FIANARA 09
Hampifankarìny Anao amy Ndranahary ty Vavaky
Nisy fotoa va iha nahatsapa hoe mila tari-dala? Ta hahazo fanampea va iha lafa misy raha manahira anao? Teanao va laha mba misy olo mampahery noho manome toky anao? Mba ta hifankarìny amy Jehovah va iha? Afaky manampy anao amy raha iaby reo ty vavaky. Fe akory ty atao lafa mivavaky? Mijanjy ty vavaky iaby va Ndranahary? Ino ty azonao atao laha teanao hijanjy ty vavakinao ie? Ndao hovaleantsika fanontanea reo.
1. Ia ty tokony hivavahantsika, le ino ty azontsika resahy lafa mivavaky?
Nivola Jesosy hoe tokony hivavaky amy Babantsika an-danitsy any iny avao tsika lafa mivavaky. Hoy ty asany: “Mivavaha ho zao nareo: ‘Babanay an-danitsy any ...’” (Matio 6:9) Lafa mivavaky amy Jehovah tsika, le vomaiky hifankarìny aminy.
Azontsika angatahy amy vavaky iaby ze raha mifanaraky amy ty sitrapo-Ndranahary. Hamaly ty vavakintsika ie amy zay. Hoy ty Baiboly: “Ndre ino ndre ino angatahintsika, ka mifanaraky amy ty sitrapony, le mijanjy antsika ie.” (1 Jaona 5:14) Nivolanini-Jesosy ty raha sisany azontsika resahy amy vavaky. (Vakio Matio 6:9-13.) Afaky mivavaky mikasiky ty raha mampiasa loha antsika tsika. Fe tsy tokony hohalinontsika ty hisaotsy azy amy ty raha fa nataony ho antsika. Tokony hivavaky koa tsika mba hanampeany ty olo hafa.
2. Akory ty atao lafa mivavaky?
Mampirisiky antsika ty Baiboly mba ‘hampiboraky ty am-pontsika ao amy Ndranahary.’ (Salamo 62:8) Tokony ho baka am-po zany ty vavaky ataontsika. Tsy voatery mampiboaky feo tsika, fa afaky mivola an’eritseritsy avao. Tsy voatery mandohaliky, ohatsy, tsika lafa mivavaky na manao fihetsiky hafa, fa mila manaja avao. Afaky mivavaky tsika ndre aia ndre aia noho ndre ombia ndre ombia.
3. Akory ty amaleani-Jehovah ty vavaky ataontsika?
Maro ty fomba anaovany ani-zay. Nameani-Jehovah antsika ty Safàny, le ao matetiky ro ahitantsika ty valini-fanontanea manahira antsika. “Mahahendry ani-ze mbo tsy nandia fiaina” ty famakia ty Safà-Ndranahary. (Salamo 19:7; vakio Jakoba 1:5.) Manampy antsika hilamin-tsay Jehovah lafa miatriky raha sarotsy tsika. Mety hampiasa ty mpanompony koa ie mba hanampea antsika amy fotoa tena ilàntsika azy.
DINIHO LALIKY
Diniho hoe ino ty azonao atao mba hijanjina-Ndranahary ty vavaky ataonao, le ino ty soa ho azonao lafa mivavaky.
4. Misy vavaky tsy janjini-Ndranahary
Vavaky manao akory ro janjini-Ndranahary, le manao akory ty tsy janjininy? Alefaso VIDEO toy.
Teani-Jehovah hivavaky aminy tsika. Vakio Salamo 65:2, le iaraho midiniky fanontanea retoa:
Akory ty hevitsinao, teani-“Mpijanjy vavaky” iny va laha mivavaky aminy iha? Ino ty antony?
Mila miay mifanaraky amy fitsipiki-Ndranahary tsika, laha teantsika hojanjininy ty vavakintsika. Vakio Mika 3:4 noho 1 Petera 3:12, le iaraho midiniky fanontanea toy:
Ino ty tokony hataontsika laha teantsika hojanjini-Ndranahary ty vavakintsika?
Lafa misy aly, le samby mivavaky maramila hialy rey mba handresy. Hamaly ty vavaky manahaky ani-zay va Ndranahary?
5. Tokony ho baka am-po ty vavaky ataontsika
Nampianary hanao vavaky tsianjery ty olo sisany. Tea-Ndranahary hanao ho zay va tsika? Vakio Matio 6:7, le iaraho midiniky fanontanea toy:
Ino ty azonao atao mba tsy hampimpoly “raha mitovy avao” iha lafa mivavaky?
Sanandro iha, afaky mieritseritsy raha raiky nataoni-Jehovah ho anao, bakeo isaoro ie amy fitahia nameany zay. Laha manao ani-zay iha anatini-herinandro, le fa fito zay ty raha azonao resahy amy Jehovah. Tsy mampimpoly raha mitovy avao iha amy zay.
Teani-baba raiky laha miresaky ty raha baka am-pony any ty anakiny lafa miresaky aminy. Teani-Jehovah koa tsika laha miresaky ty raha am-pontsika any lafa mivavaky
6. Fanomeza baka amy Ndranahary ty vavaky
Manino ty vavaky ro afaky manampy antsika, sirtò lafa misy problemo tsika? Alefaso VIDEO toy.
Mivola ty Baiboly hoe afaky manampy antsika hilamin-tsay ty vavaky. Vakio Filipianina 4:6, 7, le iaraho midiniky fanontanea retoa:
Tsy voatery ho afaky ty problemo mahazo antsika lafa tsika mivavaky. Fe manino ro volany hoe manampy antsika ty vavaky?
Ino zao ty raha mba teanao horesahy amy vavaky?
Fa nihainao va?
Ty safà hoe “amena” le midika hoe “ho tanteraky vatany zay” na “ho tò vatany zay.” Fa liany ela ty olo ro nanono hoe “amena” afarani-vavaky.—1 Tantara 16:36.
7. Manokàna fotoa hivavaha
Sahira marè tsika kindraiky, ka halinontsika iaby ndre ty mivavaky. Vatan-draha tamy Jesosy va ty vavaky? Vakio Matio 14:23 noho Marka 1:35, le iaraho midiniky fanontanea retoa:
Akory ty nataoni-Jesosy mba hanokàna fotoa hivavaha?
Saky ino ty fotoa hitanao hoe ahafahanao mivavaky?
MIERITSERITSY TY OLO SISANY HOE: “Tsy mamaly vavaky zao Ndranahary.”
Akory ty hamaleanao ani-zay?
FAMINTINA
Manjary mifankarìny amy Ndranahary tsika lafa mivavaky baka amy ty fontsika. Manampy antsika hilamin-tsay noho hanoriky ty safàni-Jehovah koa ty vavaky.
Famerena
Ia ty tokony hivavahantsika?
Akory ty atao lafa mivavaky?
Ino ty soa ho azontsika lafa mivavaky tsika?
DINIHO KOA RETOA
Ilao ato ty valini-fanontanea fapetrakin’olo mikasiky vavaky.
“Zavatra Fito Tokony ho Fantatrao Momba ny Vavaka” (Ny Tilikambo Fiambenana 1 Oktobra 2010)
Diniho hoe manino iha ro tokony hivavaky, le akory ty azonao anasoava ty vavaky ataonao.
“Nahoana Aho no Tokony Hivavaka?” (Lahatsoratsy amy jw.org ao)
Laha hentea ty Baiboly, ia ty tokony hivavahantsika?
“Tokony Hivavaka Amin’ny Olo-masina ve Aho?” (Lahatsoratsy amy jw.org ao)
Henteo amy hira toy fa afaky mivavaky avao tsika ndre aia ndre aia, ndre ombia ndre ombia.