FIANARA 36
Manaova ty Marina amy Kila Raha Iaby
Teantsika laha olo manao ty marina ty namantsika. Mitamà koa Jehovah fa hanao ty marina ty namany. Fe tsy mora raha zay satria tsy manao ty marina ty ankamaroan’olo amy tontolo toy eto. Ino ty soa azo baka amy fanaova ty marina amy kila raha iaby?
1. Ino ty antony bevata mahavy antsika manao ty marina?
Lafa manao ty marina amin’olo tsika, le mampiseho fa tea noho manaja ani-Jehovah. Tiarovo fa mahay ty raha iaby eritseretintsika noho ataontsika Jehovah. (Hebreo 4:13) Falifaly ie lafa mahita antsika mifily hanao ty marina. Hoy ty safàny: “Mampangaroharo ani-Jehovah ty olo mahihitsihitsy, fa ty olo mahity ro mana fifandrambesa marìny aminy.”—Ohabolana 3:32.
2. Akory ty ampisehoantsika hoe manao ty marina tsika?
Teani-Jehovah ‘hivola ty marina amy ty namantsika’ tsika. (Zakaria 8:16, 17) Midika raha zay fa teani-Jehovah hivola ty marina amy fianakavia, mpiaraky miasa, mpiara-manompo, noho manam-pahefà tsika. Tsy tokony havandy na hamonivony raha tsika. Tsy mangalatsy na misandoky ty olo manao ty marina. (Vakio Ohabolana 24:28 noho Efesianina 4:28.) Mandoa ze hetra iaby tokony haloan-drozy koa rozy. (Romanina 13:5-7) Fomba vitsivitsy azontsika ampisehoa reo hoe ‘manao ty marina amy kila raha iaby’ tsika.—Hebreo 13:18.
3. Ino ty soa azo baka amy fanaova ty marina?
Laha malaza manao ty marina tsika, le hatokisan’olo. Lasa ho soasoa koa ty amy fiangona eo satria hifampatoky manahaky fianakavia raiky io ty olo ao. Ho falifaly koa tsika satria halio eritseritsy. Ty fanaovantsika ty marina, le afaky “mandravaky ty fampianara-Ndranahary Mpanavotsy antsika” iny sady mandrisiky ty hafa hanaraky ty fivavaha marina.—Titosy 2:10.
DINIHO LALIKY
Hohenteantsika hoe ino ty raha tsapani-Jehovah lafa manao ty marina iha? Ino ty soa ho azonao amy fanaova ty marina? Le akory ty ampisehoanao hoe manao ty marina avao iha?
4. Mahafalifaly ani-Jehovah ty fanaova ty marina
Vakio Salamo 44:21 noho Malakia 3:16, bakeo iaraho midiniky fanontanea retoa:
Manino tsika ro tsy tokony hieritseritsy hoe afaky mamony ty marina?
Akory ty hevitsinao, ino ty tsapani-Jehovah lafa mivola ty marina tsika ndre lafa sarotsy aza ty manao ani-raha zay?
Falifaly ty ray aman-dreny lafa mivola ty marina ty anakin-drozy. Falifaly manahaky zay koa Jehovah lafa mivola ty marina tsika
5. Manaova ty marina amy fotoa iaby
Mieritseritsy ty ankamaroan’olo hoe tsy misy olo mahavita manao ty marina amy fotoa iaby zao. Fe manino tsika ro tokony hanao ty marina avao? Alefaso VIDEO toy.
Vakio Hebreo 13:18, bakeo iaraho midiniky hoe: Akory ty ampisehoantsika fa manao ty marina tsika...
amy fianakaviantsika eo?
an-dakilasy na am-piasà any?
amy raha hafa?
6. Mahasoa ty fanaova ty marina
Mety hampilitsy problemo amintsika ty fanaova ty marina kindraiky. Fe tsy misy raha soa mandilatsy ty hoe manao ty marina. Vakio Salamo 34:12-16, bakeo iaraho midiniky fanontanea toy:
Manino ro mahasambatsy ty manao ty marina?
A. Mihamifankatea ty mpivaly lafa samby mivola ty marina
B. Atokisani-mpampiasa azy ty mpiasa manao ty marina
D. Atokisani-manam-pahefà ty olom-pirenena manao ty marina
MIERITSERITSY TY OLO SISANY HOE: “Tsy mampanino laha mavandy kelikely avao.”
Manino iha ro mino hoe halani-Jehovah iaby lafa atao vandy?
FAMINTINA
Teani-Jehovah hanao ty marina amy kila raha iaby ty namany, ndre amy ty raha volaniny zay ndre amy ty raha ataony.
Famerena
Akory ty ampisehoantsika hoe manao ty marina tsika?
Manino tsika ro tsy tokony hieritseritsy mihintsy hoe afaky mamony ty marina?
Manino iha ro mila tapa-kevitsy hanao ty marina amy fotoa iaby?
DINIHO KOA RETOA
Ino ty azoni-ray aman-dreny atao mba hanampea ty anany hanao ty marina?
Ino ty soa ho azonao laha tanterahinao ty raha nampitamaninao?
Tanteraho ty Raha Nampitamaninao, le Hahazo Fitahia Iha (9:09)
Tokony handoa hetra avao va tsika ndre hampiasà amy raha raty aza raha iny?
“Tokony Handoa Hetra ve Ianao?” (Ny Tilikambo Fiambenana 1 Septambra 2011)
Tsy nanao ty marina ty lahilahy raiky taloha. Fe ino ty nanampy azy hiova?
“Lasa Fantatro hoe Mamela Heloka i Jehovah” (Ny Tilikambo Fiambenana 1 Mey 2015)