Teuteronome
10 “Ona fetalai mai lea o Ieova iā te aʻu i lenā taimi, ‘Ia e tā mo oe lava ni papamaa se lua e pei o papamaa muamua,+ ma ia e sau iā te aʻu i luga o le mauga ma ia e faia foʻi mo oe se ato i laupapa.+ 2 Ou te tusia foʻi i ia papamaa o upu na iai i papamaa muamua ia na e nutililiia, ma e ao ona e tuu i totonu o le atolaau.’ 3 Ona ou faia lea o le ato i laau o le setima ma tā ai papamaa e lua e pei o ia na iai muamua,+ ma ou alu aʻe i le mauga ma papamaa e lua o loo uu i loʻu lima. 4 Na ia tusia i ia papamaa o tusitusiga e pei ona sa iai muamua,+ o Upu e Sefulu*+ ia na fetalai mai ai Ieova iā te outou i le mauga mai i totonu o le afi+ i le aso na faapotopoto ai le faapotopotoga;+ ona tuuina mai lea e Ieova o ia papamaa iā te aʻu. 5 Ona ou liliu lea ma alu ifo mai i le mauga+ ma tuu papamaa i totonu o le atolaau na ou faia, ina ia iai pea i inā, e pei ona poloaʻi mai ai Ieova iā te aʻu.+
6 “Na malaga ese le fanauga a Isaraelu mai i Perota Peneakana,+ i Mosera. O i inā na maliu ai Arona ma tanu ai o ia i lea mea;+ ona amata ai lea ona auauna e fai ma ositaulaga lona atalii o Eleasaro e sui iā te ia.+ 7 Na latou malaga ese mai i lea mea mo Kikata ma mai i Kikata na ō atu ai i Iatepata,+ o le laueleele e tele ai vanu ia e tafe ai vai.
8 “I lenā taimi na vavaeese ai e Ieova le ituaiga o Levi+ e amoina le atolaau o le feagaiga a Ieova,+ ia tutū foʻi i luma o Ieova e auauna iā te ia+ ma faamanuia atu i tagata i lona suafa seʻia oo mai i lenei aso.+ 9 O le mea lea ua leai ai se vaega a Levi ma sona tofi+ faatasi ma ona uso. O Ieova o lona tofi lea, e pei ona fetalai mai ai Ieova lou Atua iā te ia.+ 10 A o aʻu, na ou nofo i le mauga e pei o le taimi muamua i ao e fā sefulu ma pō e fā sefulu,+ ma na faafofoga foʻi Ieova iā te aʻu i lea taimi.+ E leʻi finagalo Ieova e faaumatia oe.+ 11 Ona fetalai mai lea o Ieova iā te aʻu, ‘Tulaʻi ia ma taʻitaʻi le nuu o le a malaga ese, ina ia latou ō atu ma fai mo i latou le laueleele na ou tautō ai e avatu i o latou augātamā.’+
12 “O lenei Isaraelu e, po o le ā se mea e finagalo mai i ai Ieova lou Atua iā te oe,+ pe e lē o le mataʻu+ ea iā Ieova lou Atua, ina ia savali i ona ala+ uma ma alofa atu iā te ia,+ ma auauna iā Ieova lou Atua ma lou lotoatoa ma lou ola atoa;+ 13 ma tausia poloaʻiga a Ieova ma ana tulafono+ ua ou poloaʻi atu ai iā te oe i le aso nei mo lou lelei?+ 14 Tagaʻi foʻi, o Ieova lou Atua e ona le lagi,+ e oo foʻi i lagi o lagi, o le lalolagi+ ma mea uma ua iai. 15 E na o ou augātamā lava na fiafia i ai Ieova ma alofa iā i latou, na ia filifilia a latou fanau ina ua mavae atu i latou,+ o outou lava, e mai i nuu uma e pei ona iai i lenei aso. 16 E ao ona outou peritomeina le paʻu o outou loto+ ma aua neʻi outou toe faauamaaa.+ 17 Auā o Ieova lo outou Atua, o le Atua o atua,+ o le Alii o alii,+ o le Atua silisili, e malosi, ma mataʻutia,+ e lē faailoga tagata,+ pe talia se foaʻi e faia i se auala faaalatua,+ 18 e faaoo le faamasinoga mo le tama ua leai sona tamā, ma le fafine ua oti lana tane,+ e alofa foʻi i le tagata ese ua aumau+ ina ia avatu iā te ia o meaʻai ma le ofu tele. 19 Ia outou alolofa atu foʻi i tagata ese ua aumau,+ auā na outou aumau o ni tagata ese i le atunuu o Aikupito.+
20 “E ao ona e mataʻu iā Ieova lou Atua.+ E ao ona e auauna iā te ia,+ ma pipii atu iā te ia+ ma ia e tautō foʻi i lona suafa.+ 21 O Ia e ao ona e vivii+ i ai ma o ia foʻi o lou Atua, o lē na faia mo oe nei mea tetele ma mataʻutia na vaai i ai ou mata.+ 22 Na ō ifo i Aikupito o tagata e toʻafitu sefulu o ou augātamā ia,+ a o lenei ua faatoʻateleina oe e Ieova lou Atua e pei o le tele o fetu o le lagi.+