Ty Fanjakà-Ndranahary ro tena raha bevata resahini-Baiboly. Hampiasa ani-Fanjakà io Jehovah mba hanatanterahany ty raha teany hatao amy tany toy. Ino Fanjakà-Ndranahary zao? Ino ty ahaizantsika hoe fa manday Fanjakà io henanizao? Ino ty raha fa nivitany? Le ino ty raha hataony amy hoavy? Hamaly ani-fanontanea reo fianara toy noho ty fianara roe manaraky.

1. Ino Fanjakà-Ndranahary zao? Le ia ty Mpanjakany?

Fanjakà naorini-Jehovah Fanjakà-Ndranahary io. Jesosy Kristy ty Mpanjakany, le baka an-danitsy any ie ro manday. (Matio 4:17; Jaona 18:36) Mivola ty Baiboly hoe “hanjaka ... zisiky farany” Jesosy. (Lioka 1:32, 33) Hanjaka amin’olo iaby an-tany etoy Jesosy Kristy Mpanjaka.

2. Ia ty hiaraky manjaka amy Jesosy?

Misy olo hafa koa hiaraky manjaka amy Jesosy. Olo baka amy “foko, fivolana, vahoaky, noho firenena iaby” rozy, le “ho mpanjaka handay ani-tany toy.” (Apokalypsy 5:9, 10) Firy olo hiaraky manjaka amy Jesosy reo? Nanomboky tamy niaviani-Jesosy tan-tany etoy zisiky henanizao, le fa an-tapitrisany ty olo lasa Kristiana nanori-dia azy. Fe 144000 amin’olo reo avao ro hiaraky manjaka amy Jesosy. (Vakio Apokalypsy 14:1-4.) Hanjary vahoakini-Fanjakà io an-tany etoy ty Kristiana hafa.​—Salamo 37:29.

3. Manino ty Fanjakà-Ndranahary ro soa marè mandilatsy ty fanjakàn’olombelo?

Miezaky hanao raha soa ty mpanday olombelo sisany, fe tsy mana hery hanaova ze raha iaby tean-drozy hatao rozy. Misolosolo koa ty mpanday olombelo, le mety mpanday tsy midary noho tea tena ty hisolo ani-raiky taloha iny. Fe tsy ho zay ty Fanjakà-Ndranahary satria tsy hisy olo hafa hisolo ani-Jesosy zao mihintsy. Nanory “fanjakà tsy ho rava zisiky farany” Ndranahary. (Daniela 2:44) Hanjaka amy tany toy iaby Jesosy, sady tsy hanavakavaky olo. Be fitiava, soa fanahy, noho manao ty rariny ie. Hampianariny koa ty vahoakiny mba hana ani-toetsy soa reo.​—Vakio Isaia 11:9.

4. Fanjakà matanjaky raiky hanjaka amy tany toy iaby

Mana fahefà mandilatsy lavitsy ty mpanjaka iaby bakany zay Jesosy Kristy. Vakio Matio 28:18, bakeo iaraho midiniky fanontanea toy:

• Ino ty maha samby hafa ty fahefàni-Jesosy noho ty fahefàni-mpanday olombelo?

Misolosolo avao ty mpanday olombelo, sady amy ze firenena misy azy any avao rozy ro manday. Ka manao akory ty Fanjakà-Ndranahary? Vakio Daniela 7:14, bakeo iaraho midiniky fanontanea retoa:

• “Tsy ho rava” mihintsy ty Fanjakà-Ndranahary. Manino ro soa raha zay?

• Manino koa ro soa ty hoe hanjaka amy tany toy iaby Fanjakà io?

5. Mila soloa ty fanjakàn’olombelo

Manino ro mila soloa amy Fanjakà-Ndranahary ty fanjakàn’olombelo? Alefaso VIDEO toy, bakeo iaraho midiniky fanontanea io.

VIDEO: Ino Fanjakà-Ndranahary Zao?​—Tampatampany (1:41)

• Ino ty vokatsini-fandaisan’olombelo?

Vakio Mpitoriteny 8:9, bakeo iaraho midiniky fanontanea retoa:

• Akory ty hevitsinao, tokony hosoloa amy Fanjakà-Ndranahary va ty fanjakàn’olombelo? Ino ty antony?

6. Mahay soa ty raha mahazo antsika ty mpanday amy Fanjakà-Ndranahary ao

Fa niolombelo manahaky antsika Jesosy, ka afaky “miferinay antsika amy ty raha mampalemy antsika.” (Hebreo 4:15) Ka manao akory olo 144000 hiaraky manjaka amy Jesosy rey? Lafa nifily ani-lahilahy noho ampela tsy mivaliky reo Jehovah, le nalàny “baka amy foko, fivolana, vahoaky, noho firenena iaby” rozy.​—Apokalypsy 5:9.

• Mahay soa ty raha iainantsika olombelo Jesosy noho azy hiaraky manjaka aminy reo. Mampahery anao va raha zay? Ino ty antony?

7. Mana lalàna soa marè ty Fanjakà-Ndranahary

Manao lalàna ty fanjakàn’olombelo mba hahasoa noho hiarova ty vahoakiny. Mana ty lalànany koa ty Fanjakà-Ndranahary, le tsy maintsy manoriky ani-lalàna rey ty vahoakiny. Vakio 1 Korintianina 6:9-11, bakeo iaraho midiniky fanontanea retoa:

• Akory ty hevitsinao, hanao akory ty fiaina laha manoriky ty fitsipiki-Ndranahary mikasiky fandaisam-bataa ty olo iaby?

• Akory ty hevitsinao, rariny va laha teani-Jehovah hanoriky ani-lalàna reo ty vahoakini-Fanjakà iny? Ino ty antony?

• Ino ty mampiseho hoe mbo afaky miova ty olo raiky tsy nanoriky ani-lalàna reo?​—Henteo ty andininy 11.

FAMINTINA

Fanjakà an-danitsy any ty Fanjakà-Ndranahary. Hanjaka amy tany toy iaby Fanjakà io.

Famerena

• Ia iaby ty mpanday amy Fanjakà-Ndranahary ao?

• Manino ty Fanjakà-Ndranahary ro soa marè mandilatsy ty fanjakàn’olombelo?

• Ino ty raha teani-Jehovah hataoni-vahoakini-Fanjakà iny?

DINIHO KOA RETOA

Laha hentea ty raha nivolanini-Jesosy, aia ty misy ty Fanjakà-Ndranahary?

“Ao Am-ponao ve ny Fanjakan’Andriamanitra?” (Lahatsoratsy amy jw.org ao)

Manino ty Vavolombeloni-Jehovah ro tsy manoha ty fanjakàn’olombelo, fa ty Fanjakà-Ndranahary raiky avao ro tohanany?

Ty Fanjakà-Ndranahary Avao ro Tohananay (1:43)

Ino ty raha volanini-Baiboly mikasiky olo 144000 hiaraky manjaka amy Jesosy rey?

“Iza no Mankany An-danitra?” (Lahatsoratsy amy jw.org ao)

Manino ro niresy lahatsy ty ampela gadra raiky hoe Ndranahary avao ro hahavita hampanjaka ty rariny an-tany etoa?

“Ahoana no Nahalalako ny Antony Isian’ny Tsy Rariny?” (Mifohaza!, Novambra 2011)

Nanomboky nanjaka an-danitsy any ty Fanjakà-Ndranahary tamy tao 1914. Tamy zay koa ro nanomboky ty andro farany amy fanjakàn’olombelo. Manino tsika ro mivola ani-zay? Ndao hodinihintsika ty faminaniani-Baiboly. Hohenteantsika koa hoe nanao akory ty fiaina noho ty toetsin’olo tan-tany etoy nanomboky tamy tao 1914 io.

1. Ino ty faminania nivolanini-Baiboly?

Resahini-bokini-Daniela fa hanomboky hanjaka ty Fanjakà-Ndranahary lafa tampitsy fotoa kaihini-Baiboly hoe “fotoa fito” iny. (Daniela 4:16, 17) Nikaihini-Jesosy hoe “fotoa voatondro ho ani-hafa firenena” fotoa io taonjato maro tafara atoy. Hita tamy raha nivolaniny hoe mbo tsy tampitsy fotoa io tamy zay. (Lioka 21:24) Hohenteantsika hoe nitampitsy tamy 1914 fotoa fito io.

2. Nanao akory ty fiaina noho ty toetsin’olo tan-tany etoy nanomboky tamy tao 1914?

Nanontany ani-Jesosy mpianatsiny rey hoe: “Ino ty ho famantara ty fanatrehanao noho ty fitamperani-rafitsini-tontolo toy?” (Matio 24:3) Namaly Jesosy hoe hisy raha hiseho lafa hanomboky hanjaka an-danitsy any ie. Anatini-raha hiseho reo ty aly, mosary, horohoron-tany. (Vakio Matio 24:7.) Nivola koa ty Baiboly fa hana toetsy raty ty olo amy “andro farany”, le hanjary “tsy mora tohery” ty fiaina. (2 Timoty 3:1-5) Tena niharaty ty fiaina noho ty toetsin’olo nanomboky tamy 1914.

3. Manino ro nanjary niharaty ty fiaina lafa nanomboky nanjaka ty Fanjakà-Ndranahary?

Laha vo nanjary Mpanjakani-Fanjakà-Ndranahary Jesosy, le nialy tamy Satana noho ty demonia. Resy Satana tamy aly io. Mivola ty Baiboly hoe “natoraky marè tan-tany etoy ie, le ty anjeliny koa niaraky natoraky taminy.” (Apokalypsy 12:9, 10, 12) Romotsy Satana satria hainy hoe haripaky ie. Zay mahavy azy mampijaly ty olo iaby an-tany etoy io. Tsy mahatseriky laha miharaty ty fiaina amy tany toy iaby. Fe hanafaky ty problemo iaby mahazo antsika ty Fanjakà-Ndranahary.

DINIHO LALIKY

4. Marina ty daty 1914 laha hentea ty faminaniani-Baiboly

VIDEO: Nanomboky Nanjaka ty Fanjakà-Ndranahary Tamy 1914 (5:02)

Natao-Ndranahary nanonofy mikasiky ty raha hiseho amy hoavy Nebokadnezara Mpanjaka. Laha dinihy nofy io noho ty fanazavàni-Daniela, le hita hoe ty fandaisani-Nebokadnezara noho ty Fanjakà-Ndranahary ro resahiny.​—Vakio Daniela 4:17.a

Vakio Daniela 4:20-26, bakeo ampiasao tablò io mba hamalea ani-fanontanea retoa:

• A) Ino ty raha nihitani-Nebokadnezara tamy nofiny iny ao?​—Henteo ty andininy 20 noho 21.

• B) Hatao akory hazo iny?​—Henteo ty andininy 23.

• D) Ino ty raha hiseho lafa tampitsy “fotoa fito” iny?​—Henteo ty andininy 26.

Ino ty Ifandrambesani-Nofy iny amy Fanjakà-Ndranahary?

FAMINANIA INY (Daniela 4:20-36)

Fandaisa

A) Hazo be

Nijano fandaisa iny

B) “Tapahonareo hazo io” le engaho eo “zisiky hitamperani-fotoa fito”

Nitohy fandaisa iny

D) “Himpoly aminao ndraiky ty Fanjakànao”

Fahatanterahani-faminania iny voalohany...

• E) Mampiseho an’ia hazo iny?​—Henteo ty andininy 22.

• F) Manino ro nijano fandaisa iny?​—Vakio Daniela 4:29-33.

• G) Nanao akory Nebokadnezara lafa nitampitsy “fotoa fito” iny?​—Vakio Daniela 4:34-36.

TANTERAKY VOALOHANY

Fandaisa

E) Nebokadnezara Mpanjakani-Babylona

Nijano fandaisa iny

F) Nivaliky adala Nebokadnezara tafarani-tao 606 T.K., le tsy afaky nanday tanatini-fito tao

Nitohy fandaisa iny

G) Nahihitsy ndraiky Nebokadnezara, le nanday ndraiky

Fahatanterahani-faminania iny faharoe...

• H) Mampiseho an’ia hazo iny?​—Vakio 1 Tantara 29:23.

• I) Nanino ro nijano ty fandaisan-drozy? Manino tsika ro mivola hoe mbo nijano fandaisa iny tamy Jesosy tan-tany etoy?​—Vakio Lioka 21:24.

• J) Nombia noho taia fandaisa iny ro nitohy ndraiky?

TANTERAKY FAHAROE

Fandaisa

H) Mpanjaka israelita misolo tena ty fandaisa-Ndranahary

Nijano fandaisa iny

I) Rava Jerosalema, le tsy nisy mpanjaka israelita sasy tanatini-2520 tao

Nitohy fandaisa iny

J) Lasa Mpanjakani-Fanjakà- Ndranahary an-danitsy any Jesosy

5. Niova ty fiaina nanomboky tamy 1914

Alefaso VIDEO toy.

VIDEO: Niova ty Fiaina Nanomboky Tamy 1914 (1:10)

Fa nivolanini-Jesosy hoe hanao akory ty fiaina lafa manjary Mpanjaka ie. Vakio Lioka 21:9-11, bakeo iaraho midiniky fanontanea toy:

• Aia amy raha reo ro fa hitanao na fa renao?

Nivolanini-apostoly Paoly ty toetsin’olo amy andro farany amy fanjakàn’olombelo. Vakio 2 Timoty 3:1-5, bakeo iaraho midiniky fanontanea toy:

• Aia amy toetsy reo ro fa hitanao henanizao?

6. Tokony handrisiky antsika hanao ino ty fahaiza hoe fa manjaka ty Fanjakà-Ndranahary?

Vakio Matio 24:3, 14, bakeo iaraho midiniky fanontanea retoa:

• Ino ty asa bevata mampiseho hoe fa manjaka ty Fanjakà-Ndranahary?

• Ino ty tokony hataonao laha ta handramby anjara amy asa io iha?

Fa manday Fanjakà iny henanizao, sady kely sisa le hanjaka amy tany toy iaby koa ie. Vakio Hebreo 10:24, 25, bakeo iaraho midiniky fanontanea toy:

• Mila manao ino tsika lafa mahay hoe “fa mihamarìny ty andro”?

FAMINTINA

Laha hentea ty faminania amy Baiboly ao noho ty raha iainantsika, le samby manaporofo hoe fa manjaka ty Fanjakà-Ndranahary henanizao. Asehontsika hoe inoantsika vatany raha zay laha mitory mikasiky Fanjakà iny noho manatriky fivoriani-fiangona tsika.

Famerena

• Ino ty hiseho lafa tampitsy fotoa fito resahini-bokini-Daniela iny?

• Manino iha ro resy lahatsy hoe nanomboky nanjaka ty Fanjakà-Ndranahary tamy 1914?

• Ino ty tokony hataonao laha inoanao vatany hoe fa manjaka Fanjakà iny henanizao?

DINIHO KOA RETOA

Niova ty fiaina nanomboky tamy 1914. Ino ty raha volanini-mpahay tantara noho ty olo hafa mikasiky ani-zay?

“Oviana ny Faharatsiana no Nanomboka Nitombo Be?” (Mifohaza! Aprily 2007)

Nanino ro nanova ty fiainani-lahilahy raiky ty faminania amy Matio 24:14 ao iny?

“Adalana Base-ball Aho!” (Ny Tilikambo Fiambenana No. 3 2017)

Ino ty ahaizantsika fa ty Fanjakà-Ndranahary ro volany amy Daniela toko 4 ao io?

“Oviana no Nanomboka Nanjaka ny Fanjakan’Andriamanitra? (Fizarana 1)” (Ny Tilikambo Fiambenana 1 Oktobra 2014)

Ino ty porofo fa tampitsy tamy 1914 “fotoa fito” volany amy Daniela toko 4 ao iny?

“Oviana no Nanomboka Nanjaka ny Fanjakan’Andriamanitra? (Fizarana 2)” (Ny Tilikambo Fiambenana 1 Novambra 2014)

Fa manjaka ty Fanjakà-Ndranahary. Sisa kely, le hanao fanovà bevata an-tany etoy ie. Ndao hodinihintsika ty sisany amy raha soa azonao tamany, lafa handay ani-tany toy Fanjakà iny.

1. Ino ty hataoni-Fanjakà iny mba hilamy ty fiaina an-tany etoa sady ho ara-drariny?

Haripakini-Jesosy Mpanjaka amy aly Hara-magedona ty mpanao raty noho ty fanjakàn’olombelo. (Apokalypsy 16:14, 16) Amy fotoa zay, le ho tanteraky raha nampitamanini-Baiboly toy hoe: “Lafa afarafara ao, le tsy hisy sasy ty raty fanahy.” (Salamo 37:10) Hampiasa ani-Fanjakà iny Jesosy mba hampilamy ty fiaina an-tany etoa sady hahavy azy ho ara-drariny.​—Vakio Isaia 11:4.

2. Hanao akory ty fiaina lafa hatao an-tany etoa ty sitrapo-Ndranahary?

Lafa hanjaka an-tany etoa ty Fanjakà-Ndranahary, le “ty olo marina ro handova ani-tany toy, ka hipetraky eo zisiky farany.” (Salamo 37:29) Mba vetsevetseo moa hoe olo soa fanahy noho tea ani-Jehovah avao ty manodidy anao sady olo mifankatea! Tsy hisy sasy ty arety sady ho velo zisiky farany ty olo iaby.

3. Ino ty hataoni-Fanjakà-Ndranahary lafa baka nandripaky ani-mpanao raty rey?

Hanjaka anatini-1 000 tao Jesosy, lafa ripaky iaby ty mpanao raty. Anatini-fotoa io Jesosy noho 144 000 hiaraky manjaka aminy rey hanampy ty olombelo an-tany eto mba ho lavorary. Fa hanjary paradisa soasoa tany toy lafa tampitsy 1 000 tao io. Ho sambatsy iaby koa ty olo satria manoriky ty safàni-Jehovah. Bakeo hampolini-Jesosy amy Jehovah Babany Fanjakà iny. Amy fotoa zay vo tena ‘hohamasiny ty anarani-Jehovah.’ (Matio 6:9, 10) Fa voaporofo amy zay hoe Jehovah ro mahay manday sady tena tea ty vahoakiny. Haripakini-Jehovah amy zay Satana noho ty demonia voho ty olo manohitsy ty Fanjakàny. (Apokalypsy 20:7-10) Tsy handalo ty raha soa hataoni-Fanjakà-Ndranahary fa haharitsy zisiky farany.

DINIHO LALIKY

4. Haripakini-Fanjakà-Ndranahary ty fanjakàn’olombelo

“Nanjakazaka tamy ty namany ty olo ka nampilitsy loza taminy.” (Mpitoriteny 8:9) Hampiasa ty Fanjakàny Jehovah mba tsy hampisy ani-tsy rariny zay.

Vakio Daniela 2:44 noho 2 Tesalonianina 1:6-8, bakeo iaraho midiniky fanontanea retoa:

• Hataoni-Jehovah noho Jesosy akory ty fanjakàn’olombelo noho ty mpanoha azy?

• Ino tamy raha nianaranao mikasiky ani-Jehovah noho Jesosy ro mahavy anao hatòky hoe hanao ty rariny rozy?

5. Mpanjaka soa marè Jesosy

Jesosy ro Mpanjakani-Fanjakà-Ndranahary io, ka hanao raha soa maro ho ani-vahoakiny an-tany etoa ie. Alefaso VIDEO toy mba hahità hoe fa nasehoni-Jesosy fa maniry hanampy olo ie sady nameani-Jehovah hery hanao ani-raha zay.

VIDEO: Natoroni-Jesosy ty Raha Hataoni-Fanjakà- Ndranahary (1:13)

Natoroni-Jesosy tamy ie tan-tany etoy hoe ino ty hataoni-Fanjakà iny. Aia amy fitahia retoa ro fa tsy lininao ty hiaviany? Vakio ty andinin-teny miresaky ani-fitahia reo.

6. Ho soasoa ty fiaina amy hoavy

VIDEO: Taratsini-Raha Soa amy Hoavy (4:38)

Vakio Salamo 145:16, bakeo iaraho midiniky fanontanea toy:

• Manao akory ty hafaleanao mahay hoe hameani-Jehovah fahafaham-po lafa atao raha miay iaby?

FAMINTINA

Ho vitani-Fanjakà-Ndranahary iaby ze raha teani-Jehovah hataony. Hataony Paradisa tany toy. Olo soa fanahy avao ro hiay an-tany etoa sady hanompo ani-Jehovah zisiky farany.

Famerena

• Ino ty hataoni-Fanjakà-Ndranahary mba hanamasìna ty anarani-Jehovah?

• Manino tsika ro afaky matoky fa hanatanteraky ty raha ampitamany amy Baiboly ao ty Fanjakà-Ndranahary?

• Ino amy ty raha hataoni-Fanjakà-Ndranahary ro fa tsy lininao?

DINIHO KOA RETOA

Ino Hara-magedona zao?

“Inona no Atao hoe Ady Hara-magedona?” (Lahatsoratsy amy jw.org ao)

Ho hitanao ato hoe ino ty raha hiseho amy fotoa nikaihinʼi Jesosy hoe “fijalea bevata.”—Matio 24:21

“Inona no Atao hoe Fahoriana Lehibe?” (Lahatsoratsy amy jw.org ao)

Ho hitanao ato hoe afaky mametsivetsy ty fiaina amy Paradisa ao ty fianakavia.

Mba Eritsereto hoe amy Paradisa ao Iha (1:50)

Mpanohitsy fanjakà ty lahilahy raiky. Akory ty nahitany ty valini-fanontanea nampiasa loha azy?

“Manova Olona ny Baiboly” (Ny Tilikambo Fiambenana 1 Janoary 2012)