Teuteronome
20 “Afai e te alu atu e tau ma ou fili ma e iloa ai ni solofanua ma kariota o le taua,+ o ni tagata e sili ona toʻatele nai lo o oe, aua e te fefe iā i latou; auā e faatasi Ieova lou Atua iā te oe,+ o lē na aumaia oe mai i Aikupito.+ 2 Pe a outou latalata i le mea e fai ai le taua, e ao i le ositaulaga ona faalatalata atu ma tautala i le nuu.+ 3 E ao ona ia fai atu iā i latou, ‘Isaraelu e, faalogo mai ia, ua outou latalata i le asō i le mea e tou te tau ai ma o outou fili. Aua neʻi outou lotovaivai.+ Aua tou te fefefe ma tamomoʻe ona o le atuatuvale pe gatete ona o i latou,+ 4 auā e faatasi Ieova lo outou Atua i la outou savaliga, e tau mo outou faasaga i o outou fili ina ia faaolaina outou.’+
5 “E ao foʻi i leoleo+ ona fai atu i tagata e faapea, ‘O ai se tamāloa na fausia lona fale fou ae e leʻi faapaiaina? Ia tuu atu o ia e toe foʻi i lona fale, neʻi oti o ia i le taua ae faapaiaina ai e se isi tamāloa lona fale.+ 6 O ai foʻi se tamāloa na ia totōina lona tovine ae na te leʻi seleseleina? Ia tuu atu o ia e toe foʻi i lona fale, neʻi oti o ia i le taua ae selesele e se isi tamāloa lona togāvine.+ 7 O ai foʻi se tamāloa ua faamau ma se fafine ae e leʻi faatasia i laʻua? Ia tuu atu o ia e toe foʻi i lona fale,+ neʻi oti o ia i le taua ae fai o ia ma avā a se isi tamāloa.’ 8 E ao i leoleo ona faapea atili atu i tagata, ‘O ai se tamāloa e palaai ma lotovaivai?+ Ia tuu atu o ia e toe foʻi i lona fale, ina neʻi faavaivai loto o ona uso e pei o lona loto.’+ 9 Pe a uma ona talanoa atu leoleo i tagata, e ao ona latou tofia taʻitaʻi o ʻautau e taʻitaʻiina le nuu.
10 “Afai e te latalata atu i se aai ina ia siitaua i ai, ia faailoa atu maliega o le filemu.+ 11 Afai e tali filemu mai iā te oe ma tatala mai faitotoʻa o le aai iā te oe, o tagata uma e maua i totonu o le aai e fai ma ou tagata e faia galuega mamafa, ma e ao ona latou auauna iā te oe.+ 12 Ae afai e lē faia e tagata o le aai se leleiga ma oe,+ ae siitaua mai iā te oe, e ao ona e osofaʻia lea aai, 13 e tuuina mai le aai i ou lima e Ieova lou Atua, ia e fasiotia tane uma o le aai i le pelu.+ 14 Ia e ave na o fafine, o tamaiti,+ o manu lalata,+ ma mea uma ua i le aai, o le vete uma e te faoa mo oe;+ e ao ona e ʻai le vete mai i ou fili, o ē ua tuuina mai e Ieova lou Atua iā te oe.+
15 “Ia faapea ona e faia i aai uma e mamao ese mai iā te oe, ae e lē o aai o ia nuu. 16 E na o aai o ia tagata ua tuuina mai e Ieova lou Atua iā te oe e fai ma ou tofi, aua e te faasaoina ai so o se tasi e iai le ola,+ 17 auā e tatau lava ona faaumatia i latou, o tagata Hetī, o tagata Amorī, o tagata Kanana, o tagata Perisē, o tagata Hivī, o tagata Iepusē,+ e pei ona poloaʻi mai ai o Ieova lou Atua iā te oe; 18 ina neʻi o latou aʻoaʻoina outou e faia a latou mea inosia uma ua latou faia i o latou atua, ona outou agasala ai lea iā Ieova lo outou Atua.+
19 “Afai e te osofaʻia se aai i le tele o aso ma siitaua atu ina ia faatoʻilaloina, aua e te faatamaʻia ona laau e ala i le tāina i se toʻi; auā e te ʻai mai i na laau, aua foʻi e te tāina i lalo,+ po o se tagata ea lenā laau o le fanua e te faatamaʻiaina ai? 20 E na o le laau e te iloa e lē ʻaina e te faatamaʻia, e te tāina i lalo ma fausia ai pā e siʻomia ai le aai+ lea e siitaua mai iā te oe, seʻia faatoʻilaloina.