FIANARA 03
Azonao Atokisa va fa Marina ty Raha Volanini-Baiboly?
Mampitamà raha maro antsika ty Baiboly sady manome torohevitsy sankarazany. Mety teanao ho hay ty raha ampianariny, fe mety tsy atokisanao koa. Azonao atokisa va fa marina ty torohevitsy noho fampitamana amy boky fa ela biby io ao? Mivola ty Baiboly hoe afaky hahazo tavy ty fiaina tsika ndre henanizao ndre amy hoavy. Azo inoa avao va zay? Olo an-tapitrisany ro mino ani-zay. Ndao hohenteantsika hoe afaky mino ani-zay koa va iha.
1. Tena marina va tantara amy Baiboly ao reo?
Ty Baiboly mihintsy ro mivola, fa ze raha voasoratsy aminy ao, le “safà marina tsy misy diso.” (Mpitoriteny 12:10) Tantara marina noho olo tena nisy ro resahiny ao. (Vakio Lioka 1:3; 3:1, 2.) Maro amy manam-pahaiza mikasiky tantara noho mpandiniky ty raha ambany tany any ro nanaporofo fa marina iaby ty daty, ty olo, ty pilasy, noho ty raha niseho miavaky voatantara amy Baiboly ao.
2. Manino ro azontsika volany hoe tsy lany daty ty Baiboly?
Maro ty raha mbo tsy nihain’olo, fe fa nivolanini-Baiboly sandrany. Misy resaky siansy, ohatsy, ty ao. Mbo tsy nino ani-raha rey ty ankamaroan’olo, tamy Baiboly vo nisoraty. Fe voaporofoni-manam-pahaiza tafara atoy hoe marina ty raha nivolanini-Baiboly. ‘Azo atokisa, zisiky farany’ ie.—Salamo 111:8.
3. Manino ro azontsika atokisa ty raha volanini-Baiboly mikasiky ty hoavy?
Misy faminaniaa maro ty amy Baiboly ao, le resahiny ao “ty raha mbo tsy natao.” (Isaia 46:10) Maro ty tantara niavaky fa nivolaniny sandrany talohani-nahatanteraky azy. Niresaky tsipiriany maro amy ty raha hiseho henanizao koa ie. Handiniky faminania vitsivitsy amy Baiboly ao tsika amy fianara toy ato. Mahatseriky fa tanteraky iaby raha rey!
DINIHO LALIKY
Diniho hoe manino ro mifanaraky amy siansy ty Baiboly. Henteo koa fa tanteraky vatany ty faminania amy Baiboly ao.
4. Mifanaraky amy siansy ty Baiboly
Nino ty ankamaroan’olo taloha hoe misy raha ipetrahany tany toy. Alefaso VIDEO toy.
Henteo ty raha resahy amy bokini-Joba ao, 3500 tao lasa zay. Vakio Joba 26:7, bakeo iaraho midiniky fanontanea toy:
Fa liany ela ty Baiboly ro nivola hoe mihanto “amy tsy misy” tany toy. Manino ro mahatseriky raha zay?
Lasa sevoky ty rano an-driaky eny lafa tarafini-masoandro. Manjary ora ie bakeo, le mivary an-driaky any ndraiky. Tanelanelani-tao 1800 noho 1900 vo nihain’olo raha zay. Fe henteo ty raha nivolanini-Baiboly mikasiky ani-zay fa an’arivony tao lasa taloha any. Vakio Joba 36:27, 28, bakeo iaraho midiniky fanontanea retoa:
Ino ty raha mampieky anao lafa nahay fanazavà mikasiky rano io iha?
Vomaiky matoky ty Baiboly va iha lafa baka namaky ani-andinin-teny reo?
5. Raha niseho miavaky fa nivolanini-Baiboly sandrany
Vakio Isaia 44:27–45:2, le iaraho midiniky fanontanea toy:
Ino ty tsipiriany fa nivolanini-Baiboly sandrany, 200 tao talohani-naharesy ani-Babylona?
Voaporofo fa Kyrosy Mpanjakani-Persa noho ty maramilany ro nandresy ani-Babylona tamy 539 T.K.b Navion-drozy lala vavarano niaro ani-tanà iny. Fa nivoha avao koa vavahadini-tanà iny, ka avy le nilitsy rozy fa tsy nila nialy. Tanà ravarava henanizao ro hita a Babylona any, 2500 tao mahery tafara atoy. Eritsereto ty raha nivolanini-Baiboly mikasiky ani-zay.
Vakio Isaia 13:19, 20, bakeo iaraho midiniky fanontanea toy:
Marina va faminania io lafa hentea ty raha niseho tamy Babylona?
Sisa tavela amy tanàni-Babylona a Irak any
6. Fa nivolanini-Baiboly taloha tany ty raha miseho henanizao
Mivola ty Baiboly fa miay amy “andro farany” tsika henanizao. (2 Timoty 3:1) Henteo moa ty raha fa nivolanini-Baiboly mikasiky ani-andro farany zay.
Vakio Matio 24:6, 7, le iaraho midiniky fanontanea toy:
Ino ty raha nivolanini-Baiboly fa hiseho amy andro farany?
Vakio 2 Timoty 3:1-5, le iaraho midiniky fanontanea retoa:
Hanao akory ty toetsin’olo amy andro farany, araky ty fa nivolanini-Baiboly?
Aia amy toetsy reo ro fa hitanao henanizao?
MIERITSERITSY TY OLO SISANY HOE: “Tapasiry avao raha amy Baiboly ao reo.”
Ino ty tena mahavy anao ho resy lahatsy hoe azo atokisa ty Baiboly?
FAMINTINA
Azonao atokisa ty Baiboly satria marina ty tantara ao, mifanaraky amy siansy ty raha volaniny, le tanteraky ty faminaniany.
Famerena
Marina vatany va tantara amy Baiboly ao reo?
Ino ty raha sisany manaporofo fa mifanaraky amy siansy ty Baiboly?
Akory ty hevitsinao, mivola ty raha hoavy va ty Baiboly? Ino ty antony?
DINIHO KOA RETOA
Misy raha tsy mifanaraky amy siansy va amy Baiboly ao?
“Mifanaraka Amin’ny Siansa ve ny Baiboly?” (Lahatsoratsy amy jw.org ao)
Ino ty raha hiseho amy “andro farany”?
Faminaniana 6 efa Tanteraka (Ny Tilikambo Fiambenana 1 Mey 2011)
Henteo ato ty fomba nahatanterahani-faminaniani-Baiboly mikasiky ty Fanjakàni-Gresy.
Henteo ato hoe manino ro niova ty fahitani-lahilahy raiky toy ty Baiboly lafa namaky faminania raiky ie.
“Tsy Nisy Izany Andriamanitra Izany Tamiko” (Ny Tilikambo Fiambenana No. 5 2017)
a Ty hoe faminania, le raha fa nivolani-Ndranahary fe amy hoavy vo hiseho.
b Ty hoe T.K. le midika hoe “Talohani-Kristy”, le ty hoe A.K. midika hoe “Afarani-Kristy.”