Miezaha ho Parè Avao amy Androni-Jehovah

1. Ino ty tokony hataontsika mba ho avotsy lafa avy ty androni-Jehovah?

LAFA miresaky hoe “androni-Jehovah” ty Baiboly, le ty fotoa hitsaràni-Jehovah ty fahavalony noho hanavotany ty mpanompony ro teany hovolany. Nisy firenena sisany, ohatsy, nisazini-Jehovah taloha tany. (Isaia 13:1, 6; Ezek. 13:5; Zef. 1:8) Amy androntsika zao, le hanomboky amy fandravà ani-Babylona Bevata ty “androni-Jehovah” ka ho tampitsy amy aly Aramagedona. Ka laha ta ho avotsy amy “andro” io tsika, le mila mioma sandrany. Zay nahavy ani-Jesosy nampianatsy hoe tokony ho parè avao tsika amy “fijalea bevata” io, zany hoe hanao raha mitohy avao.—Mat. 24:21; Lioka 12:40.

2. Manino ro mahasoa antsika ty mandiniky ty 1 Tesalonianina?

² Amy taratasiny voalohany ho ani-Tesalonianina rey ao apostoly Paoly, le nampiasa fanohara maromaro mba hanampea ty Kristiana ho parè avao amy andro fitsaràni-Jehovah. Haini-Paoly aloha hoe tsy ho avy tamy fotoa zay ty androni-Jehovah. (2 Tes. 2:1-3) Fe ndre zay, le nampirisiky ani-mpiara-manompo aminy rey ie mba hioma amy andro io ka hanao an-tsay hoe sahala ho avy hamaray raha io. Azontsika orihy koa torohevitsiny zay. Ndao hodinihintsika ty raha niresahiny mikasiky ani-raha retoa: 1) Manao akory ty hiaviani-androni-Jehovah? 2) Ia ty tsy ho avotsy amy andro io? Le 3) ino ty azontsika atao laha teantsika ty ho avotsy?

MANAO AKORY TY HIAVIANI-ANDRONI-JEHOVAH?

3. Manino ty fiaviani-androni-Jehovah ro ampitovizy amy mpangalatsy amy haly io? (Henteo koa sary io.)

³ “Manahaky mpangalatsy amy haly io.” (1 Tes. 5:2) Io ty voalohany amy fanohara telo nampiasani-apostoly Paoly mba hiresaha ty fiaviani-androni-Jehovah. Manao raha malaky matetiky ty mpangalatsy sady avy amy andro haly tsy eritseretin’olo mihintsy. Ho avy tampoky manahaky ani-zay koa ty androni-Jehovah ka tsy hampoizini-ankamaroan’olo. Ndre ty Kristiana marina koa aza tsy hanampò ty hiaviani-andro io, satria ho avy tampoky raha io. Fe tsy manahaky olo raty fanahy rey tsika, satria tsy ho ripaky.

4. Manino ty androni-Jehovah ro ampitovizy amy ampela marary tsongoen-jaza rey?

⁴ “Manahaky ampela marary tsongoen-jaza rey.” (1 Tes. 5:3) Ty ampela raiky bevoka mahay hoe tsy maintsy hihetsi-jaza ie. Fe tsy hainy hoe ombia ty hisehoani-raha zay. Fe lafa miseho raha iny, le atao raha tampoky azy, marary, sady tsy mienieny. Manahaky ani-zay koa fa tsy haintsika ty andro noho lera hiaviani-androni-Jehovah. Fe matoky tanteraky tsika hoe tsy maintsy ho avy raha io sady ho tampoky ty fitsarà-Ndranahary ty olo raty fanahy. Tsy hisy afaky hiala ani-raha zay.

5. Manino ty fijalea bevata ro ampitovizy amy hazavà maray rey?

⁵ Manahaky hazavà vo maray rey. Miresaky mikasiky mpangalatsy amy haly ndraiky Paoly amy fanohara fahatelo toy. Fe amy raiky toy, le atao raha nampitovizini-Paoly amy hazavà vo maray ty androni-Jehovah. (1 Tes. 5:4) Mety ho tandrena mpangalatsy rey ka tsy ambiambiny hoe kay mandeha ty fotoa. Mety ho tratsini-tsirikandro ie, farany ho tratsy. Hanahaky hazavà amy maray rey koa ty fijalea bevata. Tsy hampoizin’olo manahaky mpangalatsy ty hiaviani-andro io, satria mijano amy maìky ao avao rozy zany hoe mbo manao raha hala-Ndranahary avao. Fe tsy manahaky an-drozy tsika, satria parè hanalavitsy ty raha halani-Jehovah le miezaky ho ‘soa toetsy noho manao ty marina.’ (Efes. 5:8-12) Bakeo Paoly niresaky fanohara roe rezay mba hivolana ani-ze tsy ho avotsy amy androni-Jehovah io.

IA TY TSY HO AVOTSY AMY ANDRONI-JEHOVAH?

6. Manino ro azo volany hoe miroro ty ankamaroan’olo? (1 Tesalonianina 5:6, 7)

⁶ “Ze miroro.” (Vakio 1 Tesalonianina 5:6, 7.) Nampitovizini-Paoly amin’olo miroro ze olo tsy ho avotsy amy androni-Jehovah. Tsy hain’olo matory hoe ino ty raha miseho manodidy an-drozy, le tsy ambin-drozy hoe mandeha ty fotoa. Farany tsy hain-drozy lafa misy raha raiky bevata miseho sady tsy afaky manao raha rozy. Miroro ara-panahy koa ty ankamaroan’olo henanizao. (Rom. 11:8) Tsy inoan-drozy ty porofo mampiseho hoe fa miay amy andro farany tsika, sady kely sisa le ho avy ty fijalea bevata. Lafa misy raha bevata miseho amy tontolo toy, le manjary kinto amy ty hafatsy torintsika ty olo sisany. Fe ndre zay, le mbo mimpoly miroro ndraiky ty ankamaroan-drozy fa tsy mba mifoha. Mino ty olo sisany hoe tsy maintsy hitsara ty olombelo Ndranahary, fe mieritseritsy rozy hoe mbo ho ela fotoa zay. (2 Pet. 3:3, 4) Fe arakarakini-andehanani-fotoa, le vomaiky mila mifoha ara-panahy avao tsika.

7. Manino ro ampitovizy amin’olo mamolava ty olo haripaki-Ndranahary?

⁷ ‘Ty olo mamolava.’ Nampitovizini-apostoly Paoly amin’olo mamolava ze olo haripaki-Ndranahary. Tsy maharaky ty raha miseho manodidy azy ty olo mamolava sady tsy mahay ze tokony hataony. Manahaky ani-zay koa fa tsy midary ty fampitandrema-Ndranahary ty raty fanahy. Aleon-drozy manao ze metimety amin-drozy, kanefa mitariky an-drozy ho amy fandripaha raha zay. Fe ampirisihy ty Kristiana mba handiniky soa avao. (1 Tes. 5:6) Mivola manam-pahaiza raiky mikasiky Baiboly zay hoe: “Ty olo mandiniky soa avao, le tsy taitaitsy sady tsy matahotsy. Lasa afaky mieritseritsy soa ie ka mahay manapa-kevitsy.” Fa manino tse moa tsika ro tsy tokony ho taitaitsy? Amy zay tsika tsy ho tafilitsy amy resaky politiky na problemo amy fiaraha-monina eo. Vomaiky hiforosè antsika hilitsy amy raha reo ty olo arakaraky ty iaviani-androni-Jehovah. Fe tsy tokony hiasa loha tsika hoe hanao akory tsika amy fotoa zay. Afaky manampy antsika ho kalma avao noho tsy hiovaova hevitsy ty fanahi-Ndranahary. Afaky manampy antsika hahay hanapa-kevitsy koa raha io.—Lioka 12:11, 12.

INO TY AZONTSIKA ATAO MBA HIOMANA AMY ANDRONI-JEHOVAH?

8. Ampitovizini-​1 Tesalonianina 5:8 amin’ino ty toetsy hanampy antsika hiamby avao noho handiniky soa avao? (Henteo koa sary io.)

⁸ ‘Manaova fiarovan-tratra noho fiarovan-doha.’ Ampitovizini-Paoly amy maramila miamby soa noho parè hialy rey tsika. (Vakio 1 Tesalonianina 5:8.) Tokony ho parè avao ty maramila ndre mbia ndre mbia misy aly. Manahaky ani-zay koa tsika. Tokony ho parè avao tsika amy androni-Jehovah iny ka hisiky ty finoa noho ty fitiava ho fiarovan-tratra, sady hisiky ty fitamana ho fiarovan-doha. Tena manampy antsika toetsy reo.

9. Manino ro miaro antsika ty finoantsika?

⁹ Natao hiarova ty foni-maramila ty fiarovan-tratra. Miaro ty fontsika an’ohatsy koa ty finoa noho ty fitiava. Hanampy antsika hanompo a Ndranahary avao noho hanori-dia ani-Jesosy raha reo. Manampy antsika hatòky ty finoa hoe hamaly soa antsika Jehovah laha mila azy amy fontsika iaby tsika. (Heb. 11:6) Lasa tsy ta hivaliky amy Jesosy, azy Mpitariky antsika iny tsika, ndre tsy maintsy miatriky raha sarotsy aza. Afaky manatanjaky ty finoantsika tsika, amy zay afaky miatriky raha sarotsy. Ho vitantsika ty hanao ani-zay laha mandiniky ty modelini-mpanomponi-Jehovah amy henanizao rey tsika. Tsy nivaliky avao rozy ndre nenjehy na tsy nanan-drala. Tsy ho tea drala na hanana tafahoatsy koa tsika laha manahaky ani-azy nanatsotra fiaina ka nanao voaloha lista ani-Fanjakà iny rey.b

10. Manino ty fitiavantsika a Ndranahary noho ty mpiara-belo amintsika ro manampy antsika hiaritsy?

¹⁰ Mila mana fitiava koa tsika laha teantsika ty hiamby avao noho handiniky soa avao. (Mat. 22:37-39) Laha tea a Ndranahary tsika, le hahavita hitory avao ndre mety hiatriky raha sarotsy aza. (2 Tim. 1:7, 8) Teantsika ty olo tsy mitovy finoa amintsika ka tsy mieny mitory tsika sady miezaky mamita soa ty faritanintsika. Mitory an-telefony noho an-taratasy mihintsy aza tsika. Tsy kivy tsika fa mbo mitamà avao hoe hiova olo rey ndraiky andro any ka hanomboky hanao raha soa.—Ezek. 18:27, 28.

11. Manino ro manampy antsika ty fitiavantsika ty mpiara-manompo? (1 Tesalonianina 5:11)

¹¹ Teantsika koa ty rahalahy noho anabavintsika. Asehontsika hoe teantsika rozy laha miezaky ‘mifampahery noho mifanampy avao’ tsika. (Vakio 1 Tesalonianina 5:11.) Mifanoha ty maramila lafa an’aly any. Manahaky ani-zay koa ty ataontsika, mifampahery tsika. Mety handràtsy ty namany ty maramila raiky lafa an’aly any, fe tsy kinahiny mihintsy ty hanao ani-zay. Manahaky ani-zay koa fa tsy hataontsika kinahy mihintsy ty hanao raha mampalahelo ani-rahalahy noho anabavintsika reo, na mamaly faty an-drozy. (1 Tes. 5:13, 15) Asehontsika koa hoe be fitiava tsika laha manaja ani-rahalahy mitariky anivoni-fiangona eo rey. (1 Tes. 5:12) Tamy Paoly nanoratsy ani-taratasy toy, le mbo tsy ampy tao raiky ty niforonani-fiangona ta Tesalonika tao. Mety mbo tsy niampy traikefa zany ty rahalahy nitariky ani-fiangona io sady mety nanao hadisoa. Fe ndre zay, le maeva hohajà avao rozy. Fa mihamariny ty fijalea bevata ka vomaiky tsika mila miantehitsy amy anti-panahy anivoni-fiangona eo mba hahazoa toromariky. Mety tsy hahazo toromariky baka amy foibe any tsika na baka amy biròni-sampana. Tena mila miezaky ho tea noho hanaja ani-anti-panahintsika reo zany tsika amy henanizao. Ndre ino ino miseho, le tokony handiniky soa avao tsika, zany hoe tsy hifantoky amy tsy fahalavorarian-drozy tsika fa hieritseritsy avao hoe mampiasa ani-Kristy Jehovah, mba hitariky ani-lahilahy tsy mivaliky reo.

12. Manino ty raha tamanintsika ro miaro ty saintsika?

¹² Miaro ty lohani-maramila ty fiarovan-doha. Manahaky ani-zay koa fa miaro ty saintsika noho manampy antsika hieritseritsy soa ty fitamana fanavota. Laha mafy fototsy soa ty raha tamanintsika, le ho haintsika hoe tsy misy dikany ty raha ameani-tontolo toy. (Fil. 3:8) Hanampy antsika ho kalma noho tsy hatahotsy ty fanana fanantenà. Zay mihintsy ty nitsapani-Wallace noho Laurinda manompo an’Afriky any. Tanatini-telo herinandro avao, le nimaty ty renini-Laurinda noho babani-Wallace. Vokatsini-COVID-19 iny, le tsy afaky noly rozy mba hampahery ty fianakavian-drozy. Hoy Wallace: “Haiko hoe hovelomy ty maty. Tena nanampy ahy raha zay. Lafa mieritseritsy an-drozy aho le tsy mifantoky amy fotoa farany niainan-drozy tamy tontolo toy eto, fa vetsevetseko avao ty fotoa hameloma an-drozy amy tontolo vaovao any. Manampy ahy ho kalma avao raha zay lafa zaho malahelo na kivy.”

13. Ino ty azontsika atao mba hahazoa fanahy masy?

¹³ “Ka vonoa ty afoni-fanahy.” (1 Tes. 5:19) Mivola Paoly hoe sahala amy afo anatintsika ao ty fanahy masy. Lafa miasa amintsika ty fanahy masi-Ndranahary, le mazoto noho mafana fo hanao raha soa tsika sady mazoto miasa ho ani-Jehovah. (Rom. 12:11) Ino ty azontsika atao mba hahazoa fanahy masy? Afaky mangataky ani-raha io amy vavaky tsika, mianatsy ty Safà-Ndranahary, noho manao ze raha ampanaovini-fandamina antsika, ohatsy hoe mivory. Hana toetsy anisani-“vokatsini-fanahy” tsika laha manao ani-zay.—Gal. 5:22, 23.

14. Ino ty raha tsy tokony hataontsika laha ta hahazo ty fanahi-Ndranahary avao tsika? (Henteo koa sary io.)

¹⁴ Lafa mahazo ty fanahy masi-Ndranahary tsika, le mila miamby soa mba ‘tsy hamono ty afoni-fanahy.’ Ze olo mana eritseritsy malio noho malio fandaisam-bata avao ro amea-Ndranahary ani-fanahiny io. Tsy hameany ty fanahiny sasy tsika laha mieritseritsy raha raty le bakeo manatanteraky ani-raha iny. (1 Tes. 4:7, 8) ‘Tsy tokony hanambanimbany ty faminania’ koa tsika laha teantsika ty hahazo ani-fanahy masy io avao. (1 Tes. 5:20) Tsy ino “faminania” resahiny etoa io fa ty hafatsy baka amy fanahy masi-Ndranahary. Tafilitsy amy hafatsy io ty mikasiky ty androni-Jehovah noho ty hoe fa marìny ty farany. Tsy tokony hieritseritsy mihintsy tsika hoe tsy ho avy amy androntsika zao ty androni-Jehovah na ty Aramagedona. Vomaiky aza tokony asehontsika fa mino tsika hoe tena fa marìny andro io. Manao ani-zay tsika laha miezaky halio fandaisam-bata avao noho ‘mahafoy tena ho a Ndranahary’ avao sanandro.—2 Pet. 3:11, 12.

“HAMARINO SOA TY RAHA IABY”

15. Ino ty tokony hataontsika mba tsy ho voafitaky lafa misy vaovao tsy marina noho hevitsy diso aparitakini-demonia? (1 Tesalonianina 5:21)

¹⁵ Tsy ho ela, le hanao fanambarà ty mpanohitsy a Ndranahary hoe: “Fiadana noho filamina!” (1 Tes. 5:3) Hanaparitaky hevitsy diso amy tany toy iaby ty demonia mba hamitaha ty olo. (Apok. 16:13, 14) Ka manao akory ty amintsika? Tsy ho voafitaky tsika laha ‘hamarinintsika soa ty raha iaby.’ (Vakio 1 Tesalonianina 5:21.) Ty safà grika nadika hoe ‘manamarina soa’, le nampiasà mba hivolana ty raha ataon’olo raiky mitesta volamena na volafoty mba hahaiza hoe tena izy va raha iny sa sandoky. Tokony hanao manahaky ani-zay koa zany tsika lafa misy raha rentsika na vakintsika, mba hahaizantsika hoe marina va raha iny. Tena nila nanao ani-zay Tesalonianina reo, le vomaiky mila manao ani-zay koa tsika henanizao sirtò amy fijalea bevata fa marìny zao. Tsy tokony ho mora maneky ze raha volanin’olo tsika fa mila mampiasa ty saintsika, le ampitovizintsika amy ze raha volanini-Baiboly noho ty fandaminani-Jehovah ty raha vakintsika na rentsika. Laha manao ani-zay tsika, le tsy ho voafitaky ndre ino ino vandy ataoni-demonia.—Ohab. 14:15; 1 Tim. 4:1.

16. Ino ty raha soasoa tamanintsika, le tapa-kevitsy hanao ino tsika?

¹⁶ Haintsika fa ho tafaboaky velo amy fijalea bevata ty vahoaki-Ndranahary amy fitambarany. Fe tsy haintsika kiraidraiky hoe ino ty raha hiseho hamaray. (Jak. 4:14) Ka ndre ho velo zisiky iaviani-fijalea bevata tsika ndre ho maty alohani-zay, le hahazo fiaina mandrakizay tsika laha tsy mivaliky mihintsy. Hiaraky amy Kristy an-danitsy any ty voahosotsy, le ty aondry hafa hiay amy paradisa an-tany etoy. Soa lahy tsika laha mieritseritsy avao ani-raha soasoa tamanintsika io sady miezaky ho parè avao amy androni-Jehovah!