FIANARA 33
Ino ty Raha Hataoni-Fanjakà-Ndranahary?
Fa manjaka ty Fanjakà-Ndranahary. Sisa kely, le hanao fanovà bevata an-tany etoy ie. Ndao hodinihintsika ty sisany amy raha soa azonao tamany, lafa handay ani-tany toy Fanjakà iny.
1. Ino ty hataoni-Fanjakà iny mba hilamy ty fiaina an-tany etoa sady ho ara-drariny?
Haripakini-Jesosy Mpanjaka amy aly Hara-magedona ty mpanao raty noho ty fanjakàn’olombelo. (Apokalypsy 16:14, 16) Amy fotoa zay, le ho tanteraky raha nampitamanini-Baiboly toy hoe: “Lafa afarafara ao, le tsy hisy sasy ty raty fanahy.” (Salamo 37:10) Hampiasa ani-Fanjakà iny Jesosy mba hampilamy ty fiaina an-tany etoa sady hahavy azy ho ara-drariny.—Vakio Isaia 11:4.
2. Hanao akory ty fiaina lafa hatao an-tany etoa ty sitrapo-Ndranahary?
Lafa hanjaka an-tany etoa ty Fanjakà-Ndranahary, le “ty olo marina ro handova ani-tany toy, ka hipetraky eo zisiky farany.” (Salamo 37:29) Mba vetsevetseo moa hoe olo soa fanahy noho tea ani-Jehovah avao ty manodidy anao sady olo mifankatea! Tsy hisy sasy ty arety sady ho velo zisiky farany ty olo iaby.
3. Ino ty hataoni-Fanjakà-Ndranahary lafa baka nandripaky ani-mpanao raty rey?
Hanjaka anatini-1 000 tao Jesosy, lafa ripaky iaby ty mpanao raty. Anatini-fotoa io Jesosy noho 144 000 hiaraky manjaka aminy rey hanampy ty olombelo an-tany eto mba ho lavorary. Fa hanjary paradisa soasoa tany toy lafa tampitsy 1 000 tao io. Ho sambatsy iaby koa ty olo satria manoriky ty safàni-Jehovah. Bakeo hampolini-Jesosy amy Jehovah Babany Fanjakà iny. Amy fotoa zay vo tena ‘hohamasiny ty anarani-Jehovah.’ (Matio 6:9, 10) Fa voaporofo amy zay hoe Jehovah ro mahay manday sady tena tea ty vahoakiny. Haripakini-Jehovah amy zay Satana noho ty demonia voho ty olo manohitsy ty Fanjakàny. (Apokalypsy 20:7-10) Tsy handalo ty raha soa hataoni-Fanjakà-Ndranahary fa haharitsy zisiky farany.
DINIHO LALIKY
Hampiasa ty Fanjakàny Jehovah mba hanatanteraha ty raha ampitamanini-Baiboly mikasiky ty hoavy. Hodinihintsika hoe manino ro azontsika atokisa raha zay.
4. Haripakini-Fanjakà-Ndranahary ty fanjakàn’olombelo
“Nanjakazaka tamy ty namany ty olo ka nampilitsy loza taminy.” (Mpitoriteny 8:9) Hampiasa ty Fanjakàny Jehovah mba tsy hampisy ani-tsy rariny zay.
Vakio Daniela 2:44 noho 2 Tesalonianina 1:6-8, bakeo iaraho midiniky fanontanea retoa:
Hataoni-Jehovah noho Jesosy akory ty fanjakàn’olombelo noho ty mpanoha azy?
Ino tamy raha nianaranao mikasiky ani-Jehovah noho Jesosy ro mahavy anao hatòky hoe hanao ty rariny rozy?
5. Mpanjaka soa marè Jesosy
Jesosy ro Mpanjakani-Fanjakà-Ndranahary io, ka hanao raha soa maro ho ani-vahoakiny an-tany etoa ie. Alefaso VIDEO toy mba hahità hoe fa nasehoni-Jesosy fa maniry hanampy olo ie sady nameani-Jehovah hery hanao ani-raha zay.
Natoroni-Jesosy tamy ie tan-tany etoy hoe ino ty hataoni-Fanjakà iny. Aia amy fitahia retoa ro fa tsy lininao ty hiaviany? Vakio ty andinin-teny miresaky ani-fitahia reo.
RAHA NATAONI-JESOSY TALOHA: |
RAHA HATAONI-JESOSY AMY HOAVY: |
|---|---|
|
|
|
|
|
|
|
|
6. Ho soasoa ty fiaina amy hoavy
Ho soasoa manahaky ty nanaovani-Jehovah azy tamy voalohany any ty fiaina lafa hanjaka an-tany etoa Fanjakà iny. Ho velo zisiky farany amy Paradisa an-tany etoa ty olo. Amy alalani-Jesosy Anakilahiny ro hanatanterahani-Jehovah ani-zay. Alefaso VIDEO toy.
Vakio Salamo 145:16, bakeo iaraho midiniky fanontanea toy:
Manao akory ty hafaleanao mahay hoe hameani-Jehovah fahafaham-po lafa atao raha miay iaby?
MIERITSERITSY TY OLO SISANY HOE: “Laha miaraky miasa tsika iaby, le ho afaky handamy ty raha manahira misy henanizao.”
Ino iaby ty problemo tsy afakini-fanjakàn’olombelo kanefa hafahini-Fanjakà-Ndranahary?
FAMINTINA
Ho vitani-Fanjakà-Ndranahary iaby ze raha teani-Jehovah hataony. Hataony Paradisa tany toy. Olo soa fanahy avao ro hiay an-tany etoa sady hanompo ani-Jehovah zisiky farany.
Famerena
Ino ty hataoni-Fanjakà-Ndranahary mba hanamasìna ty anarani-Jehovah?
Manino tsika ro afaky matoky fa hanatanteraky ty raha ampitamany amy Baiboly ao ty Fanjakà-Ndranahary?
Ino amy ty raha hataoni-Fanjakà-Ndranahary ro fa tsy lininao?
DINIHO KOA RETOA
Ino Hara-magedona zao?
“Inona no Atao hoe Ady Hara-magedona?” (Lahatsoratsy amy jw.org ao)
Ho hitanao ato hoe ino ty raha hiseho amy fotoa nikaihinʼi Jesosy hoe “fijalea bevata.”—Matio 24:21
“Inona no Atao hoe Fahoriana Lehibe?” (Lahatsoratsy amy jw.org ao)
Ho hitanao ato hoe afaky mametsivetsy ty fiaina amy Paradisa ao ty fianakavia.
Mpanohitsy fanjakà ty lahilahy raiky. Akory ty nahitany ty valini-fanontanea nampiasa loha azy?
“Manova Olona ny Baiboly” (Ny Tilikambo Fiambenana 1 Janoary 2012)