FIANARA 51

Ino ty Azonao Atao mba Hampifalifaly ani-Jehovah ty Raha Volaninao?

Poziny vita printy

Nameani-Jehovah fanomeza soasoa tsika lafa niforoniny, tsy ino zay fa ty fahaizantsika mivola. Vatan-draha aminy va ty fomba fampiasantsika ani-fanomeza io? Eka, tena vatan-draha aminy! (Vakio Jakoba 1:26.) Ka ino ty azontsika atao mba hampifalifaly ani-Jehovah ty raha volanintsika?

1. Akory ty tokony hampiasantsika ty fahaizantsika mivola?

Mampirisiky antsika ty Baiboly hoe: “Miezaha ... hifampahery noho hifanampy avao.” (1 Tesalonianina 5:11) Mahay olo mila fampahereza va iha? Ino ty azonao atao mba hampahereza azy? Ameo toky ie hoe lafovily aminao. Azonao volany aminy, ohatsy, ty toetsy soa ananany. Misy andinin-teny hitanao hoe azo ampahereza olo raiky va? Maro ty andinin-teny azonao ifiliana. Tiarovo koa fa tsy ty raha volaninao avao ro misy vokany amin’olo, fa ty fomba ivolananao azy koa. Miezaha avao zany ho soa fanahy lafa miresaky.—Ohabolana 15:1.

2. Karazani-safà manao akory ro tsy tokony hovolanintsika?

Hoy ty Baiboly: “Ka engà hisy safà raty hiboaky amy ty vavanareo.” (Vakio Efesianina 4:29.) Midika zay fa tsy tokony hanompa tsika, na hivola raha mamparary fo olo. Tsy tokony hitsikotsiko na hanasara raha raty olo koa tsika.—Vakio Ohabolana 16:28.

3. Ino ty hanampy antsika hivola raha mampahery?

Matetiky ro hita amy ty raha volanintsika ty raha am-po noho an-tsaintsika any. (Lioka 6:45) Mila mianatsy mieritseritsy raha soa zany tsika, zany hoe ty raha tea-Ndranahary, raha malio, soasoa, noho raha evain-drengy. (Filipianina 4:8) Ho vitantsika ty hifantoky amy raha soa reo laha mahay mifily fialam-boly noho nama tsika. (Ohabolana 13:20) Hanampy antsika hiresaky raha soa koa ty mieritseritsy tse alohani-hivola. Mivola ty Baiboly hoe: “Mitsiboky manahaky sabatsy ty safà tsy voadiniky, fa ty safàni-hendry mahajanga.”—Ohabolana 12:18.

DINIHO LALIKY

Hodinihintsika ty raha azonao atao mba hampifalifaly ani-Jehovah noho hampahery olo ty raha volaninao.

4. Tandremo soa ty raha volaninao

Mivola raha anenenantsika tsika kindraiky. (Jakoba 3:2) Vakio Galatianina 5:22, 23, bakeo iaraho midiniky fanontanea retoa:

Aia amy toetsy reo ro azonao angatahy amy vavaky, mba hahavitànao mifehy ty raha volaninao? Manino toetsy reo ro afaky manampy anao?

Vakio 1 Korintianina 15:33, bakeo iaraho midiniky fanontanea toy:

Misy vokany amy ty fomba fivolananao ty namanao noho ty fialam-boly ataonao. Ino ohatsy ty mety ho vokany?

Sary maromaro: Raha mahavy ty lahilahy raiky lasa hasiaky amy valiny. 1. Mijanjy hira raty ie. 2. Mafana fo marè manenty fandahara bôksa amy tele miaraky amy ty namany. — Ino ty raha mety hisy vokany amy ty fomba fivolanantsika?

Sary maromaro: Raha mahavy ty lahilahy raiky ho soa fanahy amy valiny lafa mivola. 1. Mamaky Baiboly ie. 2. Miresaky amy naman-drozy amy Efitrano Fanjakà any rozy morovaly. — Ino ty raha mety hisy vokany amy ty fomba fivolanantsika?

Vakio Mpitoriteny 3:1, 7, bakeo iaraho midiniky fanontanea toy:

Amy fotoa manao akory ro mety ho soa ty tsy mivola, na mandiny fotoa mety mba hivolana raha raiky?

5. Miresaha raha soa mikasiky ty hafa

Ino ty hanampy antsika tsy hanambany na hanaraty olo? Alefaso VIDEO toy, bakeo iaraho midiniky fanontanea reo.

VIDEO: Manaova “Safà Soa ho Fampahereza” (4:07)

Manino rahalahy tamy video tao iny ro ta hanova ty raha volaniny mikasiky ty hafa?
Ino ty nataony mba hampiova azy?

Vakio Mpitoriteny 7:16, bakeo iaraho midiniky fanontanea toy:

Ino ty tokony hotiarovintsika lafa manaly ta hiresaky raha raty mikasiky ty hafa tsika?

Vakio Mpitoriteny 7:21, 22, bakeo iaraho midiniky fanontanea toy:

Manino andinin-teny io ro afaky manampy anao tsy hasiaky lafa misy olo miresaky raha raty mikasiky anao?

6. Miezaha ho soa fanahy lafa miresaky amy fianakavianao

Teani-Jehovah ho soa fanahy noho be fitiava tsika lafa miresaky amy fianakaviantsika. Alefaso VIDEO toy, bakeo iaraho midiniky fanontanea io.

VIDEO: Miharo Raiky ty Fianakavia Lafa Mifankatea Noho Mifanaja (3:08)

Ino ty hanampy anao ho soa fanahy lafa miresaky amy fianakavianao?

Vakio Efesianina 4:31, 32, bakeo iaraho midiniky fanontanea toy:

Ino ty azontsika atao lafa miresaky amy fianakaviantsika mba hahatsapan-drozy hoe teantsika rozy?

Nasehoni-Jehovah tamy ty raha nivolaniny fa tea ani-Jesosy Anany ie. Vakio Matio 17:5, bakeo iaraho midiniky fanontanea toy:

Akory ty ampisehoanao hoe manahaky ani-Jehovah iha lafa miresaky amy fianakavianao?

Ampela raiky midera ty anakampelany kelikely satria nahavita sary. — Milà fomba mba hiderà olo amy ty raha soa nataony

MIERITSERITSY TY OLO SISANY HOE: “Zaho aloha ze an-tsaiko avao volaniko, fa tsy ivakiako loha ze fandrambesan’olo azy.”

Mitovy hevitsy amy zay koa va iha? Ino ty antony?

FAMINTINA

Misy vokany amin’olo ty resaky ataontsika. Mila eritseretintsika soa zany ty raha hovolanintsika, ty fotoa hivolanantsika noho ty fomba hivolanantsika azy.