Ino ty Hanampy Anao ho Tamà laha Nifindra Fiangona Iha?

Nisy raha sarotsy hafa koa natrehin’i Nicolas noho Céline. Nivolanin’ny sampan’i Fransy rozy mba hifindra fiangona vaovao. Nivola rozy hoe: “Tena nifalifaly zahay tamy voalohany, fe lafa nandeha ty fotoa le nanomboky nimany an’ny namanay rey zahay. Mbo tsy de nifankazatsy amy mpiara-manompo tamy fiangonanay vaovao iny tao zahay tamy zay.”a Hitantsika baka amy zay fa tena tsy mora ty mifindra fiangona. Ka ino ty hanampy anao ho falifaly avao laha mifindra fiangona iha? Ino ty azon’olo hafa atao mba hanampea anao? Le ino ty fitahia mety ho azonao noho ho azon’ny mpiara-manompo amy fiangonanao vaovao iny ao?

TOROLALA EFATSY HANAMPY ANAO

1. Miantehera amy Jehovah. (Sal. 37:5) Nivoatendry hiasa an-tany hafa any ty valin’ny ranabavy Kazumi, mipetraky a Japon any. Voatery niala tamy fiangona nisy azy zany Kazumi. Fa tao avao ie tanatin’ny 20 tao. Ino ty nataony mba ‘hanankina ty lalany amy Jehovah’? Hoy ty asany: “Natahotsy aho, nahatiaro nangiky, sady niasa loha. Farany naborako tamy Jehovah iaby ze tam-poko tao. Nameany ze hery nilàko aho saky nanao ani-zay.”

Ino ty azonao atao mba hahavy anao hiantehitsy kokoa amy Jehovah? Eritsereto, ohatsy, ty hazo. Mila rano noho sakafo baka amy tany eo ie zay vo mitombo. Manahaky ani-zay koa ty finoantsika. Mila rano noho hany ara-panahy raha io laha teantsika hatanjaky. Hitan’i Nicolas, azy niresahintsika taloha eroy iny hoe lasa natoky kokoa an’i Jehovah ie lafa nametsivetsy ty modelin’i Abrahama, Jesosy, noho Paoly. Samby nahafoy raha maro olo reo mba hanaova ty sitrapo-Ndranahary. Laha mianatsy tsy tampaky ty Baiboly iha, le ho vitanao ty hiatriky ze fanovà miseho amy fiainanao. Tsy zay avao fa ho afaky hampahery ty olo hafa amy fiangonanao vaovao iny ao koa iha.

2. Ka tea mampitaha. (Mpito. 7:10) Baka a Bénin any Jules, le nifindra a Etazinỳ any. Tena nila niezaky ie mba hizatsy ty kolontsay any. Hoy ty asany: “Tsapako hoe tsy maintsy niresaky ty raha iaby mikasiky ahy aho saky niresaky amin’olo vo sambany hitako.” Tsy nahazatsy azy raha zay, farany ie nanomboky nihatakataky an’ny rahalahy noho anabavy reo. Fe lafa nahay soa an-drozy ie le niova ty fahitany an-drozy. Nivola ie hoe: “Tsapako henanizao fa ndre aia ndre aia ty misy antsika, le mitovy iaby lafa atao olombelo. Ty fivolanan-drozy noho ty raha ataon-drozy avao ro samby hafa. Engao hana ty maha izy azy ty olo.” Ka ampitahà amy fiangona nisy anao taloha iny zany fiangonanao vaovao io. Hoy Anne-Lise, ranabavy mpisava lala: “Nifindra aho satria ta hahay raha vaovao, fa tsy hoe satria mbo mitamà hoe hitovy tanteraky amy tranoko taloha iny azy vaovao toy.”

Mila mitandrina koa ty anti-panahy mba tsy hampitaha ty fiangonany taloha amy fiangonany vaovao iny. Mety tsy mitovy tamy fiangona nisy anao taloha iny ty fomba fiasan’ny rahalahy amy fiangonanao vaovao iny eo, fe tsy midika zay hoe tsy mety ty fanaovan-drozy azy. Aleo tse miezaky hahay soa ty raha misy amy tanà iny eo zay vo manome soso-kevitsy. (Mpito. 3:1, 7b) Soa laha miezaky ho modely iha fa tsy miforosè ty fiangona hanaraky ty hevitsinao.​—2 Kor. 1:24.

3. Miezaha hanoha an’ny fiangonanao vaovao iny. (Fil. 1:27) Mandany fotoa noho hery ty mifindra, fe ndre zay tsy tokony hataonao ambanin-draha mihintsy ty fivoria. Tokony hivory mivanta miaraky amy fiangona aza iha laha mbo azo atao. Sady akory moa ty hahafahan’olo amy fiangonanao vaovao iny ao hanampy anao laha tsy mahita anao mihintsy rozy, na zara laha mahita anao? Nifindra amy tanà bevata an’Afriky Antimo any Lucinda miaraky amy anakampelany roe rezay. Hoy ty asany: “Nanoro hevitsy ahy avao ty namako hoe soa aho laha miezaky mifankazatsy amin’olo amy fiangonako vaovao iny ao, miaraky manompo amin-drozy, sady mandramby anjara lafa mivory. Nivolaninay koa ranadahy rey hoe azo anaova fivoria alohan’ny fanompoa ty aminay ao.”

Misy asa maro biby amy fiangona eo. Mila miaraky miasa amy rahalahy noho anabavy amy fiangonanao vaovao iny zany iha satria hanampy anao “hino ty vaovao soa avao” raha zay. Nampirisihin’ny anti-panahy, Anne-Lise, azy niresahintsika taloha eroy iny mba hiezaky hitory miaraky amin’olo iaby amy fiangonany vaovao iny. Ino ty vokany? Hoy ty asany: “Tsiela avao aho le fa nahatsapa hoe tena anisan’ny fiangona iny lafa nanao ani-zay.” Laha iha koa manao asa an-tsitrapo, ohatsy hoe manadio noho mikarakara Efitrano Fanjakà, le asehonao hoe fiangonanao vatany ty ao. Arakaraky ty iarahanao miasa amy fiangona iny ro hahavy ty mpiara-manompo ho tea miaraky aminao. Ndre iha koa aza hahatsapa hoe fianakavianao rozy.

4. Miezaha hahazo nama. (2 Kor. 6:11-13) Laha asehonao hoe midary olo iha, le ho mora amin-drozy ty hinama aminao. Miezaha zany ho avy aloha lafa hivory, le mijanojanona lafa rava fivoria iny, amy zay iha hanam-potoa hifampiresaha amin’olo. Miezaha hahay ty anaran-drozy. Laha iha mahatiaro ty anaran-drozy, mitsikitsiky, noho mora iresaha, le ho tean-drozy ty hiaraky aminao sady ho lasa mpinama tsy mifankafoy nareo.

Mety hiasa loha iha hoe akory ty fomba handrambesan’ny rahalahy noho anabavinao reo anao. Farany mety hataonao ze hahavy an-drozy ho tea anao ndre tsy tena zay aza ty maha izy anao. Engao zany rozy mba hahay ty tena maha izy anao. Tahafo Lucinda. Hoy ty asany: “Lasa mpinama biby zahay henanizao satria niezaky zahay mba hanasa an-drozy an-tranonay any.”

‘RAMBESO SOA TY OLO HAFA’

Mety ho sarotsy amin’olo sisany ty hilitsy amy Efitrano Fanjakà ao, laha mbo tsy zatsy azy ty olo ao. Ka ino ty azonao atao mba tsy hahatsapa ho zay azy vo mifindra amy fiangonanareo ao rey? Zao ty fampirisiha namean’ny apostoly Paoly: ‘Rambeso soa ty hafa manahaky ty nandrambesan’i Kristy anareo.’ (Rom. 15:7) Laha manahaky an’i Kristy ty anti-panahy, le afaky manampy ty olo vaovao mba tsy hihafahafa fa hahatiaro hoe voaramby soa. (Henteo ty efajoro hoe “Ino ty Azonao Atao mba Hilamy ty Raha Iaby lafa iha Mifindra?”) Fe tsy ty anti-panahy avao ro afaky manampy ty hafa fa ty olo iaby amy fiangona eo, anisani-zay ty ajà.

Mandramby soa ty hafa, ohatsy, iha laha manasa azy an-tranonao any noho manampy azy. Nisy ranabavy raiky zay, ohatsy, nanampy ranabavy vo nifindra amin-drozy any zay. Nandesiny nitety an’ny tanà iny ranabavy iny, le natorony noho nihazavaniny taminy ty fitatera misy any, ohatsy hoe bisy noho train. Tena nidosiky ty fon’ny ranabavy iny raha nataony zay ka lasa nitamà soa ie.

METY HANAMPY ANAO HANDROSO ARA-PANAHY

Elaela ty elatsin’ny valala vo mahavita mitily lafa baka niofoky. Manahaky ani-zay koa lafa iha mifindra fiangona. Mila alànao ze raha mety hanakasaka anao tsy hanompo an’i Jehovah. Hoy Nicolas noho Céline: “Mianatsy raha maro iha lafa mifindra. Nila namboly toetsy vaovao zahay mba hahafahanay hifankazatsy amin’olo noho tanà vaovao iny.” Nitantara ty soa niazon’ny fianakaviany koa Jean-Charles, azy niresahintsika taloha eroy iny. Hoy ty asany: “Lafa nifindra fiangona zahay, le lasa nihamatotsy ananay reo sady nifandramby soa tamy Jehovah. Vola vitsivitsy tafaran’ny nifindranay iny avao, le nisoratsy anara handramby anjara amy fianara manompo anakampelanay iny, le anakilahinay iny lasa mpitory tsy vita batisa.”

Manao akory laha tsy afaky mifindra amy pilasy mila mpitory maro iha, vokatsy ty raha iainanao? Mety azonao atao vasa ty mampihatra ty soso-kevitsy sisany tamy lahatsoratsy toy ato, amy zay mba mahatiaro velombelo ty fiangona misy anao. Miantehera amy Jehovah, le miezaha hiaraky miasa noho hinama amin’olo amy fiangonanareo eo, na anovo ze hahavy anao hinama soa avao amy ze olo fa namanao. Mety ho azonao atao koa ty manao raha mba hanampea ty vaovao na ze olo mila fanampea. Ty fitiava ro ahaiza ty tena Kristiana, ka laha manao ani-reo tsika le azo antoky fa hanampy ty olo hafa hifandramby soa amy Jehovah. (Jaona 13:35) Afaky matoky iha fa “tena mahafalifaly a-Ndranahary ty soro manahaky ani-zay.”​—Heb. 13:16.

Tsy mora aloha ty mifindra fiangona, fe maro ty Kristiana nahavita ani-zay sady vomaiky nifalifaly noho nazoto. Afaky hanao manahaky ani-zay koa zany iha! Hoy Anne-Lise: “Lasa nihamalalaky ty foko lafa nifindra fiangona aho.” Nieky koa Kazumi henanizao hoe lafa mifindra iha le “mahita fomba hafa anampean’i Jehovah anao.” Ka ino koa ty tsapan’i Jules? Nivola ie hoe: “Lasa nitamà aho lafa niezaky hahazo nama tamy fiangona eo. Tsapako henanizao hoe tena anisan’ny fiangonako vaovao io aho ka lasa tsy foiko koa ty hiala ao.”