FIANARA 28

Ankasitraho ty Raha Nataoni-Jehovah Noho Jesosy ho Anao

Poziny vita printy

Ino ty tsapanao laha nahazo fanomeza soasoa baka amy namanao iha? Azo antoky hoe tena nifalifaly iha, le teanao hatoro ani-namanao iny hoe ankasitrahanao fanomeza iny. Nanome fanomeza farani-ze soa ho antsika Jehovah noho Jesosy. Ino raha zay? Le akory ty ampisehoantsika fankasitraha azy?

1. Ino ty azontsika atao mba hampisehoa hoe ankasitrahantsika ty raha natao-Ndranahary noho Kristy ho antsika?

Mampitamà ty Baiboly hoe: “Ze mampiseho finoa [ani-Jesosy]” le ho velo zisiky farany. (Jaona 3:16) Ino ty dikani-hoe mampiseho finoa? Tsy ampy avao ty mivola hoe mino ani-Jesosy. Mila asehontsika amy ty raha filintsika noho ataontsika hoe manam-pinoa vatany tsika. (Jakoba 2:17) Ho mpinama marè amy Jesosy noho Jehovah Babany tsika, laha asehontsika amy ty raha ataontsika noho volanintsika ty finoantsika.—Vakio Jaona 14:21.

2. Ino ty fotoa bevata azontsika ampisehoa hoe ankasitrahantsika ty raha nataoni-Jehovah noho Jesosy ho antsika?

Tamy haliky talohani-nahafatesani-Jesosy iny, le nivola fomba hafa azoni-mpianatsiny reo ampisehoa fankasitraha ty soro nataony ie. Nivolaniny rozy mba hivory le hanao fankalazà manoka kaihini-Baiboly hoe “Sakafo Harivani-Tompo”, na koa hoe Fahatiarova ty nahafatesani-Kristy. (1 Korintianina 11:20) Teani-Jesosy ho tiaroni-apostoly rey noho ty Kristiana iaby hoe nanome ty ainy ho antsika ie. Ho zao ty didy nameany: “Anovo avao ty manahaky ani-zao ho fahatiarova ahy.” (Lioka 22:19) Laha manatriky Fahatiarova iha, le mampiseho hoe ankasitrahanao ty fitiavani-Jehovah noho Jesosy antsika.

DINIHO LALIKY

Hodinihintsika ty fomba azontsika ampisehoa hoe ankasitrahantsika ty fitiavani-Jehovah noho Jesosy antsika. Hohenteantsika koa ty maha vatan-draha ty Fahatiarova ty nahafatesani-Kristy.

3. Akory ty ampisehoantsika hoe mahay mankasitraky tsika?

Eritsereto hoe fa ho nandesin-drano iha, fe nisy olo raiky nanavotsy anao. Ho halinonao va ty raha nataon’olo iny ho anao? Sa hila fomba iha mba hisaora azy amy raha zay?

Fa tsy ho niavotsy tsika, laha tsy nanao raha Jehovah. Vakio 1 Jaona 4:8-10, bakeo iaraho midiniky fanontanea retoa:

Manino ro fanomeza miavaky ty soro nataoni-Jesosy?
Ino ty tsapanao lafa mandiniky ty raha nataoni-Jehovah noho Jesosy ho anao iha?

Ino ty azontsika atao mba hampisehoa hoe mankasitraky ty raha nataoni-Jehovah noho Jesosy ho antsika tsika? Vakio 2 Korintianina 5:15 noho 1 Jaona 4:11; 5:3. Lafa vita vaky ty andinin-teny kiraidraiky, le iaraho midiniky fanontanea toy:

Laha hentea andinin-teny io, akory ty ampisehoantsika hoe mahay mankasitraky tsika?

4. Tahafo Jesosy

Mampiseho ty fankasitrahantsika koa tsika laha miezaky manahaky ani-Jesosy. Vakio 1 Petera 2:21, bakeo iaraho midiniky fanontanea toy:

Ino ty azonao atao mba hanaraha marìny ty liani-Jesosy?

Jesosy mamaky ty Safà-Ndranahary amy boky mihoro. — Tea ty Safà-Ndranahary Jesosy, nitory ty vaovao soa ie, le nanampy ty hafa

Jesosy miresaky amy ampela samaritanina amy vovo eo. — Tea ty Safà-Ndranahary Jesosy, nitory ty vaovao soa ie, le nanampy ty hafa

5. Mamonjea Fahatiarova ty nahafatesani-Kristy

Nanao akory ty fankalazà voalohany ty Sakafo Harivani-Tompo? Vakio Lioka 22:14, 19, 20. Bakeo iaraho midiniky fanontanea retoa:

Ino ty niseho tamy Sakafo Harivani-Tompo io?
Mampiseho ino mofo noho divay rey? (Henteo ty andininy 19, 20.)

Teani-Jesosy hankalaza ty Sakafo Harivani-Tompo indraiky santao ty mpianatsiny, zany hoe saky avy ty andro mifanandrify amy nahafatesany iny. Miaraky mivory ty Vavolombeloni-Jehovah santao mba hankalaza ty fahatiarova ty nahafatesani-Kristy. Manoriky soa ty modely nengani-Jesosy rozy lafa manao ani-raha zay. Alefaso VIDEO miresaky mikasiky ani-fotoa bevata io, le iaraho midiniky fanontanea io:

VIDEO: Tiarovo ty Nahafatesani-Jesosy (1:41)

Sary baka amy video hoe ‘Tiarovo ty Nahafatesani-Jesosy.’ Vavolombeloni-Jehovah miaraky mivory mba hankalaza ty Sakafo Harivani-Tompo.

Ino ty atao lafa manao Fahatiarova?

Finga misy mofo tsy misy levira noho vera misy divay.

Mifanandrify amy vatani-Jesosy lavorary natao soro ho antsika mofo iny. Le divay iny mifanandrify amy ty liony

Olo mifanolotsy divay amy Sakafo Harivani-Tompo.

MIERITSERITSY TY OLO SISANY HOE: “Lafa mino ani-Jesosy iha, le fa mahazo fanavota.”

Akory ty azonao ampiasà ty Jaona 3:16 noho Jakoba 2:17 mba hampisehoa hoe misy raha hafa mila atao koa?

FAMINTINA

Asehontsika hoe mankasitraky ty raha nataoni-Jesosy ho antsika tsika, laha mampiseho finoa azy noho manatriky ty Fahatiarova ty nahafatesany.

Famerena

Ino ty dikani-hoe mampiseho finoa ani-Jesosy?
Ino ty teanao hatao mba hampisehoa hoe mankasitraky ty raha nataoni-Jehovah noho Jesosy ho anao iha?
Manino ro tena vatan-draha ty mamonjy Fahatiarova ty nahafatesani-Kristy?

Daty nahavita ani-fianara toy:

Raha kendrè

Mamonjea Fahatiarova ty nahafatesani-Kristy. Anontaneo ty olo mampianatsy Baiboly anao hoe ombia ty hanaova ani-raha zay, le sorato amy kalendrienao ao.

Raha hafa:

Raha hafa kendrènao

DINIHO KOA RETOA

Manosiky anao hanao ino ty nahafatesani-Kristy?

Nampiasàny Hiderà ani-Jehovah ty Vatany (9:28)

Ino ty atao hoe finoa, le ino ty azontsika atao mba hampisehoa hoe manam-pinoa tsika?

“Asehoy hoe Tena Mino ny Fampanantenan’i Jehovah Ianao” (Ny Tilikambo Fiambenana Oktobra 2016)

Ino ty vokany lafa nametsivetsy ty soroni-Jesosy ty ampela raiky?

“Manova Olona ny Baiboly” (Ny Tilikambo Fiambenana 1 Aogositra 2011)

Manino ro vitsivitsy avao ty mino noho mihina amy mofo noho divay amy Fahatiarova rey?

“Nahoana no Tsy Mitovy Amin’ny An’ny Fivavahana Hafa ny Fomba Ankalazan’ny Vavolombelon’i Jehovah ny Sakafo Harivan’ny Tompo?” (Lahatsoratsy amy jw.org ao)