Teraky Vola Desambra va Jesosy?

TSY mivola ty Baiboly hoe nombia Jesosy ro nateraky. Fe misy porofo mazava soa ty ao, ahità fa tsy teraky vola Desambra ie.

Diniho hoe nanao akory ty andro ta Betlehema tao tamy fotoa nahateraha Jesosy. Andro nanintsy noho latsakora, ty vola jiosy atao hoe Kisleo (Novambra/Desambra). Nanaraky azy ty vola Tebeta (Desambra/Janoary). Io ro vola nanintsy marè tanaty ty tao, sady nisy lanezy mihintsy aza kindraiky ty am-bohitsy eny. Hanenty ty raha volany ty Baiboly mikasiky raha zay tsika.

Mivola Ezra mpanoratsy Baiboly, fa nalaza ho manintsy noho latsakora ty vola Kisleo. Nitantara ie fa “nangitikitiky” ty vahoaky vory ta Jerosalema tao lafa “niavy ty ora”, “tamy andro faha-20 ty vola fahasivy [Kisleo].” Nivola mihintsy ty vahoaky tamy zay hoe: “Fotoa fiavia ty ora henanizao, ka tsy mahefa mitsanga amonto etoy zahay.” (Ezra 10:9, 13; Jeremia 36:22) Ka tsy mahatseriky laha tsy nijano tan-tonda tany, tamy andro haly ty mpiarakandro noho ty bibiny tamy faritsy io, lafa vola Desambra!

Fe mivola ty Baiboly fa nisy mpiarakandro niaraky ty aondriny tan-tonda tany, tamy haly nahateraha Jesosy. Nivola mihintsy aza Lioka, mpanoratsy Baiboly, fa “nijano tan-tonda any rozy tamy haly, niamby ty aondriny”, tanila Betlehema teny. (Lioka 2:8-12) Tsy hoe nandehandeha tan-tonda any avao rozy, fa nijano tan-tonda tany mihintsy niaraky tamy ty aondriny tamy haly. Ho nanao ho zay amy vola Desambra va rozy, kanefa manintsy marè sady latsakora ty ta Betlehema any tamy fotoa io? Aha. Midika zay, fa tsy nateraky vola Desambraa Jesosy, laha dinihy ty raha nisy tamy fotoa niteraha azy.

Volany ty Baiboly mazava soa hoe nombia Jesosy ro nimaty. Fe tsy resahiny firy ty mikasiky ty fotoa nahaterahany. Ahatiarovantsika safà Solomona Mpanjaka retoa raha zay: “Aleo laza soa toy zay menaky manitsy, voho aleo ty andro ahafatesa toy zay ty andro ahateraha.” (Mpitoriteny 7:1) Ka tsy mahatseriky laha manome fanazavà maro mikasiky ty fanompoa Jesosy, noho ty nahafatesany ty Baiboly, fa tsy miresaky raha maro mikasiky ty fotoa nahaterahany.