Akory ty Nampisehoan’i Jesosy hoe Vatan-draha Taminy ty Anaran’i Jehovah?

1-2. a) Ino ty nataon’i Jesosy tamy haly talohan’ny nahafatesany iny? b) Ino iaby ty fanontanea hodinihintsika amy lahatsoratsy toy ato?

TAMY Kamisy haly 14 Nisana tao 33 A.K., le nankalaza Sakafo Harivan’ny Tompo niaraky tamy apostoliny rey Jesosy. Fa hainy tamy zay hoe fa marìny ty fotoa hamadihan’i Jodasy azy, le hampijalỳ ie sady hovonoan’ny fahavalony rey. Lafa baka nihina rozy, le niresaky raha maro nampahery an’ny apostoliny rey ie. Fe taloha kelikelin’ny hialan-drozy amy efitsy nihinanan-drozy iny ao, le nanao vavaky laliky Jesosy. Nisoratin’ny apostoly Jaona amy Jaona toko faha-​17 ao vavaky io.

² Hianatsy raha vitsivitsy baka amy vavakin’i Jesosy iny tsika amy lahatsoratsy toy ato. Ino ty raha nampiasa loha azy talohan’ny nahafatesany? Manino vavaky io ro manampy antsika hahay hoe ino ty vatan-draha taminy tamy fanompoany tan-tany etoy? Ndao hodinihintsika valin’ny fanontanea reo.

“FA NAMBARAKO AN-DROZY TY ANARANAO”

3. Ino ty nivolanin’i Jesosy mikasiky ty anaran’i Jehovah, le ino ty teany hovolany? (Jaona 17:6, 26)

³ Zao ty nivolanin’i Jesosy lafa nivavaky ie: “Fa nambarako an-drozy ty anaranao.” Indroe mihintsy ie ro nivola hoe nambarany an’ny mpianatsiny rey ty anaran’i Jehovah. (Vakio Jaona 17:6, 26.) Ino ty teany hovolany? Ta hivola va ie hoe tsy nahay an’ny anara io mpianatsiny rey? Jiosy mpianatsin’i Jesosy rey, ka azo antoky fa nahay soa ty anara-Ndranahary hoe Jehovah. Mimpolimpoly an’arivony amy Soratsy Hebreo ao anara io. Ka lafa nivola Jesosy hoe: “Fa nambarako an-drozy ty anaranao,” le tsy hoe nampianariny hahay ty anara-Ndranahary hoe Jehovah rozy, fa nampeany mba hahay soa mikasiky an’i Jehovah, zany hoe ty maha ie azy. Tafilitsy amy zay ty raha teany hatao amy tany toy noho amintsika olombelo, ty raha fa nataony, ty raha mbo hataony, noho ty toetsiny. Jesosy raiky avao ro afaky niresaky ani-reo tamin-drozy, satria tena mahay soa an’i Jehovah.

4-5. a) Akory ty hahavy ty anaran’olo raiky ho vatan-draha amintsika? b) Manino ty anaran’i Jehovah ro lasa vatan-draha tamy mpianatsin’i Jesosy rey?

⁴ Eritsereto hoe misy anti-panahy mana anara David amy fiangonanareo eo, le dokotera ie. Fa an-taony maro ty nahaizanao an’ny rahalahy io. Narary mafy amy zay iha ndraiky andro, ka nila dokotera. Farany iha nalefa malaky amy lapotaly iasan’ny rahalahy io any, le ie ty nanavotsy ty ainao. Azo antoky amy fotoa zay, fa lasa vatan-draha aminao anaran’ny rahalahy io! Tsy hoe anti-panahy avao ty fahaizanao an’i David manomboky eo, fa dokotera nanavotsy ty ainao koa.

⁵ Manahaky ani-zay koa, fa nahay ty anaran’i Jehovah mpianatsin’i Jesosy rey. Fe vomaiky lasa vatan-draha amin-drozy anara io lafa nampean’i Jesosy hahay soa an’i Jehovah rozy. Manino tsika ro mivola ani-zay? Satria nanahaky tanteraky ty toetsin’ny Babany Jesosy, na tamy raha nivolaniny na tamy raha nataony. Ka lafa nijanjy ty fomba fampianaran’i Jesosy noho nandiniky ty fomba nanandesany ty olo apostoliny rey, le lasa ‘nahay’ soa an’i Jehovah.​—Jaona 14:9; 17:3.

“ANARANAO NAMEANAO AHY INY”

6. Ino ty dikan’ny hoe namean’i Jehovah an’i Jesosy ty anarany? (Jaona 17:11, 12)

⁶ Zao ty nivolanin’i Jesosy lafa ie nivavaky ho an’ny mpianatsiny rey: “Arovo rozy mba hanomeza voninahitsy an’ny anaranao nameanao ahy iny.” (Vakio Jaona 17:11, 12.) Midika va zay hoe lasa Jehovah ty anaran’i Jesosy? Tsy zay mihintsy. Ty anaran’i Jehovah ro tean’i Jesosy hovolany amy hoe “anaranao” tamy vavaky nataony iny. Hita baka amy zay fa tsy niova hoe Jehovah ty anaran’i Jesosy. Ka ino zany ty tean’i Jesosy hovolany amy hoe fa namea azy ty anara-Ndranahary? Voalohany, solon-tenan’i Jehovah, Jesosy sady Mpanday ty Safàny. Niavy tamy anaran’ny Babany ie sady nanao fahagagà tamy anaran’ny Babany. (Jaona 5:43; 10:25) Ankoatsini-zay, ty anaran’i Jesosy le midika hoe “Jehovah ro Fanavota.” Tena misy ifandrambesany amy anara-Ndranahary zany ty anaran’i Jesosy.

7. Manino Jesosy ro afaky niresaky tamy anaran’i Jehovah? Hazavao amy ohatsy.

⁷ Laha misy olo raiky, ohatsy, irahin’ny filoham-pirenena, le sahala hoe solon-tenan’ny filoha iny ie, ka afaky miresaky amy anarany. Manahaky ani-zay koa Jesosy. Solon-tenan’i Jehovah ie, ka nana fahefà hiresaky amy anarany tamin’olo.​—Mat. 21:9; Lioka 13:35.

8. Manino Jehovah ro nivola hoe ‘manao raha amy anarany’ Jesosy ndre mbo tsy niavy an-tany etoy aza ie? (Eksodosy 23:20, 21)

⁸ Kaihin’ny Baiboly hoe “Safà” Jesosy satria ie ro nampiasàn’i Jehovah mba hanambara toromariky noho fanazavà tamy anany an-danitsy any reo noho ty olombelo an-tany etoy. (Jaona 1:1-3) Resahin’ny bokin’ny Eksodosy fa nandefa anjely hikarakara ty Israelita Jehovah tamy rozy tan-diomonto any. Azo inoa fa Jesosy anjely io. Lafa nivolanin’i Jehovah Israelita rey mba hanoriky ty safàn’ny anjely io, le hoy ty asany: “Satria manao raha amy anarako ie.”a (Vakio Eksodosy 23:20, 21.) ‘Manao raha amy anaran’i Jehovah,’ Jesosy satria ie ro tena nanamarina noho nanamasy ty anaran’ny Babany.

“BABA, AMEO VONINAHITSY TY ANARANAO”

9. Manino tsika ro mivola fa vatan-draha tamy Jesosy ty anaran’i Jehovah? Hazavao.

⁹ Fa niresahintsika hoe tena vatan-draha tamy Jesosy ty anaran’i Jehovah ndre mbo tsy niavy tan-tany etoy ie. Lafa tan-tany etoy ie, le nasehony tamy raha nataony koa hoe vatan-draha taminy ty anaran’i Jehovah! Zao ty nangatahin’i Jesosy tamy Jehovah lafa narìny ho tampitsy ty fanompoany: “Baba, ameo voninahitsy ty anaranao.” Avy le namaly Babany, ka nisy feo baka an-danitsy any nivola hoe: “Fa nanome voninahitsy azy aho, le mbo hanome voninahitsy azy ndraiky.”​—Jaona 12:28.

10-11. a) Ino ty nataon’i Jesosy mba hanomeza voninahitsy ty anaran’i Jehovah? (Henteo koa sary io.) b) Manino ty anaran’i Jehovah ro nila hamarìny noho hamasìny?

¹⁰ Nanome voninahitsy ty anaran’ny Babany koa Jesosy. Tamy fomba akory? Nanao ani-zay ie lafa niresahiny tamin’olo ty toetsy soasoa ananan’i Jehovah noho ty raha miavaky nataony. Fe tsy zay avao ty nataony mba hanomeza voninahitsy ty anaran’ny Babany. Nila nanamarina noho nanamasy ty anaran’i Jehovah ie.b Hita tamy vavaky nampianarin’i Jesosy ty mpanori-dia azy iny hoe vatan-draha taminy ty anaran’ny Babany. Hoy ty asany: “Babanay an-danisy any, enganè hohamasìny ty anaranao.”​—Mat. 6:9.

¹¹ Manino ty anaran’i Jehovah ro mila hamarìny noho hamasìny? Satria nanala-baraka noho nandratiraty an’i Jehovah Ndranahary, Satana tamy zariday Edena tany. Nivola Satana hoe mpavandy Jehovah sady misy raha soa tokony hameany an’i Adama noho Eva, fe tsy ameany an-drozy. (Gen. 3:1-5) Nivola koa Satana fa tsy ara-drariny ty fomba fanaovan’i Jehovah raha. Nanaparitaky vandy mikasiky an’i Jehovah, Satana, ka mety hieritseritsy ty olo hoe raty fanahy Jehovah. Tafara atoy, zany hoe tamy andron’i Joba, le nivola Satana hoe manompo an’i Jehovah ty olo satria mahazo raha baka aminy. Ta hivola ndraiky ie hoe tsy tena tea an’i Jehovah ty olo, ka azo antoky fa tsy hanompo azy sasy lafa miatriky raha sarotsy. (Joba 1:9-11; 2:4) Tsy maintsy ho elaela zany vo ho voaporofo hoe Jehovah sa Satana ro tena mpavandy.

“MAHAFOY TY AIKO AHO”

12. Parè hanao ino Jesosy mba hiarova ty anaran’i Jehovah?

¹² Tea an’i Jehovah, Jesosy, ka nanao ze azony atao mba hanamarìna noho hanamasìna ty anaran’i Jehovah. Hoy Jesosy: “Mahafoy ty aiko aho.” (Jaona 10:17, 18) Zay vatany ty nataony, satria parè ho maty mihintsy ie mba hiarova ty anaran’i Jehovah.c Tsy nanoriky ty safàn’i Jehovah olombelo roe voalohany rey, zany hoe Adama noho Eva, fa nanaraky an’i Satana. Mifanohitsy amy zay, fa niparè ho an-tany etoy Jesosy sady nasehony hoe teany Jehovah. Nasehon’i Jesosy tamy raha nivolaniny noho nataony hoe tena tea an’i Jehovah vatany ie. (Heb. 4:15; 5:7-10) Tsy nivaliky tamy Jehovah mihintsy ie zisiky nahafaty azy tamy hazo fijalea teo.​—Heb. 12:2. Nasehony tamy zay hoe tea an’i Jehovah noho ty anarany ie.

13. Manino Jesosy ro tena soa pilasy mba hanaporofo hoe mpavandy Satana? (Henteo koa sary io.)

¹³ Nasehon’i Jesosy tamy raha iaby nataony hoe Satana ro tena mpavandy, fa tsy Jehovah! (Jaona 8:44) Tsy misy olo tena mahay soa an’i Jehovah mandilatsy an’i Jesosy. Laha nisy marina vandy nasaran’i Satana an’i Jehovah rey, le tsy maintsy ho nihain’i Jesosy. Fe matoa Jesosy niaro ty lazan’i Jehovah avao, na ty anarany, le tsy nisy marina vandy nataon’i Satana rey. Ndre nisy fotoa aza atao raha tsy niaro azy Jehovah, le parè ho maty avao Jesosy sady tsy nivaliky tamy Babany be fitiava iny mihintsy.​—Mat. 27:46.d

“VITAKO TY ASA NAMPANOVINAO AHY”

14. Ino ty fitahia namean’i Jehovah an’i Jesosy lafa ie tsy nivaliky?

¹⁴ Afaky nivola manahaky ani-zao Jesosy tamy vavaky nataony talohany nahafatesany iny: “Vitako ty asa nampanovinao ahy.” Natoky ie hoe hitahy azy Jehovah satria tsy nivaliky ie. (Jaona 17:4, 5) Tsy diso mihintsy Jesosy laha natoky an’i Babany. Tsy nengàn’i Jehovah hijano an-dolo ao avao ie. (Asan’ny apostoly 2:23, 24) Nivelominy Jesosy, bakeo nameany fahefà anabo an-danitsy any. (Fil. 2:8, 9) Lasa Mpanjakan’ny Fanjakà-Ndranahary koa Jesosy tafara atoy. Ino ty raha hataon’ny Fanjakà io? Zao ty tohin’ny vavaky modely nampianarin’i Jesosy iny: ‘Enganè ho avy ty Fanjakànao! Enganè hatao an-tany etoy ty [sitrapon’i Jehovah], manahaky ty an-danitsy any!’​—Mat. 6:10.

15. Ino koa ty raha hataon’i Jesosy?

¹⁵ Kely sisa, le hialy amy fahavalo-Ndranahary Jesosy sady handripaky ty raty fanahy amy Aramagedona. (Apok. 16:14, 16; 19:11-16) Tsy ela afarani-zay, le hatorakiny amy “lavaky mangoakoaky” any Satana, ka tsy afaky hanao ndre ino ndre ino. (Apok. 20:1-3) Hataon’i Jesosy hiada noho ho lavorary ndraiky ty olombelo amy Fanjakà Arivo Tao. Hovelominy koa ty maty, le hataony paradisa tany toy iaby. Ho tanteraky amy fotoa zay ty sitrapon’i Jehovah!​—Apok. 21:1-4.

16. Hanao akory ty fiaina lafa tampitsy ty Fanjakà Arivo Tao?

¹⁶ Ino ty raha hiseho lafa tampitsy ty Fanjakà Arivo Tao? Ho lavorary amy zay ty olombelo. Fa tsy hangataky fanengà hadisoa miory amy vilim-panavota sasy ty olo iaby, sady fa tsy hila mpanelanela na mpisoro. Le “ty fahavalo farany horavà, le ty fahafatesa.” Tsy hisy faty sasy zany ty an-dolo any satria hovelomy ty maty. Ho lasa lavorary iaby olo ty an-tany etoy amy fotoa zay.​—1 Kor. 15:25, 26.

17-18. a) Ino ty raha hiseho lafa tampitsy ty Fanjakà Arivo Tao? Ino ty hataon’i Jesosy lafa tampitsy ty fotoa nanjakàny? (1 Korintianina 15:24, 28) (Henteo koa sary io.)

¹⁷ Ino koa ty raha hiseho lafa tampitsy ty Fanjakà Arivo Tao? Hisy raha tena miavaky hiseho amy fotoa zay. Hilamy tanteraky amy zay alihevitsy mikasiky fanamasìna ty anaran’i Jehovah iny. Ino ty antony? Nivola Satana tamy zariday Edena tany hoe mpavandy Jehovah sady tsy mahay manday ty olombelo noho tsy manam-pitiava. Nanomboky tamy zay, le tsy maintsy niezaky nanaporofo avao ty mpanompon’i Jehovah hoe ty fandaisany ro tena soa. Ka lafa tampitsy ty Fanjakà Arivo Tao, le ho voamarina tanteraky hoe tsy mpavandy Jehovah. Ho voaporofo amy zay hoe be fitiava vatany Babantsika an-danitsy any ie.

¹⁸ Ho voaporofo afaran’ny Fanjakà Arivo Tao hoe vandy iaby raha nasaran’i Satana an’i Jehovah rey. Ino ty hataon’i Jesosy lafa tampitsy ty fotoa nanjakàny? Hanahaky an’i Satana va ie ka hizizo amy Jehovah? Aha! (Vakio 1 Korintianina 15:24, 28.) Hampolin’i Jesosy amy Babany Fanjakà iny. Haneky ty fandaisan’i Jehovah ie. Tsy manahaky an’i Satana, Jesosy, fa parè hahafoy ty raha iaby satria teany Jehovah.

19. Manino ty anaran’i Jehovah ro vatan-draha tamy Jesosy?

¹⁹ Azo antoky fa parè hanome ty anarany ho an’i Jesosy, Jehovah! Nasehon’i Jesosy hoe tena solon-tenan’ny Babany ie. Manino zany ty anaran’i Jehovah ro vatan-draha tamy Jesosy? Tena vatan-draha tamy Jesosy mandilatsy ty raha hafa anara io. Parè ho maty mihintsy ie mba hiarova an’ny anara io, sady parè hanome ty raha iaby ho an’i Jehovah lafa tampitsy ty Fanjakà Arivo Tao. Akory ty anahafantsika ty modely namean’i Jesosy? Hodinihintsika valin’ny fanontanea zay amy lahatsoratsy manaraky ao.