Mareko

9 Ua ia toe fetalai atu foʻi iā i latou: “E moni ou te fai atu iā te outou, E iai nisi o loo tutū mai i inei e lē oo i ai le oti, seʻiloga ua latou vāai muamua ua oo mai le malo o le Atua ma le mana.”+ 2 Ina ua mavae aso e ono, ona ave ai lea e Iesu o Peteru, Iakopo, ma Ioane, ma ō atu i se mauga maualuga ua na o i latou. Ona liua ai lea o ia i o latou luma,+ 3 ua matuā paʻepaʻemā lona ofu tele, ua sili atu ona paʻepaʻe nai lo o ni ofu ua tāina e se tagata i le lalolagi.+ 4 Ua faaali mai foʻi Mose ma Elia iā i latou, ma o loo la talanoa ma Iesu.+ 5 Ua oso vave mai Peteru ma fai mai iā Iesu: “Le Aʻoaʻo e,* ua lelei ona ua tatou faatasi ai i inei, o lea, seʻi o matou faatūina ni faleʻie se tolu, o le tasi mo oe, o le tasi mo Mose, ma le isi mo Elia.”+ 6 Ae o le mea moni, ua lē iloa e ia se tala a fai atu, auā ua matuā fefefe lava i latou. 7 Ona oo mai lea o le ao, ua ufitia ai i latou, ma ua faapea mai le siʻufofoga+ mai le ao: “O loʻu Atalii+ pele lenā; ia faalogo iā te ia.”+ 8 Peitaʻi ane, ua latou vaavaai solo ma iloa ai, ua leai se isi ae e na o Iesu o loo latou faatasi.+

9 A o ō ifo i latou mai le mauga, ua ia matuā faatonu atu i latou e aua neʻi taʻuina+ atu i se tasi mea na latou vaaia, seʻia oo ina toe faatūina mai le Atalii o le tagata mai le oti.+ 10 Ua latou taofimau i lea upu i o latou loto, ona latou fetalanoaaʻi lea i le uiga o lenei toetū mai i le oti. 11 A ua latou fesili mai iā te ia: “Aiseā ua fai mai ai le ʻautusiupu e tatau ona sau+ muamua Elia?”+ 12 Ua ia faapea atu iā i latou: “E sau muamua lava Elia e toe faafoʻisia mea uma;+ ae aiseā la ua tusia ai e faatatau i le Atalii o le tagata e faapea, e tatau ona tigāina o ia i puapuaga+ e tele ma faalumaina o ia?+ 13 Ae ou te fai atu iā te outou, ua uma ona sau o Elia,+ ma na latou faia iā te ia mea e tele na latou mananaʻo i ai, e pei ona tusia e uiga iā te ia.”+

14 O lea, a o latou ō atu i isi o le ʻausoo, ua mātauina ai se motu o tagata e toʻatele ma le ʻautusiupu o fefinauaʻi ma i latou.+ 15 Ina ua iloa mai o ia e le motu o tagata, ona taufaiofo ai lea o i latou, ma tamomoʻe mai e faafeiloaʻi iā te ia. 16 A ua fesili atu o ia iā i latou: “O le ā le mea ua outou fefinauaʻi ai ma i latou?” 17 Ona tali mai lea o se tasi mai le motu o tagata e faapea: “Le Aʻoaʻo e, ua ou aumaia loʻu atalii ona o loo iā te ia se agaga gūgū;+ 18 ma o so o se mea lava e puʻea ai o ia e le agaga leaga e na te lafo o ia i le eleele, e fauā ma ū ona nifo, ma mou atu lona malosi. Ona ou fai atu lea i ou soo ina ia tuliese o ia, ae e latou te leʻi mafaia.”+ 19 Ua tali atu o ia iā i latou: “Le tupulaga lē faatuatua e,+ o le ā le umi ou te feagai ai ma outou? O le ā le umi ou te faapalepale ai iā te outou? Ia aumai o ia iā te aʻu.”+ 20 Ona latou aumai lea o ia iā te ia. A ua iloa mai o ia e le agaga, ona lilivau lea o le tama ona o le agaga, ua paʻū i lalo ma taavale solo ma ua fauā lona gutu.+ 21 Ua ia fesili atu i lona tamā: “O le ā le umi talu ona tupu o lenei mea iā te ia?” Ua tali mai o ia: “Na amata mai lava a o laʻitiiti o ia; 22 e masani ona lafo o ia e le agaga i le afi ma le vai ina ia faaumatia ai o ia.+ Ae afai e te mafaia ona faia o se mea, ia e alofa ma fesoasoani mai iā i matou.” 23 Ua fetalai atu Iesu iā te ia: “Aiseā ua e faapea mai ai, ‘Afai e te mafaia’? E te iloa, e mafai ona faia mea uma i se tasi pe a faatuatua o ia.”+ 24 Ona alaga mai lea o le tamā o le tama ma faapea mai: “Ua ou faatuatua! Ia e fesoasoani mai ina ia malosi loʻu faatuatua!”*+

25 Ua silafia e Iesu, ua taufetuli uma mai le motu o tagata iā i latou, ona ia vavao+ lea o le agaga leaga, ua faapea atu: “O oe lenā le agaga gūgū ma tutuli, ou te fai atu iā te oe ia e alu i fafo, ma aua neʻi e toe alu i totonu iā te ia.” 26 Ua alaga leotele le agaga ma ua lilivau le tama, ona alu ai lea i fafo+ ae ua peiseaʻī ua oti le tama, ma ua faapea mai le toʻatele o tagata: “Ua oti o ia!” 27 A ua tago atu Iesu i lona lima ma faatū iā te ia i luga, ona tulaʻi ai lea o ia.+ 28 Ua ulufale o ia i le fale, ua na o i latou, ona fesili mai lea o ona soo iā te ia: “Aiseā ua lē mafai ai ona matou tulia le agaga?”+ 29 Ona ia fetalai atu lea iā i latou: “E na o le tatalo e mafai ona tuliese ai lea ituaiga o agaga.”+

30 Ona tuumuli lea o i latou mai lea mea, ae ō atu i Kalilaia, ma e leʻi manaʻo o ia e iloa e se tasi lenei mea. 31 Ua ia aʻoaʻo ona soo ma fetalai atu iā i latou: “O le a tuuina atu le Atalii o le tagata i lima o tagata, e latou te fasiotia o ia,+ ma e ui ina oti o ia, ae e toe faatūina i le aso lona tolu.”+ 32 Peitaʻi, e leʻi malamalama i latou i ana fetalaiga, ae ua fefefe e fesili mai iā te ia.+

33 Ua latou ō atu i Kapanaumi. A o iai o ia i le fale, ona ia fesili atu lea iā i latou: “O le ā le mea na outou fefinauaʻi ai i le auala?”+ 34 Ae e leʻi tali mai se isi, auā na latou fefinauaʻi i luga o le auala po o ai o i latou e sili.+ 35 Ua nofo o ia i lalo, ona ia valaau atu lea i le toʻasefulu lua ma faapea atu: “Afai e fia muamua se tasi, e tatau ona avea o ia ma lē e mulimuli ma auauna i tagata uma.”+ 36 Ona ia aumaia lea o se tamaitiiti ma faatū i o latou luma, ua ia fusi iā te ia ma faapea atu:+ 37 “O sē e na te taliaina se tamaitiiti faapenei ona o loʻu igoa, ua ia taliaina foʻi aʻu; ma o sē e na te taliaina aʻu, e lē gata ua ia taliaina aʻu, a o lē foʻi ua auina mai aʻu.”+

38 Ua fai mai Ioane iā te ia: “Le Aʻoaʻo e, na matou vāai i le tasi tagata ua ia tutuli temoni i lou suafa, ma na matou taumafai e taofia o ia,+ auā e lē ʻau o ia faatasi ma i tatou.”+ 39 A ua fetalai atu Iesu: “Aua tou te taofia o ia, auā e leai se tasi e faia se galuega mamana i loʻu igoa, e mafai ona vave faia ni upuleaga iā te aʻu;+ 40 auā o sē e lē tetee mai iā i tatou, ua ʻau ma i tatou.+ 41 Auā o sē na te avatu se ipu+ vai tou te inu ai ona o outou o soo o Keriso,+ E moni ou te fai atu iā te outou, e maua lava lona taui. 42 A o se tagata e na te faatausuai i se tasi o i latou nei e faatauvaa ua talitonu, e lelei pe a nonoa se maa olo e toso e asini i lona ua, ma lafo o ia i le sami.+

43 “Afai e te tausuai ona o lou lima, ia tipi ese auā e sili ona lelei o lou maua o le ola a o e lima mutu, nai lo o le lafoina o oe ma ou lima e lua i Kena,* i le afi e lē mafai ona tineia.+ 44 * —— 45 Ae afai e te tausuai ona o lou vae, ia tipi ese auā e sili ona lelei o lou maua o le ola a o e pipili,+ nai lo o le lafoina o oe ma ou vae e lua i Kena.+ 46 * —— 47 Afai foʻi e te tausuai ona o lou mata, ia lafoaʻi+ auā e sili ona lelei o lou ulu atu i le malo o le Atua ma lou mata e tasi, nai lo o le lafoina o oe ma ou mata e lua i Kena,+ 48 o le mea e lē mamate ai ilo ma e lē tineia foʻi le afi.+

49 “Auā e tatau ona faamasima+ tagata uma i le afi. 50 E lelei le masima; ae afai e magalo, o le ā se mea e mafai ona toe faamāi ai?+ Ia iā te outou le masima,+ ma ia faatupu le filemu+ i le va o le tasi ma le isi.”