Mataio

27 Ua oo i le taeao, ona taupulepule ai lea o le ʻaufaitaulaga sili ma le ʻautoeaina o le nuu ina ia fasiotia Iesu.+ 2 Ua latou saisai o ia, ona taʻitaʻiina atu lea ma tuuina atu i le kovana o Pilato.+

3 Ua iloa e Iuta o lē na faalataina Iesu ua faasalaina o ia, ona salamō ai lea o ia ma toe faafoʻi atu tupe siliva e tolu sefulu+ i le ʻaufaitaulaga sili ma le ʻautoeaina, 4 ua faapea atu: “Ua ou agasala ina ua ou faalataina le tagata amiotonu.”* A ua latou faapea mai: “E leai sa matou feʻau i lenā mea! Faitalia oe!”+ 5 Ona ia lafoaʻi lea o tupe siliva i le malumalu, ua alu ese ma sisi iā te ia lava.+ 6 Peitaʻi, ua ave e le ʻaufaitaulaga sili tupe siliva ma faapea ane: “E sā ona tuu nei tupe i le mea e teu ai oloa, auā o le tau lea o le toto.” 7 Ua latou talatalanoa faatasi, ona faatau ai lea o le fanua o le fai ipu omea e tatanu ai tagata ese. 8 O le ala lea ua taʻua ai lenā fanua, “O le Fanua o le Toto”+ e oo mai lava i le asō. 9 Ua taunuu ai le upu a le perofeta o Ieremia e faapea: “Ua latou ave tupe siliva e tolu sefulu,+ o le tau lea o le tagata ua faatauina, o lē ua tuu i ai e nisi o le fanauga a Isaraelu se tau, 10 ona latou faatau ai lea o le fanua o le fai ipu omea,+ e tusa ma le mea ua poloaʻi mai ai Ieova iā te aʻu.”

11 Ona tulaʻi lea o Iesu i luma o le kovana; ma ua fesili mai le kovana iā te ia: “Po o oe ea o le tupu o tagata Iutaia?”+ Ua tali atu Iesu: “O lenā tonu lava ua e fai mai ai.”+ 12 Peitaʻi, a o tuuaʻia o ia+ e le ʻaufaitaulaga sili ma le ʻautoeaina, e leʻi tali atu o ia.+ 13 Ona fai mai lea o Pilato iā te ia: “E te lē o faalogo atu ea i le tele o mea ua latou tuuaʻia ai oe?”+ 14 E ui i lea, e leʻi tali atu lava o ia i se upu e tasi, ona matuā ofo ai lea o le kovana.+

15 A o faia lenei tausamiga,* e masani ona faasaʻoloto e le kovana se pagota, o lē ua mananaʻo i ai le motu o tagata.+ 16 I le taimi lenā, o loo latou taofia ai se pagota e sili ona leaga, e igoa iā Parapa.+ 17 O lea, a o latou faapotopoto faatasi, ua faapea atu Pilato: “O ai tou te mananaʻo ou te faasaʻolotoina, o Parapa po o Iesu o lē ua taʻua o le Keriso?”+ 18 Ua iloa e ia o lo latou matauʻa+ ua latou tuuina atu ai o ia.+ 19 O lea, a o nofo o ia i le nofoa faamasino, ona auina mai lea e lana avā o se feʻau iā te ia, e faapea: “Aua neʻi e faia se mea i lenā tagata amiotonu,+ auā ua ou matuā tigāina lava i le asō i se miti+ ona o ia.” 20 A ua tauanau e le ʻaufaitaulaga sili ma le ʻautoeaina le motu o tagata ina ia talosaga atu mo Parapa,+ ae ia fasiotia Iesu. 21 Ua tali atu le kovana iā i latou: “O ai o i laʻua tou te mananaʻo ou te faasaʻolotoina?” Ua latou fai mai: “O Parapa.”+ 22 Ua fai atu Pilato iā i latou: “O le ā la se mea ou te faia iā Iesu, o lē ua taʻua o le Keriso?” A ua latou faapea mai: “Ia tutuʻi o ia i luga o le laau!”+ 23 Ua ia faapea atu: “Aiseā, o le ā se mea leaga ua ia faia?” A ua atili ai ona latou alalaga mai: “Ia tutuʻi o ia i luga o le laau!”+

24 Ae ina ua iloa e Pilato ua lē aogā ana upu, ma ua atili ai ona latou vāvāō, ona aumaia lea e Pilato o le vai+ ma fafano ai ona lima i luma o le motu o tagata, ma faapea atu: “E mamā aʻu mai le toto o lenei tagata. Faitalia outou.” 25 O lea, ua tali mai ai tagata uma: “Ia i luga o i matou ma a matou fanau lona toto.”+ 26 Ona ia faasaʻolotoina lea o Parapa, ae faatonuina e sasa+ Iesu ma tuu atu o ia ina ia tutuʻi i luga o le laau.+

27 Ona ave lea e fitafita a le kovana ia Iesu i le maota o le kovana, ma ua latou faapotopoto faatasi atu iā te ia le ʻaufitafita uma.+ 28 Ua latou toese lona ofu ae faaofu iā te ia i le ofu mūmū sesega,+ 29 ua latou fili foʻi le pale tuitui ma tuu i lona ao, ma tuu foʻi le ū* i lona aao taumatau, ua latou tootutuli i ona luma ma tauemu+ iā te ia, ma faapea mai: “Talofa le Tupu o tagata Iutaia!”+ 30 Ua latou tuufeanu+ iā te ia ma fetagofi i le ū ma tā ai lona ao. 31 Ua latou tauemu+ iā te ia, ona latou tatala ese lea o le ofu ae faaofu i lona ofu tele, ma taʻitaʻi atu ina ia tutuʻi i luga o le laau.+

32 A o ō atu i fafo, ua latou maua ai le tagata Kurene e igoa iā Simona.+ Ua latou faatonu* lenei tagata ina ia amo le laau e faapuapuagatia* ai Iesu. 33 Ua taunuu i latou i le nofoaga e igoa o Kolokota,+ o lona uiga o le fanua ua taʻua o le Ulupoo, 34 ona latou avatu lea iā te ia o le uaina ua fefiloi ma laau oona+ ina ia inu ai, ae ina ua tofo i ai, na te leʻi inuina.+ 35 Ua latou tutuʻi o ia i luga o le laau,+ ona tufatufa lea o ona ofu tele+ e fai ai le vili,+ 36 ma a o latou nonofo, ua latou leoleo iā te ia. 37 Ua latou tuu i luga aʻe o lona ao se faailoilo ua tusia ai le mea ua tuuaʻia ai o ia, e faapea: “O Iesu lenei, o le Tupu o tagata Iutaia.”+

38 Ua tutuʻi foʻi faatasi ma ia o tagata faomea e toʻalua, o le tasi i lona itu taumatau ma le isi i lona itu tauagavale.+ 39 Ua faatauemu+ iā te ia tagata ua ui ane ma lūlū+ o latou ulu 40 ma faapea mai: “O oe na o lē sa faapea mai e mafai ona e tala i lalo le malumalu+ ma toe faia i aso e tolu, ia e faaola iā te oe! Afai o oe o le alo o le Atua, inā alu ifo ia i lalo mai i le laau e faapuapuagatia ai!”+ 41 Ua faapena foʻi ona tauemu le ʻaufaitaulaga sili, o le ʻautusiupu, ma le ʻautoeaina iā te ia ma faapea mai:+ 42 “Sa ia faaolaina isi; ae ua lē mafai ona ia faaola iā te ia lava! O ia o le Tupu+ o Isaraelu, seʻi tuu pe alu ifo nei o ia i lalo mai i le laau ona tatou talitonu ai lea iā te ia.+ 43 Na faatuatua o ia i le Atua; seʻi tuu atu la i le Atua e na te laveaʻiina+ o ia pe a finagalo malie iā te ia, auā ua ia faapea mai, ‘O aʻu o le Atalii o le Atua.’”+ 44 Ua faapena foʻi ona fai upuleaga iā te ia o ē e faomea ua faatautau faatasi ma ia.+

45 Ua amata ona pogisa+ le nuu atoa i le itula e ono* seʻia oo i le itula e iva.*+ 46 Pe e tusa o le itula e iva, ona alaga leotele ai lea o Iesu e faapea: “Eli, Eli, lama sapatani?” o lona uiga, “Loʻu Atua e, loʻu Atua e, aiseā ua e tuulafoaʻiina ai aʻu?”+ 47 A o faalogo mai isi tagata o loo tutū latalata ane, ona latou faapea lea: “O loo valaau atu lenei tagata iā Elia.”+ 48 Ona tamoʻe loa lea o le tasi o i latou, ma aumai le omomi ma fufui i le uaina oona,+ ma tuu i le pito o le ū, ua alu atu ma avatu e inu ai o ia.+ 49 A ua faapea atu isi o i latou: “Tuu ai pea o ia! Seʻi tatou vāai pe e sau Elia e faaola o ia.”+ [[Ua tago atu se tasi tagata i le tao ma tutuʻi ai lona itu, ona tafe mai ai lea o le toto ma le vai.]]+ 50 Ua toe alaga Iesu, ona tuuina atu ai lea e ia o lona agaga.+

51 Faauta! Ua saeluaina mai luga e oo i lalo+ o le ʻie puipui+ o le malumalu, ma ua lūlūina le eleele, ma māvaevae papa.+ 52 Ua mātalatala tuugamau, ma ua lafoaʻi mai i fafo le tele o tino o tagata paia ua maliliu,* 53 ma ua iloa atu e le toʻatele o tagata (o ē ua ō mai mai i fanua tanu, ua ulu atu i latou i le aai paia+ ina ua mavae lona toetū mai). 54 A o le taʻitaʻiʻau ma i latou na leoleoina Iesu, ina ua latou vaaia le mafuiʻe ma mea ua tutupu, ona matuā fefefe ai lea o i latou ma faapea ane: “E moni, o le Alo lava lenei o le Atua.”+

55 Ua vaavaai mamao+ mai foʻi le toʻatele o fafine o ē na ō mai faatasi ma Iesu mai Kalilaia e auauna iā te ia;+ 56 ua latou faatasi ma Maria le Makatala, Maria le tinā o Iakopo ma Iose, ma le tinā o atalii o Sepetaio.+

57 Ua oo i le afiafi, ona sau lea o se tagata mauʻoa mai Arimataia e igoa iā Iosefa, o se tasi o soo o Iesu.+ 58 Ua alu atu lenei tagata iā Pilato ma talosaga atu mo le tino o Iesu.+ Ona faatonuina lea e Pilato ina ia tuuina atu iā te ia.+ 59 Ona ave lea e Iosefa o le tino, ma tāʻai i le ʻie lino mamā ma lelei,+ 60 ma tuu ai i lona tuugamau+ fou sa ia vaneina i le papa. Ona ia tuu lea o le maa telē i le gutu o le tuugamau ma alu ese.+ 61 Ae ua nonofo ai pea Maria le Makatala ma le isi Maria i luma o le tuugamau.+

62 I le aso na sosoo ai, ina ua uma le aso o le Sauniuniga,+ ona faapotopoto ai lea o le ʻaufaitaulaga sili ma le ʻau Faresaio i luma o Pilato 63 ma faapea atu: “Lau susuga e, ua matou manatua na fai mai lenā tagata pepelo a o ola o ia, ‘E toe faatūina mai aʻu pe a mavae aso e tolu.’+ 64 O le mea lea, ia poloaʻi atu ina ia leoleoina le tuugamau seʻia oo i le aso lona tolu, ina neʻi ō atu ona soo ma gaoia+ lona tino ma faapea atu i tagata, ‘Ua toe faatūina o ia mai le oti!’ ona sili ai lea ona leaga o lenei pepelo nai lo le pepelo muamua.” 65 Ua faapea atu Pilato iā i latou: “A lenā e iai la outou leoleo.+ Ia ō ma fai i ai ina ia leoleoina lelei.” 66 Ona latou ō atu lea ma faamau lelei le tuugamau, ua faamauina i le maa+ ma tuu ai leoleo.