Fandania Drala Tsifotofoto amy Resaky Aly: Ino ty Volanin’ny Baiboly?

Nahasesy 2,24 tapitrisa tapitrisa dolara amerikein ty drala nilanin’ny firenena amy tany toy iaby tamy tafiky, tamy 2022. Ty fanafihan’ny Russie an’ny Ukraine ro tena nandania an’ny drala reo. Nanao tatitsy ho zao ty Stockholm International Peace Research Institute na SIPRI, tamy Avrily 2023, mikasiky ty raha niseho tamy 2022:

• “Niakatsy 13 sanjato” ty drala nilanin’ny firenena an’Eropy any tamy tafiky. “Mbo tsy nandany drala hozay tanatin’ny tao raiky mihintsy ty firenena a Eropy any, liany tamy 1991.”

• “Nampitomboan’ny Russie 9,2 sanjato ty drala natokany amy tafiky, ka lasa niakatsy ho firenena fahatelo farany nandany drala amy tafiky ie, laha ni-fahalimy ie taloha teo.”

• Mbo Etazinỳ avao zisiky eto ty firenena farany mandany drala amy resaky tafiky. “Ty 39 sanjato amy drala lany amy resaky tafiky amy tany toy iaby, le ty ahin’ny Etazinỳ avao.”

“Tsy misy filamina vatany ty amy tany toy iaby, matoa ampitomboan’ny firenena reo ty drala lanìny amy tafiky,” hoy Dr. Nan Tian, anisan’ny nanoratsy ty tatitsy baka amy SIPRI.

Fa niresahin’ny Baiboly mialoha fa hifanao kirebaky ty firenena matanjaky amy tany toy, sady fa niresahin’ny koa hoe ia ty azo tamàny hoe handay filamina.

Fa niresahy mialoha fa hihamanjeky ty aly

• Resahin’ny Baiboly hoe “fotoan’ny farany” iainantsika zao.​—Daniela 8:19.

• Niresahin’ny bokin’i Daniela mialoha hoe hanao kirebaky fanjakà matanjaky reo amy fotoa io. “Hifanosiky” rozy, zany hoe hifanao kirebaky, satria samby ta ho lasa fanjakà matanjaky marè. Handany “hanana” na drala be amy raha zay rozy.​—Daniela 11:40, 42, 43.

Laha teanao ty hahay an’ny faminania mahakinto amy Baiboly ao io, le henteo ty video hoe Fahatanterahan’i Daniela Toko Faha- 11.

Akory ro hampisy ty tena fiadana

• Resahin’ny Baiboly hoe hosoloa-Ndranahary iaby ty fanjakan’olombelo iaby. “Hanory fanjakà tsy ho rava zisiky farany [ie], sady tsy ho azon’olo hafa fanjakà io. Hotorotoroeny noho haravany fanjakà iaby reo, fa ie ho eo avao zisiky amy fotoa tsy voafaritsy.”​—Daniela 2:44.

• Kely sisa le hotanterahin’i Jehovaha Ndranahary raha tsy vitan’olombelo iny, le ty hampisy ty fiadana noho filamina. Amy fomba akory? Hopotepotehin’ny Fanjakàny an-danitsy any iny ty fitaovam-pialia iaby, le tsy hampisiany koa ty hasatà.​—Salamo 46:8, 9.

Laha ta hahay misimisy mikasiky ty raha hataon’ny Fanjakà-Ndranahary iha, le vakio ty lahatsoratsy hoe ““Ho Be ny Fiadanana” Rehefa Hitondra ny Tany Ilay Fanjakana.’”