Akory ty Azoni-Anti-panahy Anahafa ani-Gideona?

1. Laha hentea ty 1 Petera 5:2, ino ty tombontsoa ananani-anti-panahy?

TENA lafovily amy Jehovah ty aondriny ka nitendreny ty anti-panahy mba hikarakara an-drozy. Nitendreni-Jehovah hanompo ani-rahalahy noho anabavin-drozy reo lahilahy mahafoy tena reo, ka rambesin-drozy ho tombontsoa bevata raha zay, le miezaky rozy mba “tena hiarakandro an-drozy.” (Jer. 23:4; vakio 1 Petera 5:2.) Tsy falifaly va tsika mana ani-lahilahy miasa mafy reo anivoni-fiangonantsika eo!

2. Ino ty raha sarotsy mety atrehini-anti-panahy sisany?

² Maro ty raha sarotsy atrehini-anti-panahy lafa rozy manao ty andraikitsin-drozy. Mila miasa mafy, ohatsy, ty anti-panahy mba hikarakarà ty fiangona. Zay mihintsy ty raha nitsapani-Tony, anti-panahy an’Etazinỳ any zay. Hitany hoe tsy maintsy nianatsy niambany ie satria fa maro biby ty andraikitsiny, kanefa mbo naneky hanao asa hafa avao ie. Ho zao ty nivolaniny: “Laha vo nanomboky arety mandripaky COVID-19 iny, le niezaky mafy aho nandamy fivoria noho fanompoa. Fe ndre fa maro biby aza ty raha nataoko, le mbo nisy raha maro hoasany avao nataoko. Nimaro loatsy ty raha nataoko, farany aho tsy nanam-potoa hamakia Baiboly, hianara, noho hivavaha.” Hafa koa ty raha sarotsy natrehini-Ilir, anti-panahy a Kosovo any toy. Nisarotsy aminy ty nanaraky ty toromariky baka amy fandamina lafa nisy aly tamin-drozy tany. Hoy ty asany: “Navaka biby aho lafa nitendreni-biròni-sampana hanampy ani-rahalahy noho anabavy amy faritsy mampidi-doza rey. Zaho moa navaka ka atao raha tsy azo orihy iaby ty fahitako ani-toromariky iny.” Sarotsy amy Tim, misionera an’Azỳ any koa ty hanao ze raha tokony hataony sanandro. Hoy ty asany: “Nahatiaro vozaky biby aho kindraiky ka tsy nikarakara ani-rahalahy noho anabavy reo.” Laha misy anti-panahy miatriky raha sarotsy manahaky ani-reo, ino ty afaky manampy azy?

3. Manino ro mahasoa antsika iaby ty mandiniky ty modelini-Gideona Mpitsara?

³ Afaky miana-draha baka amy modelini-Gideona Mpitsara ty anti-panahy. (Heb. 6:12; 11:32) Tsy vitani-hoe niaro ty vahoaki-Ndranahary avao ie fa nitariky an-drozy koa. (Mpits. 2:16; 1 Tan. 17:6) Manahaky ani-Gideona, le nitendreni-Jehovah hikarakara ty vahoakiny koa ty anti-panahy amy andro sarotsy henanizao. (Asa. 20:28; 2 Tim. 3:1) Niambany Gideona sady nanoriky ty safàni-Jehovah avao ka modely soa ho antsika. Tsy nimora taminy avao ty hoe hiaritsy lafa ie nanao ani-raha nanendrea azy iny. Ndre anti-panahy tsika ndre tsy anti-panahy, le afaky miezaky mafy tsika mba hankasitraky ani-anti-panahintsika reo. Afaky manoha ani-rahalahintsika miasa mafy reo tsika.—Heb. 13:17.

LAFA MISY RAHA METY HAHAVY ANAO TSY HIAMBANY

4. Akory ty nampisehoani-Gideona hoe niambany ie?

⁴ Lahilahy tena niambany Gideona. Lafa nivola taminy anjelini-Jehovah iny hoe ie ro nifilini-Jehovah hanafaky an’Israelita reo amy fampijaleani-Midianita, le niambany ie ka namaly hoe: “Ty fianakaviako ro farany ambany amy fokoni-Manase! Le zaho ro tsy misy dikany marè amy fianakaviani-babako.” (Mpits. 6:15) Nieritseritsy ie hoe tsy ho hainy raha ampanaovini-Jehovah azy iny. Fe tsy ho zay ty fahitani-Jehovah azy. Nahavita ani-raha iny avao Gideona satria nampeani-Jehovah.

5. Ombia ro mety ho sarotsy amy anti-panahy ty hiambany?

⁵ Miezaky mafy ty anti-panahy mba hampisehoa hoe miambany rozy amy ty raha iaby ataon-drozy. (Mika 6:8; Asa. 20:18, 19) Tsy mirengirengy rozy lafa misy raha hain-drozy na nivitan-drozy. Tsy mieritseritsy koa rozy hoe tsy misy dikany satria manao hadisoa. Fe mety ho sarotsy amy anti-panahy kindraiky ty hoe hiambany. Mety hekeny iaby, ohatsy, ze raha ampanaovy azy, bakeo sarotsy aminy ty manatanteraky ani-raha rey. Mety ho sarotsy aminy koa ty hiambany lafa misy olo mikinokino azy amy ty fomba anaovany ty andraikitsiny na midera azy. Akory ty azoni-anti-panahy anahafa ani-Gideona lafa miseho ty raha manahaky ani-zay?

6. Akory ty azoni-anti-panahy ampisehoa hoe miambany manahaky ani-Gideona rozy? (Henteo koa sary io.)

⁶ Mangataha fanampea. Ty olo miambany mahay hoe voafetra ty raha vitany. Nasehoni-Gideona hoe niambany ie satria nangataky fanampea tamin’olo hafa. (Mpits. 6:27, 35; 7:24) Manao manahaky ani-zay koa ty anti-panahy hendry. Hoy Tony, azy niresahintsika taloha eroy iny: “Haiko hoe voafetra avao ty raha vitako, fe mbo naneky hanao asa maro avao aho satria zay ty fomba nitezà ahy. Farany nianatsy mikasiky fiambanea zahay tamy fotoam-pivavahani-fianakavianay, le nanontaneako valiko hoe manao akory ty fahitany ahy. Nihenteako tamy jw.org ao koa ty video hoe Tahafo Jesosy ka Miezaha Hampiofana Noho Hatòky ty Hafa Sady Hizara Andraikitsy.” Lasa nila fanampea tamin’olo hafa amy zay Tony mba hanampy azy amy andraikitsiny rey. Ino ty vokany? Hoy ty asany: “Vita soa iaby ty asa amy fiangona eo, sady nanam-potoa hanatanjahako ty fifandrambesako amy Jehovah aho.”

7. Akory ty azoni-anti-panahy anahafa ani-Gideona lafa misy olo mikinokino an-drozy? (Jakoba 3:13)

⁷ Ka meloky lafa misy mikinokino anao. Mety ho sarotsy amy anti-panahy koa ty hiambany lafa misy olo mikinokino an-drozy. Mbo afaky manampy an-drozy ndraiky ty modelini-Gideona. Hainy hoe tsy lavorary ie, farany ie niezaky ho kalma avao lafa nivolambola azy Efraimita rey. (Mpits. 8:1-3) Tsy mba neloky zao Gideona lafa niresaky tamin-drozy. Nasehony hoe niambany ie ka nijanjininy soa raha nampeloky an-drozy iny, le nisoa fanahy ie lafa niresaky tamin-drozy. Lasa nikalma amy zay olo rey. Akory ty azoni-anti-panahy anahafa ani-Gideona? Hendry rozy laha mijanjy soa lafa misy mikinokino sady soa fanahy lafa miresaky. (Vakio Jakoba 3:13.) Hampisy filongoa anivoni-fiangona eo rozy laha manao ani-zay.

8. Ino ty tokony hataoni-anti-panahy lafa misy olo midera an-drozy? Manomeza ohatsy.

⁸ Jehovah ro ameo voninahitsy. Lafa baka nandresy ani-Midianina rey Gideona, le nidera azy ty olo. Fe Jehovah ro nameany voninahitsy. (Mpits. 8:22, 23) Akory ty azoni-rahalahy voatendry anahafa ani-Gideona? Tokony Jehovah ro amean-drozy voninahitsy lafa misy raha vitan-drozy. (1 Kor. 4:6, 7) Ndao atao hoe misy anti-panahy raiky mahay mampianatsy, le misy olo midera azy. Ino ty hataony? Afaky mivola ie hoe raha baka amy Safà-Ndranahary ao avao ampianariny io sady ty fandaminani-Jehovah koa mampiofana antsika. Afaky mieritseritsy ty anti-panahy lafa mampianatsy hoe manome voninahitsy ani-Jehovah va ie sa manao ze hahavy ty olo hieky azy. Diniho moa raha niainani-anti-panahy raiky mana anara Timothy toy. Lafa nivoatendry anti-panahy ie, le niteateany biby ty manao lahateny ho ahi-ty maro. Hoy ty asany: “Ta hanao fampidiran-dresaky lava be noho fanohara sarotsy aho. Lasa nidera ahy matetiky amy zay ty olo. Nampalahelo fa lasa nifantoky tamiko ty olo fa tsy nifantoky tamy Baiboly na tamy Jehovah.” Lafa nandeha ty fotoa, le nieky Timothy hoe nila nareny ty fomba fampianarany, amy zay mba tsy hifantoky marè aminy ty olo. (Ohab. 27:21) Ino ty vokany? Hoy Timothy: “Maro ty rahalahy noho anabavy mivola henanizao hoe nanampy an-drozy hiatriky problemo noho hiaritsy raha sarotsy, na hifandramby soa amy Jehovah ty lahateny ataoko. Lasa falifaly biby aho henanizao satria tsy mifantoky amiko ty olo, tsy manahaky taloha rey.”

LAFA SAROTSY AMINAO TY HANORIKY TY RAHA VOLANINI-JEHOVAH NA HO BE HERIM-PO

9. Nanino ro nisarotsy tamy Gideona ty nanoriky ty safàni-Jehovah noho nana herim-po? (Henteo sary amy fononi-gazety toy.)

⁹ Lafa nivoatendry hitariky ty Israely Gideona, le nila nanoriky ty safàni-Jehovah ie sady nila nana herim-po. Sarotsy fanendrea raiky nampanaovy azy zay satria mety ho nahafaty azy. Nivolanini-Jehovah ie mba handrava ani-alitarani-Bala namboarini-babany iny. (Mpits. 6:25, 26) Tafara atoy, lafa namory ani-maramila rey Gideona, le nivola taminy Jehovah hoe tokony hahenany kelikely ty isakini-maramila rey. Indroe mihintsy Jehovah ro nampanao azy ani-zay. (Mpits. 7:2-7) Nivolanini-Jehovah avao koa ie mba hanafiky ani-tobini-fahavalo rey amy andro haly.—Mpits. 7:9-11.

10. Manino ro mety ho sarotsy amy anti-panahy ty hanoriky ty raha volanini-Jehovah?

¹⁰ Tokony ho “parè hanoriky safà” ty anti-panahy. (Jak. 3:17) Parè hanoriky ty raha volanini-Soratsy Masy ty anti-panahy manoriky safà sady parè hanoriky toromariky baka amy fandamina-Ndranahary. Modely ho an’olo hafa zany ie. Fe mety ho sarotsy aminy ty hanoriky ty raha volanini-Jehovah. Mety hahazo toromariky maro, ohatsy, ie na niova tampoky raha rey ka lasa sarotsy aminy ty manoriky ani-raha rey. Mety hahazo toromariky ie amy raha sisany, le mety hisalasala ie laha mahasoa raha iny na azo orihy. Na mety ho voatendry hanao andraikitsy sarotsy mety hahavoan-draha azy ie. Akory ty azoni-anti-panahy anahafa ani-Gideona amy raha manahaky ani-zay?

11. Ino ty hanampy ty anti-panahy hanoriky ty raha volanini-Jehovah?

¹¹ Janjino soa ze toromariky amea anao sady oriho. Nahazo toromariky baka amy Ndranahary Gideona hoe akory ty fomba handravà ani-alitarani-babany iny, aia ty hanorena alitara vaovao ho ani-Jehovah, le biby manao akory ro hatao soro. Tsy nikinokino ani-toromariky namea azy iny Gideona. Raha nampanaovini-Jehovah azy iny mihintsy ro nataony. Mahazo toromariky baka amy fandaminani-Jehovah koa ty anti-panahy henanizao. Mety ho amy alalani-taratasy zay, na fampandrenesa, na toromariky hafa hanampy antsika ho voaaro, na hifandramby soa amy Jehovah. Teantsika anti-panahintsika reo satria manoriky soa ani-tari-dala baka amy fandaminani-Jehovah rey rozy. Lasa mandramby soa ty olo iaby anivoni-fiangona eo.—Sal. 119:112.

12. Akory ty azoni-anti-panahy anoriha ty Hebreo 13:17 lafa misy fanovà ataoni-fandaminani-Jehovah?

¹² Ka misalasala fa avy le manaova fanovà. Tiarovo fa nivola tamy Gideona Jehovah hoe tokony hampolỳ ty ankamaroani-maramilany rey. (Mpits. 7:8) Mety ho nieritseritsy Gideona hoe: ‘Mba mety avao va toromariky toy?’ Fe ndre zay, le norihini-Gideona avao raha nivolanini-Jehovah iny. Manahaky ani-Gideona ty anti-panahy laha manoriky ty raha ampanaovini-fandaminani-Jehovah an-drozy avao, ndre tsy mifanaraky amy ty eritseritsin-drozy aza raha iny. (Vakio Hebreo 13:17.) Tamy 2014, ohatsy, le novàni-Filan-kevi-pitantana ty fomba ahazoa Efitrano Fanjakà noho Efitrano Fivoriambe. (2 Kor. 8:12-14) Taloha, lafa misy fiangona mila Efitrano Fanjakà le amboarini-fandamina tse Efitrano iny, bakeo ty fiangona amy zay ro mandoa ani-drala iny. Fe henanizao, le ty fanomeza ho ani-asa maneran-tany ro ampiasani-fandamina lafa hanory Efitrano Fanjakà noho Efitrano Fivoriambe ho ani-ze pilasy mila ani-raha zay, ndre tsy manan-drala aza fiangona iny. Lafa nihaini-José raha zay, le nisalasala ie laha mety avao fanovà zay. Nieritseritsy ie hoe: ‘Hisy Efitrano Fanjakà ho vita avao amy zao? Aia koa hisy raha manahaky ani-zao!’ Ino ty nanampy ani-José haneky ani-toromariky io? Hoy ty asany: “Nampitiaro ahy ty Ohabolana 3:5, 6 hoe mila matoky ani-Jehovah aho. Tena nisy vokany soa fanapahan-kevitsy iny! Tsy vitani-hoe nahavita nanory Efitrano Fanjakà maro tsika fa lasa nihaintsika koa ty fomba ampiasà ani-fanomeza rey mba hisiani-fitovia.”

13. a) Ino ty raha natokisani-Gideona? b) Akory ty azoni-anti-panahy anahafa ani-Gideona? (Henteo koa sary io.)

¹³ Manàna herim-po mba hanaova ty sitraponi-Jehovah. Nanoriky ty raha nivolanini-Jehovah avao Gideona ndre navaka ie sady nampidi-doza raha nanendrea azy iny. (Mpits. 9:17) Lafa baka nahazo toky tamy Jehovah Gideona, le natoky tanteraky ie fa hanampy azy Ndranahary ka ho vitany ty hiaro ty vahoaki-Ndranahary. Manahaky ani-Gideona ty anti-panahy mipetraky amy tany andrarà ty asantsika rey. Be herim-po rozy ka mitariky fivoria noho fanompoa ndre ampitahory hoe hogadrà, hofotopotora, horoasy amy ty asany, na hampijalỳ.b Amy fijalea bevata, le mila mana herim-po ty anti-panahy mba hanoriha ze toromariky azon-drozy ndre mampatahotsy aza ty manoriky ani-raha iny. Mety hahazo toromariky, ohatsy, tsika hoe akory ty fomba hitoria ani-didim-pitsarà bevata iny, le ino ty tsy maintsy ataontsika mba ho avotsy lafa manafiky Goga baka Magoga.—Ezek. 38:18; Apok. 16:21.

LAFA SAROTSY AMINAO TY HIARITSY

14. Nanino ro nisarotsy tamy Gideona ty niaritsy?

¹⁴ Mpitsara Gideona ka tsy maintsy niasa mafy ie. Nitafihini-Gideona tamy andro haly Midianita rey ka nilay. Fe nihianiny rozy nanomboky tamy Sakasakani-Jezirela teo nana amy Vavaranoni-Jordana tany, ndre mety hoe nifeno ala ala aza lala iny. (Mpits. 7:22) Nieny amy zay va Gideona lafa ta Jordana teo? Aha! Ndre nivozaky ie noho lahilahy 300 niaraky aminy rey, le mbo nitsaky ani-vavarano iny avao ka nania ani-Midianita rey. Farany nitratsin-drozy Midianita rey, le niresin-drozy.—Mpits. 8:4-12.

15. Manino ro sarotsy amy anti-panahy kindraiky ty miaritsy?

¹⁵ Mety hahatiaro vozaky biby kindraiky ty anti-panahy lafa baka nikarakara ty fiangona noho ty fianakaviany. Laha zay ty raha miseho, akory ty azoni-anti-panahy anahafa ani-Gideona?

16-17. a) Ino ty nanampy ani-Gideona hiaritsy? b) Ino ty azoni-anti-panahy atokisa? (Isaia 40:28-31) (Henteo koa sary io.)

¹⁶ Matokisa fa hanome hery anao Jehovah. Natoky Gideona fa hanome hery azy Jehovah, le zay vatany ty nataoni-Jehovah. (Mpits. 6:14, 34) Nandeha tomboky, ohatsy, Gideona noho lahilahy niaraky aminy rey lafa nania ani-mpanjakani-Midianina roe lahy rey, kanefa mpanjaka rey nitikitsy rameva. (Mpits. 8:12, 21) Fe nampea-Ndranahary Israelita rey ka nahatratsy an-drozy, le nandresy tamy aly iny. Afaky miantehitsy amy Jehovah koa ty anti-panahy, zany hoe miantehitsy amy azy ‘tsy mety vozaky na mokotsy’ iny. Hameany hery rozy lafa mila ani-zay.—Vakio Isaia 40:28-31.

¹⁷ Diniho moa ty raha niainani-Matthew, anisani-Komity Mifandramby amy Hopitaly. Ino ty nanampy azy hiaritsy? Hoy ty asany: “Tsapako hoe tena marina ty raha volanini-​Filipianina 4:13. Matetiky aho lafa tena vozaky rey, le mahatsapa hoe tsy hahavita hanao ino ino sasy. Mivavaky amy Jehovah amy zay aho mba hanome hery ahy, amy zay aho mahavita manampy ani-mpiara-manompo amiko reo. Tsapako amy fotoa rey hoe manome hery ahy ty fanahini-Jehovah sady manampy ahy hiaritsy.” Manahaky ani-Gideona, le miasa mafy anti-panahintsika reo mba hikarakarà ty vahoakini-Jehovah ndre tsy mora aza ty manao ani-zay. Mazava ho azy fa tokony hiambany rozy, le hieky hoe voafetra avao ty raha azon-drozy atao. Fe afaky matoky rozy fa hijanjy ty fangatahan-drozy Jehovah sady hanome hery an-drozy mba hahavitan-drozy miaritsy.—Sal. 116:1; Fil. 2:13.

18. Laha hentea ty raha nianarantsika tato, akory ty azoni-anti-panahy anahafa ani-Gideona?

¹⁸ Maro biby ty raha azoni-anti-panahy ianara baka amy Gideona. Tokony hiambany ty anti-panahy ka tsy voatery hekeny iaby ze raha iaby ampanaovy azy. Tokony hiambany koa rozy lafa misy olo mikinokino an-drozy na midera an-drozy. Tokony hanoriky ty raha volanini-Jehovah noho be herim-po rozy, sirtò amy farany fa marìny zao. Mila matoky koa rozy fa ndre ino ino ty raha sarotsy mety hatrehin-drozy, le afaky hanome hery an-drozy Ndranahary. Azo antoky fa tena ankasitrahantsika mpiaraky aondry miasa mafy reo ka ‘tiavintsika noho hajantsika avao’ rozy.—Fil. 2:29.