Parè “Handova ty Tany” va Iha?

FA TSY linintsika iaby ty hahatanteraky ani-fampitamanani-Jesosy toy hoe: “Sambatsy ty malemy fanahy, fa ie ro handova ty tany.” (Mat. 5:5) Handova ty tany ty voahosotsy lafa lasa mpanjaka miaraky amy Jesosy an-danitsy any, le handay ani-tany toy. (Apok. 5:10; 20:6) Fa ty ankamaroani-Kristiana marina henanizao mitamà handova ty tany le hiay mandrakizay etoy. Ho lavorary rozy, hiada, sady ho sambatsy. Fe mba hahatanteraky ani-zay, le hisy asa bevata tsy maintsy hataon-drozy. Anisani-zay raha telo retoa: Hanova ani-tany toy ho paradisa, hikarakara ani-azy hovelomy amy maty rey, noho hampianatsy an-drozy. Hodinihintsika koa hoe ino ty azontsika atao henanizao mba hampisehoa hoe maniry handramby anjara amy raha reo tsika lafa amy tontolo vaovao any.

PARÈ HANOVA ANI-TANY TOY HO PARADISA VA IHA?

Nandidy ty olombelo Jehovah hoe “mamenoa ty tany” le “anjakao ty tany.” (Gen. 1:28) Midika raha zay fa ho lasa paradisa tany toy iaby lafa afara any. Mila manoriky ani-didy io koa ze hiay mandrakizay an-tany etoy. Fe tsy avy le ho paradisa tany toy satria fa tsy eo sasy zaridainani-Edena iny. Lafa tampitsy ty Aramagedona, le hisy asa maro hataontsika mba hanadiova ani-ze raha nisimba tan-tany etoy. Tena ho asa be raha zay!

Mampitiaro antsika ty asa nataoni-Israelita rey raha zay lafa rozy nimpoly baka a Babylona any. Tsy nisy olo nipetraky mihintsy tamy tanàn-drozy iny teo tanatini-70 tao. Fe naminany Isaia hoe hotahini-Jehovah rozy, ka ho vitan-drozy ty hampimpoly ani-tanà iny manahaky ty taloha ndraiky. Zao ty raha nivolanini-faminania iny: “Hataony manahaky ani-Edena ty liomonto any, le hanahaky ty zaridainani-Jehovah ty sakasaka maiky.” (Isaia 51:3) Nampeani-Jehovah Israelita rey ka nivitan-drozy ty nanasoasoa ani-tanin-drozy iny. Hotahini-Jehovah manahaky ani-zay koa ze handova ty tany ka ho vitan-drozy ty hanova ani-tany toy ho lasa paradisa soasoa. Ka ndre henanizao aza iha, le fa afaky mampiseho hoe maniry handramby anjara amy asa io.

Manao ani-zay, ohatsy, iha laha ataonao malio noho milamy avao ty tranonao noho ty manodidy anao. Afaky manao ani-zay avao iha ndre tsy malio aza ty olo tanà raiky aminao. Azonao atao koa ty manampy amy fanadiova noho fikojakojà Efitrano Fanjakà noho Efitrano Fivoriambe aminareo eo. Mety afaky mameno fangataha hanao asa an-tsitrapo hanampy tra-boina koa iha, laha afaky manao ani-zay. Asehonao baka amy zay hoe parè hanampy ani-rahalahy noho anabavinao reo iha lafa mila fanampea rozy. Eritsereto zao: ‘Misy raha azoko ianara va henanizao mba hampiasako, laha engàni-Jehovah handova ty tany aho?’

Rahalahy noho anabavy vitsivitsy manadio noho mikojakoja Efitrano Fanjakà.

PARÈ HIKARAKARA ANI-AZY HOVELOMY AMY MATY REY VA IHA?

Laha vo baka namelo ani-anakampelani-Jairo iny Jesosy, le nivola hoe tokony hamea raha hohaniny ajà iny. (Mar. 5:42, 43) Mety tsy ho sarotsy aloha ty mikarakara ajà ampela raiky 12 tao. Fe mba eritsereto hoe hanao akory lafa ho tanteraky fampitamanani-Jesosy iny hoe ‘haharè ty feony ze olo iaby an-dolo any, le hiboaky.’ (Jaona 5:28, 29) Azo antoky fa ho maro biby ty asa hataontsika amy fotoa zay. Marina fa tsy resahini-Baiboly hoe ino iaby ty raha hilàni-azy hovelomy amy maty rey, fe ndre zay le azontsika vetsevetse hoe tsy maintsy hila fanampea rozy mba hahazoan-drozy hany, siky, noho trano hipetraha. Ndre henanizao aza iha, le fa afaky mampiseho hoe parè hanampy. Amy fomba akory? Retoa misy fanontanea vitsivitsy azonao dinihy.

Ino ty azonao atao henanizao mba hampisehoa hoe parè handova ty tany iha?

Rahalahy noho anabavy falifaly mitsena vahiny hanatriky fivoriambe iraisam-pirenena, amy gara roplany a Paris any.

Manao akory lafa ampandrenesy amy fiangonanareo eo hoe hitsidiky anareo ty mpiandraikitsini-faritsy, parè hanasa azy hisakafo va iha? Ka lafa misy mpanompo manontolo andro manoka baka amy Betela any nitendrè amy fiangonanareo ao, na misy mpiandraikitsini-faritsy tsy afaky mitsidiky sasy, afaky manampy an-drozy hahita trano hipetraha va iha? Manao akory koa laha misy fivoriambe na fivoriambe manoka hatao an-tanànareo eo, afaky manao volontera hiasa va iha aloha na afarani-fivoriambe iny? Afaky mandramby vahiny va iha?

PARÈ HAMPIANATSY ANI-AZY HOVELOMY AMY MATY REY VA IHA?

Lafa tsika mamaky ty Asan’ny Apostoly 24:15, le mitamà tsika hoe ho maro biby ty olo hovelomy amy maty. Maro amin’olo rey ro tsy nahay ani-Jehovah talohani-nahafatesan-drozy. Fe afaky hahay azy ie lafa hovelomy ndraiky.a Hanampy an-drozy ty mpanompo-Ndranahary tsy nivaliky ka hampianatsy an-drozy. (Isaia 11:9) Tena fa tsy mahaliny ani-zay Charlotte, ranabavy nitory tan’Eropy, Ameriky Antimo, noho tan’Afriky any. Hoy ty asany: “Fa tsy liniko ty hampianatsy an’olo hovelomy rey. Lafa zaho mamaky tantaran’olo niay taloha rey, le matetiky aho mieritseritsy hoe: ‘Laha mba nahay ani-Jehovah zao olo toy e, le tsy ho nanahaky ani-zao ty fiainany.’ Fa tsy liniko ty hiresaky mikasiky ani-Jehovah amin’olo hovelomy rey noho hivola amin-drozy hoe ho soasoa biby ty fiainan-drozy laha manompo azy rozy.”

Ndre mpanomponi-Jehovah tsy nivaliky niay talohani-Jesosy rey aza mbo hianatsy raha maro. Mba eritsereto moa hoe afaky hanazava amy Daniela ty fahatanterahani-faminania nisoratiny fe tsy nazava taminy rey iha! (Dan. 12:8) Tena hahafalifaly ty hanao ani-zay sady tombontsoa bevata. Na eritsereto hoe hiresaky amy Rota noho Naomy iha hoe baka amy fianakavian-drozy ty niboahani-Mesia. Ho falifaly biby tsika lafa hampianatsy ty olo iaby amy tany toy. Fa tsy hisy hanerisery noho hanakoronta manahaky amy tontolo raty toy eto sasy tsika amy zay.

Ranabavy manome taratasy mivalo ampela raiky amy efitsy fanasà lamba.

Ino ty azonao atao henanizao mba hampisehoa hoe parè hampianatsy ani-azy hovelomy amy maty rey iha? Azonao atao, ohatsy, ty miezaky mba hahay hampianatsy noho hitory tsy tampaky. (Mat. 24:14) Mety tsy hahavita be amy asa fitoria iha henanizao satria mety hoe fa antitsy na misy antony hafa. Fe afaky manao ze fara herinao avao iha. Asehonao amy zay hoe parè hampianatsy an’olo hovelomy rey iha.

Soa ty mieritseritsy ani-fanontanea bevata retoa: Tena fa tsy lininao vatany va ty handova ty tany? Fa tsy lininao va ty hanova ani-tany toy ho paradisa, hikarakara ani-azy hovelomy amy maty rey noho hampianatsy an-drozy? Afaky asehonao hoe parè hiay mandrakizay an-tany etoy iha laha mandramby anjara sandrany amy ze asa atao henanizao, satria asa mitovitovy amy reo avao ro hataonao lafa handova ty tany iha!

a Henteo ty lahatsoratsy hoe “Manampy Olo Maro mba Hanaraky ty Fahamarina”, amy Tilikambo Fiambena Septambra 2022.