1 Nofoaiga a Tupu
10 Ua siitaua atu Filisitia+ iā Isaraelu; ona sosola ai lea o tagata Isaraelu mai i luma o Filisitia, ua paʻuʻū ai ua fasia i le pelu i le Mauga o Kilepoa.+ 2 Ua tulitatao atu e Filisitia o Saulo ma ona atalii; ona fasia lea e Filisitia o atalii o Saulo,+ o Ionatana,+ o Apinatapa,+ ma Makisua.+ 3 Ua vevela le taua ma Saulo; ua maua atu o ia e i latou e fanafana aū, ma ua manuʻa foʻi o ia i tagata fanafana aū.+ 4 Ona fai atu lea o Saulo i lē o loo aveina ana meatau:+ “Inā seʻi ia lau pelu+ ma tutuʻi mai iā te aʻu, ina neʻi ō mai na tagata lē peritomeina+ ma matuā faasauā+ iā te aʻu.” Ae e leʻi loto i ai+ lē na aveina ana meatau, auā na matuā fefe lava o ia. Ona tago lea o Saulo i le pelu ma faapaʻū i ona luga.+ 5 Ina ua vaai atu lē na aveina ana meatau ua oti Saulo, ona faapaʻū foʻi lea o ia i le pelu ma oti ai.+ 6 O lea, na feoti faatasi ai Saulo, o ona atalii e toʻatolu,+ ma i latou uma o lona aiga. 7 Ina ua vāai atu tagata uma o Isaraelu o ē na i le fanua laugatasi ua sosola i latou, ma ua feoti foʻi Saulo ma ona atalii, ona latou tuua lea o o latou aai ma sosola;+ a ua ō mai Filisitia ma nonofo ai i inā.
8 I le aso na sosoo ai, ina ua ō atu Filisitia e tatala+ ofu o ē na fasia, ona latou maua lea o Saulo ma ona atalii, o loo taatitia mai i luga o le Mauga o Kilepoa.+ 9 Ona latou tatala lea o ona ofu ma vavaeese lona ulu+ ma ave lona ofutau, ua latou auina faataamilo atu foʻi le feʻau i le nuu o Filisitia, e faailoa+ atu ai i o latou tupua+ ma le nuu. 10 Ona latou tuu lea o lona ofutau i le fale o lo latou atua,+ ma faamau lona atigipoo i le fale o Takono.+
11 Ua faalogo foʻi i latou uma o i Iapese+ i Kiliata i mea uma ua faia e Filisitia iā Saulo.+ 12 Ua tulaʻi tagata totoa uma ma ave le tino o Saulo ma tino o ona atalii ma ave i Iapese, ma tanu o latou ponaivi i lalo o le laau telē+ i Iapese;+ ona latou anapopogi+ lea mo aso e fitu.
13 Ua oti Saulo i lona lē faamaoni talu ai lona lē faatuatua+ iā Ieova, i lona lē tausia o le afioga a Ieova, a ua saʻili e fesili atu i se fafine faataulāitu.+ 14 E leʻi fesili atu o ia iā Ieova.+ Ona ia fasiotia lea o ia, ma tuuina atu le malo iā Tavita le atalii o Iese.+