FIANARA 47
Parè Hatao Batisa va Iha?
Fa maro ty raha hainao mikasiky ani-Jehovah liany nianaranao Baiboly zay. Azo inoa fa niezaky nanova ze raha mila ovà iha mba hanoriha ty raha nianaranao. Fe mety mbo misy raha misaka anao tsy hanokam-bata noho hatao batisa. Hodinihintsika amy fianara toy ato hoe ino ty raha sisany misaka ty olo tsy hatao batisa, le akory ty handreseanao ani-raha rey.
1. Mila mahay raha maro va iha vo azo atao batisa?
Mila mana “fahaiza marina soa ty fahamarina” iha vo azo atao batisa. (1 Timoty 2:4) Tsy midika zay hoe mila hainao iaby ty valini-fanontanea amy Baiboly ao. Satria ndre ty Kristiana vita batisa fa ela aza, le mbo manohy mianatsy avao. (Kolosianina 1:9, 10) Fe mila hainao soa ty fampianara fototsy amy Baiboly ao. Ty anti-panahy amy fiangona eo ro hanampy anao hahita laha fa ampy ty raha hainao mikasiky ty fahamarina.
2. Ino iaby ty raha mila ataonao alohani-hanaova batisa anao?
Mila mibebaky noho miova tse iha. (Vakio Asan’ny Apostoly 3:19.) Midika raha zay hoe tena maneny tamy ty raha tsy nety nataonao iha, le mangataky fanengà hadisoa amy Jehovah. Tsy manao ty raha tsy teani-Jehovah sasy koa iha, sady tapa-kevitsy ty hampifalifaly azy amy ty fiainanao iaby. Manomboky mivory noho mitory miaraky amy fiangona koa iha.
3. Manino ro tsy tokony henganao hisaka anao ty tahotsy?
Matahotsy ty olo sisany hoe tsy no tsy ho vitany ty raha nampitamaniny ani-Jehovah. Marina fa mety hanao hadisoa iha kindraiky, ndre lahilahy noho ampela tsy mivaliky volany amy Baiboly ao reo aza mba nanao ho zay koa. Fe tsy mitamà Jehovah hoe ho lavorary ty olo manompo azy ka tsy hanao hadisoa mihintsy. (Vakio Salamo 103:13, 14.) Falifaly ie lafa manao ze farani-vitanao iha! Hanampy anao ie. Nanome toky mihintsy ie hoe: ‘Tsy hisy afaky mampisaraky antsika amy fitiavany.’—Vakio Romanina 8:38, 39.
DINIHO LALIKY
Ho hitantsika hoe afaky handresy ze raha mety hisaka anao tsy hatao batisa iha, laha miezaky hahay soa ani-Jehovah marerè noho maneky ampeany.
4. Miezaha hahay marerè ani-Jehovah
Akory ty ahaizanao hoe fa ampy ty raha hainao mikasiky ani-Jehovah ka fa azo atao batisa iha? Fa ampy fahaiza zay, laha nahavy anao ho tea ani-Jehovah sady hanao raha mampifalifaly azy. Alefaso VIDEO toy, bakeo iaraho midiniky fanontanea toy.
Ino ty nanampy ani-olo tamy video tao rey mba ho parè hatao batisa?
Vakio Romanina 12:2, bakeo iaraho midiniky fanontanea retoa:
Mbo misy raha mampisalasala anao va ty raha ampianarini-Baiboly? Mbo misalasala va iha hoe marina sa tsy marina ty raha ampianarini-Vavolombeloni-Jehovah?
Ino ty azonao atao laha mbo misy raha mampisalasala anao?
5. Reseo ze raha misaka anao tsy hatao batisa
Tsy maintsy miatriky problemo tsika lafa tapa-kevitsy hanokam-bata ho ani-Jehovah noho hatao batisa. Ino ty ohatsy amy problemo rezay? Alefaso VIDEO toy, bakeo iaraho midiniky fanontanea reo.
Ino iaby ty raha sarotsy tsy maintsy nireseni-Narangerel mba hahafahany manompo ani-Jehovah?
Manino ro nanampy azy handresy ani-raha sarotsy rey ty fitiavany ani-Jehovah?
Vakio Ohabolana 29:25 noho 2 Timoty 1:7, bakeo iaraho midiniky fanontanea toy:
Ino ty hanampy antsika hana herim-po mba handresea raha sarotsy?
6. Matokia fa hanampy anao Jehovah
Hanampy anao hampifalifaly azy Jehovah. Alefaso VIDEO toy, bakeo iaraho midiniky fanontanea reo.
Nanino mpianatsy Baiboly tamy video tao iny ro nisalasala hatao batisa?
Ino ty nanampy azy hatòky ani-Jehovah marerè?
Vakio Isaia 41:10, 13, bakeo iaraho midiniky fanontanea toy:
Manino iha ro afaky matoky hoe ho vitanao ty hanatanteraky ty raha nampitamaninao ani-Jehovah tamy iha nanokam-bata iny?
7. Ampitombò ty fankasitrahanao ty fitiavani-Jehovah
Vomaiky iha ta hankasitraky marerè ani-Jehovah sady ta hanompo azy zisiky farany lafa mametsivetsy ty fitiavany anao. Vakio Salamo 40:5, bakeo iaraho midiniky fanontanea toy:
Ino amy ty fitahia nameani-Jehovah anao ro tena ankasitrahanao marè?
Tea ani-Jehovah noho ty safàny Jeremia mpaminany. Nifalifaly koa ie satria nana tombontsoa nanday ty anarani-Jehovah. Nivola ie hoe: ‘Nihitako ty safànao ka nihaniko. Mampanitranitra ahy ty safànao sady mahafalifaly ty foko, satria kaihy amy ty anaranao lahy aho Jehovah Ndranahary.’ (Jeremia 15:16) Iaraho midiniky fanontanea reto:
Manino ro tombontsoa miavaky ty hoe Vavolombeloni-Jehovah?
Ta hatao batisa va iha mba hanjary Vavolombeloni-Jehovah?
Misy raha misaka anao tsy hanao ani-zay va?
Ino ty raha mila ataonao mba hahavy anao ho vita batisa?
MIERITSERITSY TY OLO SISANY HOE: “Matahotsy aho tsy no tsy ho vitako ty hanatanteraky ty raha nampitamaniko ani-Jehovah lafa vita batisa aho.”
Mieritseritsy ho zay koa va iha?
FAMINTINA
Ho vitanao ty handresy raha sarotsy mety hisaka anao tsy hatao batisa lafa manampy anao Jehovah.
Famerena
Tsy maintsy hainao iaby va ty raha amy Baiboly ao vo azo atao batisa iha? Ino ty antony?
Ino iaby ty raha mila ovànao alohani-hanaovanao batisa?
Manino ro tsy tokony henganao hisaka anao ty tahotsy?
DINIHO KOA RETOA
Ino ty tokony handrisiky anao hatao batisa?
“Fa Parè Hatao Batisa va Iha?” (Tilikambo Fiambena Marsa 2020)
Ho hitanao ato ty raha sisany mety hisaka anao tsy hatao batisa noho ty raha afaky manampy anao handresy ani-raha rezay.
“Inona no Misakana Ahy Tsy Hatao Batisa?” (Ny Tilikambo Fiambenana Martsa 2019)
Afaky nandresy raha sarotsy ty lahilahy raiky mba ho vita batisa. Ino ty nataony?
Nisalasala hatao batisa ty lahilahy raiky atao hoe Ataa tamy voalohany. Fe ino ty nahavy azy ho resy lahatsy avao?