Manino Tsika ro Tsy Mandeha Mialy Kanefa Israelita Taloha rey Nialy?

“LAHA misy tsy ta hialy amy Fransy na Angletera ty raiky aminareo le hovonoa nareo iaby!” Io ty safàni-manam-boninahitsy nazỳ tamy Aly Bevata II zay lafa ie neloky tamy Vavolombeloni-Jehovah maromaro rezay. Fa nisy maramila nazỳ maro nitanjaky basy amin’io nandinindiny teo, fe tsy nisy naneky rahalahy rey. Tena be herim-po mihintsy rozy! Natoroni-rahalahy reo hoe manao akory ty fahitani-Vavolombeloni-Jehovah ty aly: Tsy mandeha mialy mihintsy tsika. Tsy maneky tsika ndre horohoroa aza hoe hovonoa laha tsy mandeha mialy. Tsy poro ty atia na ty aroa tsika.

1. TANATINI-FIRENENA RAIKY AVAO TY VAHOAKI-NDRANAHARY IABY TAMY ZAY

Tamy zay, nifily firenena raiky Jehovah mba ho vahoakiny. Tsy ia io fa ty firenenani-Israely. ‘Fananany manoka nifiliny baka amy firenena iaby’ hoasany Israelita reo. (Eks. 19:5) Napetrany tamy tany raiky koa rozy. Ka lafa nirahi-Ndranahary hialy tamy firenena hafa rozy, le tsy nialy na namono mpanompo-Ndranahary hafa.a

Henanizao, “baka amy firenena noho foko noho vahoaky voho fivolana iaby” ty mpanomponi-Jehovah. (Apok. 7:9) Ka laha misy mpanompo-Ndranahary mandeha mialy zany, le mety hialy amy mpanompo-Ndranahary hafa na hamono azy mihintsy.

2. JEHOVAH RO NANDIDY ANI-ISRAELITA REO HIALY

Tamy zay, Jehovah ro nanapa-kevitsy hoe ombia Israelita reo ro mila mandeha mialy le aia ty hialian-drozy. Ohatsy zao, nirahi-Ndranahary ty Israelita mba hanafiky ani-Kananita rey satria Kananita reo nalaza hoe mpanompo sampy, tena mpijangajanga be, sady nanao soro ajà. Nandidy ani-Israelita reo Jehovah mba handripaky an’olo raty reo tsy ho amy Tany Nampitamany iny eo, tsy no hifindra amin-drozy raha raty fataoni-Kananita rey. (Lev. 18:24, 25) Lafa tafilitsy tamy Tany Nampitamany iny ao amy zay Israelita rey, le namea-Ndranahary lala hialy rozy kindraiky mba ho voaaro amy fahavalon-drozy rey. (2 Sam. 5:17-25) Fe tsy maintsy nandiny baiko baka amy Jehovah Israelita rey vo nandeha nialy. Saky tsy nanao ani-zay rozy, le raty avao matetiky ty vokany.​—Nom. 14:41-45; 2 Tan. 35:20-24.

Henanizao, tsy maniraky olo handeha hialy Jehovah. Mialy ty olo henanizao mba hahazoany ze raha teany fa tsy hoe mba hanaova ty sitrapo-Ndranahary. Mandeha mialy rozy satria ta hahazo tany noho drala be be, na mba hampanjaka ty hevitsy politiky andesin-drozy. Fe misy olo sisany mivola hoe mialy mba hiarova ty finoany na mba hamonoa ty fahavalo-Ndranahary. Ka manao akory koa rey? Soa ho hay fa hisy aly hiseho amy hoavy, le hiaro ty tena mpanompony Jehovah sady haripakiny koa ty fahavalony. Aramagedona ty anarani-aly io. (Apok. 16:14, 16) Zavaboary ara-panahy avao ro maramila hampiasà-Ndranahary amy aly io fa tsy ty mpanompony olombelo.​—Apok. 19:11-15.

3. TSY NIVONOANI-ISRAELITA REY ZE OLO NINO ANI-JEHOVAH

Tamy zay, matetiky niferinesani-Israelita rey ze olo nino a Ndranahary, le ze olo nampamonoani-Jehovah avao ro nivonoan-drozy. Henteo tse moa ohatsy roe retoa: Marina fa nandidy ty handravà ani-Jeriko Jehovah, fe navotani-Israelita rey Rahaba noho ty fianakaviany satria nino ani-Jehovah. (Jos. 2:9-16; 6:16, 17) Tafara atoy, tsy naripaky koa ty tanàni-Gibeona satria nanaja a Ndranahary ty Gibeonita.​—Jos. 9:3-9, 17-19.

Henanizao, lafa misy firenena mialy le vonoan-drozy mbeo iaby ndre ty olo mino ani-Jehovah. Vonoan-drozy ndre ty olo tsy maramila.

4. TSY MAINTSY NANARAKY TY LALÀNA-NDRANAHARY MIKASIKY ALY TY ISRAELITA

Tamy zay, tsy maintsy nanaraky ty toromariky nameani-Jehovah mikasiky aly ty maramila israelita. Nisy fotoa, ohatsy, Ndranahary nivola tamin-drozy hoe tokony hovolanin-drozy amy tanà hotafihin-drozy iny hoe ino ty tokony hataon’olo rey laha tean-drozy tsy hisy aly iny. (Deot. 20:10) Nivolani-Ndranahary koa maramila israelita rey hoe tsy maintsy malio ty vatan-drozy noho ty pilasy itobian-drozy noho ty fandaisam-batan-drozy. (Deot. 23:9-14) Matetiky ty maramila amy firenena hafa rey mandrava ampela lafa mandresy ani-tanà tafihin-drozy rey, fe niraràni-Jehovah tsy hanao ho zay ty Israelita. Tsy nahazo nanambaly ampela niazo babo aza rozy laha tsy fa vola raiky tafarani-naharesy ani-tanà iny.​—Deot. 21:10-13.

Henanizao, manao fifanaraha ty ankamaroani-firenena reo lafa hialy. Natao hiarova ty olo tsy maramila raha rey. Fe mampalahelo fa tsy voahaja raha rey lafa tena mialy rozy.

5. NIALY HO ANI-VAHOAKINY REO NDRANAHARY

Tamy zay, Jehovah ro nialy tamy pilasini-Israelita rey, le matetiky ie ro nanao fahagagà mba hahavy an-drozy handresy. Ino hoasanao ty nataoni-Jehovah mba ho resini-Israelita reo Jeriko? Nameany toromariky Israelita reo, ka laha vo ‘nikorakoraky nanao tabataban’aly rozy, le niropaky lakorobe iny’ ka nimora tamin-drozy ty nahazo ani-tanà iny. (Jos. 6:20) Ka nanao akory koa ty nandresean-drozy ty Amorita? “Nandatsahani-Jehovah havandra bevata baka an-danitsy any [rozy] ... Nimaro biby ty nimatini-havandra laha ampitovizy amy ty nimatini-Israelita tamy sabatsy.”​—Jos. 10:6-11.

MIEZAKY MILONGO AMIN’OLO TY TENA KRISTIANA

Nihitantsika teo hoe tena samby hafa tanteraky ty tamy androni-Israely taloha tany noho ty henanizao. Fe tsy reo avao ro mahavy antsika tsy mandeha mialy. Mbo misy antony hafa koa. Fa nivola, ohatsy, Ndranahary hoe amy andro farany le “tsy hianatsy aly sasy” ze olo ampianariny. (Isaia 2:2-4) Hianatsy aly aza tsy atao vo handraky hialy mihintsy. Ankoatsini-zay, fa nivola koa Kristy hoe “tsy miharo amy zao tontolo zao” ty mpianatsiny, zany hoe tsy poro ty atia na ty aroa lafa misy raha mampialy ani-zao tontolo zao.​—Jaona 15:19.

Nampirisihini-Kristy hanao raha fanampiny aza ty mpanori-dia azy. Nampianariny rozy mba hihalavitsy ani-ze raha mahavy lolompo, heloky, noho aly. (Mat. 5:21, 22) Tsy zay avao fa tokony ho “mpampilongo” hoasany ty mpanori-dia azy sady tokony ho tea ty fahavalon-drozy.​—Mat. 5:9, 44.

Akory ty hanaovantsika ani-zay? Tsy hisy amintsika aloha haniry handeha ho an’aly any. Fe tsy no misy olo halantsika ty amy fiangona eo ka ataontsika fahavalo mihintsy? Ndao tsika hiezaky mafy mba hiala amy raha manahaky ani-zay.​—Jak. 4:1, 11.

Tsy ta hilitsy amy aly ataoni-firenena reo mihintsy tsika. Vomaiky aza tsika miezaky mba hampisy filongoa noho fitiava. (Jaona 13:34, 35) Enga ane tsika ho tapa-kevitsy tsy ho poro ty atia na ty aroa zisiky hiaviani-andro hanamperani-Jehovah ty aly iaby.​—Sal. 46:9.