ty nataoni-Jesosy mba hampiasà amy fomba soa ty fiainany amy maha tsy manambaly azy?

Afaky ho sambatsy koa ty Kristiana tsy manambaly laha miezaky hanahaky ani-Jesosy. Alefaso VIDEO toy, bakeo iaraho midiniky fanontanea io.

VIDEO: Tsy Mivaliky Ndre Tsy Manambaly (3:11)

• Ino iaby ty raha azoni-Kristiana tsy manambaly atao?

Fa nihainao va?

Tsy volanini-Baiboly hoe firy tao ty olo raiky vo mahazo manambaly. Fe misy torohevitsy ao ahità hoe soa laha fa “lisatsy ty fotoa fivelarani-hatanorà” ty olo raiky vo manambaly. (1 Korintianina 7:36) Manjeky marè ty faniria ta hanao firaisa laha mbo tsy lisatsy fotoa io, ka mety hahavy ty tanora tsy hieritseritsy soa raha zay.

5. Filio soa ty olo ho valinao

Raiky amy fanapahan-kevitsy bevata horambesinao ty fifilia ze olo ho valinao. Vakio Matio 19:4-6, 9, bakeo iaraho midiniky fanontanea toy:

• Manino ty Kristiana ro tsy tokony halisa hanambaly?

Resahini-Baiboly hoe olo mana toetsy soa ro soa alà valy. Fa toy ty tena vatan-draha, mila tena tea ani-Jehovah ty olo eritseretinao ho valỳ.b Vakio 1 Korintianina 7:39 noho 2 Korintianina 6:14. Bakeo iaraho midiniky fanontanea retoa:

• Manino tsika ro tokony hanambaly Kristiana mitovy amintsika avao?

• Akory ty hevitsinao, ino ty tsapani-Jehovah laha manambaly olo tsy tea Azy tsika?

6. Miezaha hitovy hevitsy amy Jehovah amy resaky fanambalea

Tea tena ty lahilahy israelita sisany, le nisaraky tamy ty valiny. Vakio Malakia 2:13, 14, 16, bakeo iaraho midiniky fanontanea toy:

• Manino ro halani-Jehovah ty olo misaraky amy valiny nefa tsy nisy fijangajangà?

Alefaso VIDEO toy, bakeo iaraho midiniky fanontanea io.

VIDEO: Natao Haharitsy ty Fanambalea (4:30)

• Laha tsy manompo ani-Jehovah ty valinao, ino ty azonao atao mba ho sambatsy ty tokantranonareo?

7. Oriho ty fitsipikini-Jehovah mikasiky fanambalea

VIDEO: Afaky Manoriky ty Fitsipikini-Jehovah Mikasiky Fanambalea Iha (4:14)

Vakio Hebreo 13:4, bakeo iaraho midiniky fanontanea retoa:

• Akory ty hevitsinao, sarotsy va ty manoriky ty fitsipikini-Jehovah mikasiky fanambalea? Ino ty antony?

Teani-Jehovah laha misoratsy ara-dalàna ty mpivaly. Teany koa laha atao ara-dalàna lafa misy ty fisaraha. Mitaky ani-reo ty manam-pahefà amy tany maro. Vakio Titosy 3:1, bakeo iaraho midiniky fanontanea toy:

• Laha manambaly iha, azonao antoky va fa nisoratsy ara-dalàna nareo morovaly?

FAMINTINA

Samby fanomeza baka amy Jehovah iaby ty hoe manambaly noho ty hoe tsy manambaly. Samby mahasambatsy iaby reo laha ampiasà soa mba hanaova ty sitraponi-Jehovah.

Famerena

• Akory ty azon’olo tsy manambaly atao mba hampiasà soa ty fiainany?

• Manino ty Baiboly ro mivola fa tokony ho Kristiana mitovy amintsika avao ro valìntsika?

• Laha hentea ty Baiboly, le raha raiky avao ro ahafahani-mpivaly misaraky. Ino raha zay?

DINIHO KOA RETOA

Ino ty dikani-hoe manambaly “amy Tompo ao avao”?

“Fanontanian’ny Mpamaky” (Ny Tilikambo Fiambenana 1 Jolay 2004)

Hanampy anao hahay handramby fanapahan-kevitsy soa mikasiky fanambalea video roe reto.

Fiomana amy Fanambalea (11:53)

Manino ty rahalahy raiky ro nahatsapa hoe soa marè mandilatsy ty raha nafoiny ty raha nameani-Jehovah azy?

Nitamà Aho hoe Hianatsy Fahamarina koa Ie (1:56)

Ino iaby ty raha mila dinihin’olo raiky alohani-hanapahany hevitsy hoe hisaraky amy valiny va, sa ho tezitsy le hiala tse?

“Hajao ‘Izay Nampiraisin’Andriamanitra Zioga’” (Ny Tilikambo Fiambenana Desambra 2018)