Tanielu

5 Ua faia e le tupu o Pelesara+ se ʻaiga tele mo le toʻaafe o alii ua iā te ia, ma ua ia inu i le uaina i luma o le toʻaafe.+ 2 Ona ua pulea Pelesara e le uaina,+ ua ia faapea atu ai ia aumai ipu auro ma siliva+ na aumaia e lona tamā o Nepukanesa mai i le malumalu sa i Ierusalema, ina ia feinu ai le tupu, o alii ua iā te ia, o ana avā atoa ma ana palake.+ 3 Ua latou aumai i lea lava taimi o ipu auro na latou aveesea mai i le malumalu o le fale o le Atua i Ierusalema, ona feinu ai lea mai i ia ipu, o le tupu, o alii ua iā te ia, o ana avā atoa ma ana palake. 4 Ua latou feinu i le uaina ma ua latou vivii atu i atua auro, o siliva, o ʻapamemea, o uʻamea, o laau, ma maa.+

5 I lea lava taimi, ua aliali mai ai ni tamatamaʻilima o le tagata ma ua tusitusi i le simā o le pā puipui o le maota o le tupu,+ i luga o le tuugāmolī, ua silasila atu foʻi le tupu i le lima o loo tusitusi. 6 I lea lava taimi, ua sesega fofoga o le tupu, ua fefe+ o ia ona o ona mafaufauga, ma ua matalatala sooga o ona suilapalapa,+ ua fetoʻai foʻi ona tulivae o le tasi i le isi.+

7 Ua valaau leotele atu le tupu e aami mai o ē e valaau i ē ua oti, o le ʻau Kaletaia ma ē e saʻiliʻili i fetu.+ Ua faapea atu le tupu i tagata atamamai o Papelonia: “O so o se tasi e na te faitauina lea tusitusiga ma faamatala mai iā te aʻu lona uiga, o le a faaofu o ia i le ofu violē,+ e asoa o ia i le filifili auro, ma e avea o ia ma pule lona tolu i le malo.”+

8 Ona ō mai ai lea o tagata atamamai uma a le tupu, ae e leʻi mafai ona latou faitauina le tusitusiga pe faamatala atu le uiga i le tupu.+ 9 Ona matuā fefe ai lea o le tupu o Pelesara ma ua atili ai ona sesega ona fofoga; ua fememeaʻi foʻi alii ua iā te ia.+

10 Ua ulufale mai le masiofo* i le potu o loo fai ai le ʻaiga ona ua faalogo i upu a le tupu ma alii ua iā te ia. Ua faapea mai le masiofo: “Le tupu e, ia soifua pea oe.+ Aiseā ua sesega ai ou fofoga? E leai se māfuaaga e te fefevale ai. 11 O loo iai se tagata agavaa i lou malo o lē ua iai le agaga o atua paia;+ ma i aso o lou tamā na iā te ia le malamalama, o le tofā mamao ma le atamai e pei o le atamai o atua, ma o le tupu o Nepukanesa, o lou lava tamā le tupu e, na ia tofia o ia e fai ma pule+ o ositaulaga e faia faiga faaagaga, o ē e valaau i ē ua oti, o le ʻau Kaletaia ma ē e saʻiliʻili i fetu; 12 auā foʻi o lenei Tanielu o lē na faaigoa e le tupu iā Peletisara,+ e ese lona atamai ma le poto ma le tofā mamao e faamatala ai uiga o miti,+ o le faamatalaina o tupua, ma le faamatalaina o mea faigatā.+ O lea, ia aami iā Tanielu ina ia faailoa mai e ia le uiga o ia mea.”

13 Ua aami Tanielu i luma o le tupu. Ona faapea atu lea o le tupu iā Tanielu: “Po o oe o Tanielu lea na aumaia faapagota mai i Iuta,+ o lē na aumaia e loʻu tamā le tupu mai i Iuta?+ 14 Ua ou logotala ua iā te oe le agaga o atua,+ ma ua iā te oe foʻi le malamalama, o le tofā mamao ma le atamai+ maoaʻe. 15 Ua uma ona aumaia i oʻu luma o tagata atamamai, ma ē e valaau i ē ua oti ina ia latou faitau lea tusitusiga ma faamatala mai lona uiga iā te aʻu; ae ua lē mafaia e i latou ona faamatala mai le uiga o le upu.+ 16 Ua ou logotala e faatatau iā te oe, e mafai ona e faamatalaina uiga o mea+ ma faamatalaina mea faigatā. O lenei, afai e mafai ona e faitauina le tusitusiga ma faamatala mai iā te aʻu lona uiga, o le a faaofu oe i le ofu violē, e asoa foʻi oe i le filifili auro, ma e avea oe ma pule lona tolu i le malo.”+

17 Ua tali mai Tanielu i luma o le tupu e faapea: “Ia tuu pea iā te oe au meaalofa, ma avatu au taui i isi tagata.+ Ae o le a ou faitauina le tusitusiga i le tupu, ma o le a ou taʻu atu iā te ia le uiga.+ 18 O oe le tupu e, na tuuina mai e le Atua Silisili Ese+ iā Nepukanesa lou tamā+ le malo, o le tulaga taʻutaʻua, o le viiga ma le mamalu.+ 19 Ona o lona taʻutaʻua lea na maua mai iā te Ia, na matuā gatete ma fefefe ai tagata, o nuu ma gagana uma i ona luma.+ Na ia fasiotia lē na ia finagalo i ai; na ia taia lē na ia finagalo i ai; na ia faamāina lē na ia finagalo i ai.+ 20 Ae ina ua faualuga o ia ma ua maaa foʻi lona loto, na amio faamaualuga ai,+ na aveesea ai o ia mai i le nofoālii o lona malo, na aveesea foʻi lona mamalu mai iā te ia.+ 21 Na tuliesea o ia mai i le fanau a tagata, ma na avea lona loto e pei o le loto o se manu, na nofo faatasi ma asini o le vao.+ Na ia ʻai i le vao e pei o povi poʻa; na susū foʻi lona tino i le sau o le lagi,+ seʻia oo ina iloa e ia o le Atua Silisili Ese o ia o le Pule i malo o tagata, ma e na te tofia e pule ai lē ua ia finagalo i ai.+

22 “A o oe, lona atalii o Pelesara,+ e ui ina e silafia+ ia mea uma ae e te leʻi faamaulalo lou loto.+ 23 Ae ua e faualuga lava ma tetee atu i le Alii o le lagi,+ ua latou aumaia i ou luma o ipu o lona fale;+ ma ua feinu ai i le uaina mai i ia ipu o oe ma alii ua iā te oe, o au avā ma au palake, ua e vivii atu foʻi i atua faatauvaa ua faia i le siliva, o auro, o ʻapamemea, o uʻamea, o laau ma maa,+ ia e lē vāai i se mea, pe e faalogo i se mea, pe e iloa se mea;+ ae ua e lē faamamaluina+ le Atua o lē ua i lona aao lau mānava,+ ua ia te ia foʻi ou ala uma.+ 24 O lea, sa auina mai e le Atua le lima ma māfua ai ona tusia lenei tusitusiga.+ 25 O le tusitusiga lenei na tusia: MENE MENE TEKELE ma UPERESA.*

26 “O le uiga lenei o le upu: MENE ua faitaulia e le Atua aso o lou malo ma ua faamutaina.+

27 “TEKELE, ua fuaina oe i le fuafaatautau ma ua matuā lē atoa.+

28 “PERESA,* ua vaeluaina lou malo ma ua tuuina atu iā Metai ma Peresia.”+

29 I lenā lava taimi ua faatonu atu ai e Pelesara, ina ia latou faaofu iā Tanielu i le ofu violē, ma faaasoa iā te ia i le filifili auro; ma ua faasilasila atu o le a avea o ia ma pule lona tolu i le malo.+

30 Sa fasiotia i lea lava pō Pelesara le tupu o Kaletaia,+ 31 ma ua maua ai e Tariu+ le Metai le malo i le tusa ma le ono sefulu lua o ona tausaga.