Ino ty Hanampy ani-Mpianatsy Baiboly rey ho Avy amy Batisa? —Fizarà Faharoe

1. Akory ty ahaizantsika hoe manavotsy ain’olo ty asa fanaova mpianatsy?

MANAVOTSY ain’olo ty asa fanaova mpianatsy! Akory ty ahaizantsika ani-zay? Lafa nanome ani-didy amy Matio 28:19, 20 ao iny Jesosy, le nivola hoe: “Mandehana, anovo mpianatsy ty olo ..., ka anovo batisa.” Manino moa ro tena ilà ty batisa? Satria tsy maintsy atao batisa tsika laha teantsika ty hahazo fanavota. Tokony hino ze olo maniry hatao batisa hoe afaky hahazo fanavota ie satria fa nimaty ho antsika Jesosy sady fa nivelomy ndraiky. Zay ro nahavy ani-apostoly Petera hivola amy Kristiana namany rey hoe: “Manavotsy anareo koa henanizao ty batisa ... amy alalani-nameloma ani-Jesosy Kristy tamy maty.” (1 Pet. 3:21) Ka lafa atao batisa ty mpianatsy vaovao raiky, le afaky mitamà ie hoe ho velo zisiky farany.

2. Tokony ho mpampianatsy manao akory tsika laha hentea ty 2 Timoty 4:1, 2?

² Tokony “hahay hampianatsy” tsika lafa manao mpianatsy. (Vakio 2 Timoty 4:1, 2.) Ino ty antony? Satria nandidy antsika Jesosy hoe: “Mandehana, anovo mpianatsy ty olo ... Ampianaro rozy.” “Mahareta” amy asa io hoasani-apostoly Paoly, “satria laha manao ani-zay iha, le hanavotsy ty vatanao noho ze mijanjy anao.” Mety soa zany laha nivola Paoly hoe: “Ambeno soa ... ty fampianaranao.” (1 Tim. 4:16) Satria mila mampianatsy olo tsika lafa manao mpianatsy, le teantsika ho soa biby ty fampianarantsika.

3. Ino ty hodinihintsika amy lahatsoratsy toy ato mikasiky fitariha fampianara Baiboly?

³ Mampianatsy Baiboly olo an-tapitrisany amy tany toy iaby tsika. Fe teantsika ho hay hoe akory ty ahafahantsika manampy ty maro amin-drozy mba hanjary mpianatsini-Jesosy Kristy vita batisa. Zay ty nidinihintsika tamy lahatsoratsy taloha tao. Fa amy lahatsoratsy toy ato, le ho hitantsika ty raha limy hafa mila ataoni-mpampianatsy mba hanampea ty mpianatsiny handroso ho amy batisa.

ENGAHO TY BAIBOLY HAMPIANATSY AZY

4. Manino ty mpampianatsy ro tsy tokony ho be resaky lafa mitariky fampianara Baiboly? (Henteo koa ty fanamariha ambany pejy.)

⁴ Teantsika ty raha ampianarintsika baka amy Safà-Ndranahary ao. Manaly ta hiresaky raha maro marè amy zay tsika kindraiky. Fe ndre amy Fianara Tilikambo, Fianara Baiboly ataoni-Fiangona, na fampianara Baiboly atao an-trano, le tsy tokony ho be resaky ty mpitariky. Ty Baiboly ro engany hampianatsy, ka mila mifehy ty vatany ie mba tsy hanazava ani-ze raha iaby hainy mikasiky ani-andinin-teny raiky na foto-kevitsy raiky.b (Jaona 16:12) Eritsereto hoe manao akory ty hamaroni-raha nihainao amy Baiboly ao tamin’iha vo natao batisa laha ampitovizy amy henanizao. Mety ho fampianara fototsy rey avao ty nihainao tamy zay. (Heb. 6:1) Nianatsy an-taony maromaro iha vo nahay ani-raha hainao henanizao reo. Ka soa laha miezaky iha mba tsy hampianatsy raha maro indraiky mandeha ani-mpianatsy vaovao iny.

5. a) Laha hentea ty 1 Tesalonianina 2:13, ino ty teantsika ho azon’olo ampianarintsika mikasiky ty raha ianarany? b) Akory ty azontsika ampirisiha ani-mpianatsy iny mba hiresaky mikasiky ty raha ianarany?

⁵ Teantsika ho azon’olo ampianarintsika iny hoe baka amy Safà-Ndranahary ao ty raha ianarany. (Vakio 1 Tesalonianina 2:13.) Akory ty anaovantsika ani-zay? Ampirisiho mpianatsy iny mba hiresaky mikasiky ty raha ianarany. Ka mieritseritsy hoe tsy maintsy iha avao ro manazava andinin-teny amy mpianatsy iny, fa mba engaho koa ie hanazava aminao. Ampeo ie hahita hoe akory ty azony anoriha ty Safà-Ndranahary. Lafa baka namaky andinin-teny ie, le mametraha fanontanea mifampitohy na fanontanea ahaiza ty am-pony noho an-tsainy ao. (Lioka 10:25-28) Anontaneo, ohatsy, ie hoe: “Manino andinin-teny io ro nanampy anao hahita ty toetsini-Jehovah?” “Ino ty azonao atao mba hahasoa anao raha volanini-Baiboly io?” “Manao akory ty fahitanao ani-raha nianaranao iny?” (Ohab. 20:5) Tsy voatery hahay raha maro biby mpianatsy iny, fa ty vatan-draha le hoe teany noho orihiny ze raha hainy.

6. Manino ro soa ty miaraky amy mpitory mahay mampianatsy lafa mampianatsy Baiboly?

⁶ Fa nisy fotoa va iha niaraky nampianatsy Baiboly amin’olo mahay mampianatsy? Laha zay, le azonao atao ty manontany azy hoe manao akory ty fahitany ty fomba fampianaranao noho fampiasanao Baiboly. Tsy maintsy miambany iha laha teanao hihasoa ty fahaizanao mampianatsy. (Ampitovizo amy Asa. 18:24-26.) Bakeo anontaneo mpitory iny hoe mahatakatsy soa ty raha ianarany va ty fahitany ani-mpianatsy iny. Azonao angatahy koa ie mba hitariky ani-fianara iny laha tsy ho eo iha anatini-herinandro raiky na maromaro. Tsy ho tapatapaky fianara iny amy zay, sady ho hitani-mpianatsy iny hoe vatan-draha ty fianara ataony. Ka mieritseritsy mihintsy hoe “ahinao” fampianara io ka tsy misy olo hafa tokony hitariky azy. Azo antoky fa mila ani-ze hahasoa ani-mpianatsy iny iha, amy zay hitohy avao ty fianarany fahamarina.

ASEHÒ HOE TEANAO NOHO INOANAO TY RAHA AMPIANARINAO

7. Ino ty hanampy ani-mpianatsy iny ho tea ty raha ianarany?

⁷ Mila hitani-mpianatsy iny hoe teanao noho inoanao ty raha ampianarini-Baiboly. (1 Tes. 1:5) Vomaiky ho teany ty raha ianarany amy zay. Laha mety, le resaho aminy hoe manino ro nanampy anao manoka ty fanoriha ty torolalani-Baiboly. Ho hainy amy zay hoe misy tari-dala azo orihy mahasoa azy koa ty amy Baiboly ao.

8. Ino koa ty azonao atao mba hanampea mpianatsy Baiboly, le manino iha ro manao ani-zay?

⁸ Lafa mianatsy Baiboly nareo, le resaho amy mpianatsinao iny ty tantarani-rahalahy noho anabavy niatriky raha sarotsy manahaky ty mahazo azy fe nahavita nandresy ani-raha rey. Azonao atao koa ty manday olo baka amy fiangona ao mety afaky manampy azy. Na milà tantara mampahery amy jw.org ao, amy lahatsoratsy mifampitohy hoe “Manova Olo ty Baiboly.”c Hanampy ani-mpianatsinao iny lahatsoratsy noho video rey mba hahita hoe mahasoa ty manoriky ty torolalani-Baiboly amy fiainany.

9. Ino ty azonao atao mba hampirisiha mpianatsy Baiboly hiresaky ty raha ianarany amy ty fianakaviany noho ty namany?

⁹ Laha manambaly mpianatsy iny, mianatsy Baiboly koa va valiny io? Laha tsy mianatsy ie, le asao mba hiaraky mianatsy aminareo. Ampirisiho mpianatsinao iny hiresaky ty raha ianarany amy ty fianakaviany noho ty namany. (Jaona 1:40-45) Amy fomba akory? Mety ho azonao atao ty manontany azy hoe: “Akory ty hanazavanao ani-hevitsy io amy ty fianakavianao?” na “Ino ty andinin-teny azonao ampiasà mba hanaporofoa ani-zay amy ty namanao?” Hampiofana ani-mpianatsy iny ho lasa mpampianatsy iha amy zay. Ka lafa mahafeno fepetra ie, le afaky manomboky mitory miaraky amy fiangona. Anontaneo ie laha mahay olo ta hianatsy Baiboly. Laha misy, le avy le miresaha amin’olo iny bakeo asao hianatsy Baiboly ie. Atorò azy ty video hoe Ino ty Atao Lafa Mianatsy Baiboly?d

AMPEO MPIANATSY INY MBA HANA NAMA AMY FIANGONA EO

10. Laha hentea ty 1 Tesalonianina 2:7, 8, akory ty azoni-mpampianatsy anahafa ty modelini-Paoly?

¹⁰ Tokony hasehoni-mpampianatsy iny hoe midary ani-mpianatsiny iny vatany ie. Tiarovo hoe mety hanjary rahalahy na anabavinao ara-panahy rozy afarafara ao. (Vakio 1 Tesalonianina 2:7, 8.) Tsy mora amin-drozy ty miala amy naman-drozy amy tontolo toy eto sady manao ze fanovà iaby ilà mba hanompoa ani-Jehovah. Mila ampeantsika rozy mba hahita nama anivoni-fiangona eo. Minamà amy mpianatsinao iny ka manokana fotoa hiaraha aminy, tsy lafa hianatsy Baiboly avao fa amy fotoa hafa koa. Kaiho ie, andefaso mesazy, na vangio anelanelani-fotoa ianaranareo rey. Asehonao amy zay hoe midary azy vatany iha.

11. Ino ty raha teantsika ho hitani-mpianatsintsika rey amy fiangona eo, le ino ty antony?

¹¹ Misy fomba fivolana zay manao ho zao hoe: “Mila olo tanà raiky vo maha be ajà raiky.” Fa tsika manao ho zao hoe: “Mila olo fiangona raiky vo mahavita manao mpianatsy olo raiky.” Farany miezaky ty mpampianatsy mahay mba hampifankazatsy ani-mpianatsiny iny amin’olo amy fiangona eo, satria hisy vokany soa aminy raha zay. Ho teani-mpianatsy iny amy zay ty miaraky amy vahoaki-Ndranahary, satria manampy azy hifandramby soa amy Jehovah rozy sady mampahery azy lafa misy raha manahira. Teantsika mpianatsy iny mba hahatsapa hoe anatini-fianakavia ara-panahy mifankatea ie. Ho moramora aminy amy zay ty hampijano ty fiarahany amin’olo tsy hanampy azy ho tea ani-Jehovah rey. (Ohab. 13:20) Laha mihatakataky aminy namany taloha rey, le fa ho hainy hoe afaky mahita tena nama ie amy fandaminani-Jehovah ao.​—Mar. 10:29, 30; 1 Pet. 4:4.

MIRESAHA SOA MIKASIKY TY FANOKANAM-BATA NOHO BATISA

12. Manino ro tokony horesahintsika amin’olo ampianarintsika ty mikasiky ty fanokanam-bata noho batisa?

¹² Tokony horesahinao matetiky hoe manino ty olo raiky ro tena mila manoka ty fiainany ho ani-Jehovah noho atao batisa. Sady hanampy olo hanjary mpianatsy vita batisa zay mihintsy moa ty raha kendrentsika. Ka laha nianatsy Baiboly tsy tampaky tanatini-vola vitsivitsy mpianatsy iny sady nanomboky nanatriky fivoria, le tokony ho azony hoe ty hanampy azy hanomboky hanompo ani-Jehovah amy maha Vavolombelony ro raha kendreni-fianara Baiboly.

13. Ino iaby ty raha hataoni-mpianatsy raiky mba hiaviany amy batisa?

¹³ Maniry hatao batisa amy zay mpianatsy iny! Farany ie mandroso tsikelikely, manao ani-raha manaraky retoa: Voalohany, mila mahay ani-Jehovah noho tea azy mpianatsy iny, sady mampiseho finoa Azy. (Jaona 3:16; 17:3) Bakeo, mila mifandramby marìny amy Jehovah noho amy fiangona ie. (Heb. 10:24, 25; Jak. 4:8) Miala amy ze fahazaran-draty nananany ie afarani-zay, le mibebaky amy ty fahotany. (Asa. 3:19) Anatini-fotoa zay, le handrisiky azy hizara ty fahamarina amin’olo hafa ty finoany. (2 Kor. 4:13) Hanokam-bata ho ani-Jehovah ie amy farany, le hampiseho ani-zay amy alalani-batisa. (1 Pet. 3:21; 4:2) Tena hahafalifaly vatany fotoa zay! Derao mpianatsy iny saky misy raha raiky vitany mba hiavia amy batisa. Ampaherezo ie mba hanohy handroso avao.

MIEZAHA HAHARAKY TY FANDROSOANI-MPIANATSY INY

14. Ino ty azoni-mpampianatsy iny atao mba ho arakiny ty fandrosoani-mpianatsy iny?

¹⁴ Mila manam-pahareta tsika lafa manampy mpianatsy handroso zisiky amy fanokanam-bata noho batisa. Fe mila henteantsika koa laha tena maniry hanompo ani-Jehovah Ndranahary ie. Asehoni-mpianatsy iny va hoe miezaky hanoriky ty didini-Jesosy ie? Sa teany ho hay avao ty raha volanini-Baiboly?

15. Ino iaby ty tokony hohenteani-mpampianatsy iny amy mpianatsiny iny?

¹⁵ Diniho tsy tampaky ty fandrosoani-mpianatsy iny. Miresaky ty fihetseham-pony mikasiky ani-Jehovah va, ohatsy, ie? Mivavaky amy Jehovah va ie? (Sal. 116:1, 2) Tea mamaky Baiboly va ie? (Sal. 119:97) Manatriky fivoria tsy tampaky va ie? (Sal. 22:22) Manao ze fanovà ilà va ie mba hampisehoa hoe orihiny ty raha ianarany? (Sal. 119:112) Fa nanomboky nizara ty raha ianarany amy ty fianakaviany noho ty namany va ie? (Sal. 9:1) Fa ty tena vatan-draha, le hoe tena maniry hanjary Vavolombeloni-Jehovah va ie? (Sal. 40:8) Laha tsy manao fandrosoa amy lafiny reo mpianatsy iny, le iezaho hentea hoe ino ty antony bakeo miresaha aminy, fe miezaha ho soa fanahy lafa manao ani-zay.e

16. Ombia ro tokony hajano ty fianaran’olo raiky?

¹⁶ Diniho kindraindraiky laha mbo tokony hampianary avao ty mpianatsinao. Eritsereto hoe: ‘Tsy manoma fianara va ie? Tsy tea mivory va ie? Mbo mana fahazara raty avao va ie? Mbo tsy niala amy fivavahan-diso va ie?’ Laha eka ty valini-fanontanea reo, mbo hanohy hampianatsy azy avao va iha? Laha zay ty ataonao, le sahala miezaky mampianatsy milano olo raiky iha kanefa ie tsy ta ho len-drano! Laha tsy tena tea ty raha ianarany mpianatsy iny sady tsy parè hanao fiovà, manino laha ajano?

17. Laha hentea ty 1 Timoty 4:16, ino ty tokony hataoni-mpampianatsy Baiboly iaby?

¹⁷ Vatan-draha amintsika ty andraikitsintsika hoe manao mpianatsy, sady teantsika ty hanampy ty olo ampianarintsika handroso ho amy batisa. Zay ty antony mahavy antsika mampiasa Baiboly lafa mampianatsy, le asehontsika hoe teantsika noho inoantsika ty raha ampianarintsika. Ampirisihintsika hana nama amy fiangona eo mpianatsy iny. Resahintsika soa aminy ty mikasiky fanokanam-bata noho batisa, le dinihintsika ty fandrosoany. (Henteo ty efajoro hoe “Mila Manao Ino Iha mba ho Avy amy Batisa ty Mpianatsinao?”) Falifaly tsika fa afaky mandramby anjara amy asa manavotsy ay toy! Loniky lahy tsika ho tapa-kevitsy hanao ze azontsika atao mba hanampea ty olo ampianarintsika hahafeno fepetra ho amy batisa.