Fa Tsy Tokony Handay Tobily Sasy va Aho?

Fa an-taony maro ty nandaisanao tobily. Tena azonao tavy ty manday tobily sady afaky mandeha amy ze teanao hombà iha. Fe miasa loha ty fianakavianao noho ty namanao hoe tsy no fa tsy tokony handay tobily sasy iha. Tsy hainao hoe ino ty antony mahavy an-drozy miasa loha mikasiky ani-zay.

Miatriky raha manahaky ani-zay va iha? Laha zay ie, ino ty hanampy anao hahay hoe mbo tokony handay tobily va iha sa fa tsy tokony handay sasy?

Amy tany sisany, lafa be tao ty olo raiky fe mbo ta handay tobily, le mila mahazo alala amy dokotera ie vo afaky manday tobily ndraiky. Manoriky ty lalàna apetrakin’ny fanjakà ty Kristiana mipetraky amy tany rey any. (Rom. 13:1) Fe ndre tsy misy lalàna manahaky ani-zay ty aminareo any, le retoa misy soso-kevitsy hanampy anao hahay laha mbo tokony handay tobily iha.

DINIHO TY FOMBA FANDAISANAO TOBILY

Resahin’ny fikambana raiky ho an’ny be tao a Etazinỳ any fa azonao atao ty mametraky an’ny fanontanea retoa amy vatanao:

Sahira va aho lafa mamaky an’ny plaky famantara an-dala eny rey sa fa tsy mahita soa lafa haly?
Mbo afaky mitolitoliky va aho, ka mahavita manenty retrovizera noho mitoliky mana afara any?
Fa sahira va aho lafa manao fihetsiky malakilaky, ohatsy hoe mamototsy akseleratera mba hanitsaky frein?
Mandeha moramora va aho lafa manday tobily, ka lasa mampisy ambotaiazy?
Nanao aksidan matetiky va aho tato ho ato, sa lasa nisy kihikihy ty tobiliko satria nidraotsy raha lafa nandesiko?
Nisakanan’ny polisy va aho satria hafahafa ty fandaisako tobily?
Fa nisy fotoa va aho niazon-droro lafa nanday tobily?
Mihina fanafody mety hisy vokany amy fandaisako tobily va aho?
Fa matahotsy amy fomba fandaisako tobily va ty fianakaviako na ty namako?

Laha misy eka ty valin-teninao amy fanontanea reo, le tokony hanao fanovà iha. Mety hanapa-kevitsy tsy handay tobily matetiky, ohatsy, iha sirtò lafa haly. Diniho matetiky ty fomba fandaisanao tobily. Afaky anontaneanao ty fianakavianao na ty namanao ty fahitan-drozy anao lafa manday tobily iha. Azonao atao koa ty mianatsy hoe ino ty tokony hatao mba tsy hampisy loza lafa manday tobily. Fe laha eka ty ankamaroan’ny valin-teninao amy fanontanea anabo eo reo, le soa laha tsy manday tobily sasy iha.

AFAKY MANAMPY ANAO HANDRAMBY FANAPAHA-KEVITSY SOA TY TOROLALAN’NY BAIBOLY

Mety tsy ho ambinao hoe fa sahira iha lafa manday tobily. Mety tsy hahafaly anao koa ty firesaha hoe fa tsy tokony handay tobily sasy iha. Ino zany ty torolalan’ny Baiboly afaky manampy anao hahay handiniky noho handramby fanapaha-kevitsy soa? Retoa misy torolala roe.

Miezaha hiambany. (Ohab. 11:2) Lafa mihantitsy tsika, le manomboky tsy mahita soa, tsy maharè soa, mihareraky, sady fa tsy mahavita raha firy. Fa tsy manao sporo sisany, ohatsy, ty ankamaroan’olo lafa mihantitsy satria hain-drozy fa mora voan-draha rozy. Manahaky ani-zay koa, fa mety hanapa-kevitsy tsy handay tobily sasy ty olo miambany, lafa hitany hoe fa tsy tokony handay tobily ie. (Ohab. 22:3) Parè hijanjy noho handramby toro-hevitsy koa ty olo miambany, lafa miresaky aminy ty hafa hoe manaly mampatahotsy ty fandaisany tobily.—Ampitovizo amy 2 Samoela 21:15-17.

Miezaha mba tsy hana trosan-dio. (Deot. 22:8) Laha tsy mitandrina soa ty olo raiky lafa manday tobily, le mety hidodo olo ka hamparatsy na hamono olo mihintsy. Laha mbo manday tobily avao ty olo raiky fa tsy tokony handay tobily sasy, le mety ho maty na hamono olo. Laha nanao aksidan zany ie ka nahafaty olo, le mana trosan-dio ie, zany hoe tompon’andraikitsy amy fahafatesan’olo iny.

Ka mieritseritsy mihintsy hoe lasa tsy hanaja anao ty olo laha mijano tsy manday tobily sasy iha. Tean’i Jehovah iha satria mana toetsy soa, anisani-zay ty hoe miambany noho mieritseritsy ze hahasoa ty hafa na tsy manao ze hahavoan-draha ty hafa. Mampitamà koa ie fa hanoha anao noho hampahery anao. (Isa. 46:4) Tsy hanary anao mihintsy ie. Lafa hanapa-kevitsy zany iha hoe tsy tokony handay tobily sasy, le angataho ie mba hanome anao fahendrea noho hanampy anao hahay hampiasa ty torolalan’ny Baiboly.

Ino ty Azon’Olo Hafa Anampea?

Soa matetiky laha ty fianakavian’olo be tao iny ro miresaky aminy mikasiky ty fandaisany tobily. Laha namany koa iha, le afaky miresaky aminy laha naharè hoe manaly fa mampatahotsy ty fandaisany tobily. Janjino soa ty raha volaniny. Azonao atao mihintsy aza ty miresaky hoe hiaraky aminy iha lafa manday tobily ie. Laha ilà, le resaho aminy ty fomba fandaisany tobily. Fe miezaha hipetraky amy pilasiny lafa manao ani-zay. Tokony ho soa fanahy iha lafa miresaky aminy, fe tokony hivola ty marina koa. Ka mifantoky amy mahabe tao azy, fa ty fomba fandaisany tobily ro resaho. Aleo miresaky hoe “Tsy teako ho azon-draha iha lafa manday tobily”, tozay hanao ani-zao hoe “Fa tsy azo antoky sasy iha lafa manday tobily.” Anovo tsapany hoe atokisanao ie sady ta hanoriky ty torolalan’ny Baiboly niresahy tamy lahatsoratsy toy.

Laha misy be tao raiky tsy maintsy mijano tsy manday tobily sasy, le tokony hiezaky hahatakatsy ty raha tsapany tsika. Mety hieritseritsy ie hoe voafehifehy sady tsy afaky handeha amy ze teany hombà. Ino ty azonao atao mba hanampea azy? Miezaha ho soa fanahy aminy sady ampeo ie. (Ohab. 17:17) Ka mandiny azy hangataky anao mba handay azy satria mety hieritseritsy ie hoe lasa hanahira anao laha manao ani-zay. Manaova fandahara mba hangalà azy amy fotoa bevata tokony handehana rey, ohatsy hoe hivory, hanompo, hanao bazary, noho hamonjy dokotera. Ameo toky ie fa tsy manahira anao mihintsy ty fanampea azy amy raha reo sady ta hiaraky aminy koa iha.—Rom. 1:11, 12.