Esoto

1 O lenei, o igoa ia o atalii o Isaraelu na ō atu ma Iakopo i Aikupito; na ō e taʻitasi le tagata ma lona aiga:+ 2 o Reupena,+ o Simeona,+ o Levi,+ o Iuta,+ 3 o Isakara,+ o Sepulona,+ o Peniamina,+ 4 o Tanu,+ o Nafatali,+ o Kato+ ma Asera.+ 5 E toʻafitu sefulu i latou na tupuga mai iā Iakopo.+ A o Iosefa sa iai o ia i Aikupito.+ 6 Mulimuli ane, ua maliu Iosefa,+ atoa ma ona uso uma ma lea augātupulaga. 7 Ua fanafanau atalii o Isaraelu, ua faatoʻateleina ma faatupulaʻia; ua vave ona faatoʻateleina ma ua matuā malolosi i latou, ua faatumuina ai le atunuu iā i latou.+

8 Mulimuli ane, ua soloaʻi ane i le malo o Aikupito se tupu fou, o lē na te lē iloa Iosefa.+ 9 Ua ia fai atu i ona tagata: “Faauta! Ua sili atu ona toʻatele ma malolosi tagata Isaraelu nai lo o i tatou.+ 10 O lea, seʻi o tatou faautauta i le feagai ai ma i latou,+ ina neʻi faatoʻateleina pea i latou. Auā pe a tupu se taua, ona latou ʻau lea ma ē e ʻinoʻino mai iā i tatou, ma latou tau ma i tatou ma ō ese mai i lenei atunuu.”

11 Ona latou tofia lea o taʻitaʻi e faamalosia i latou e faia galuega mamafa, ina ia faatigāina ai i latou i avega mamafa;+ ua latou fausia aai e fai ma mea e teu ai oloa a Farao, o Pitoma ma Ramese.+ 12 Ae o le tele latou te faasauā ai iā i latou, o le tele foʻi lea o le faatoʻateleina ma le salalau solo o i latou i le laueleele, ma ua matuā fefefe ma feita ai i latou ona o le fanauga a Isaraelu.+ 13 O le mea lea ua faapologa ai e tagata Aikupito le fanauga a Isaraelu i faiga sauā.+ 14 Ua latou faatigāina pea iā i latou i le faapologaina o i latou i le faia o omea e faapipii ai mea+ ma piliki, ma faapologaina i le faia o galuega mamafa i le fanua,+ ioe, o a latou lava galuega mamafa uma na faapologaina ai i latou i faiga sauā.+

15 Mulimuli ane, ua fai atu le tupu o Aikupito i faatosaga Eperu,+ o le igoa o le tasi o Sepela a o le igoa o le isi o Puʻa, 16 ioe, ua oo ina ia faapea atu: “Pe a faatigā o le a fananau* fafine Eperu ma oulua ō atu e fesoasoani e faafananau i latou, afai lua te iloa o se tama, ia oulua fasiotia; ae afai o se teine ona faasao lea.” 17 A ua matataʻu nei fafine faatosaga i le Atua moni,+ ma ua la lē faia le mea na fai atu ai le tupu o Aikupito iā i laʻua,+ ae ua la faasao le fanau tama.+ 18 Mulimuli ane, ua aami e le tupu o Aikupito ia fafine faatosaga ma fesili atu iā i laʻua: “Aiseā ua oulua faia ai lenei mea, ina ua oulua faasaoina le fanau tama?”+ 19 Ua tali mai nei fafine iā Farao: “E lē pei fafine Eperu o fafine Aikupito. Auā e malolosi ma muamua fananau ae e leʻi oo atu i ai faatosaga iā i latou.”

20 Ua agalelei le Atua i fafine faatosaga;+ ua faatoʻateleina ma ua atili malolosi ai le nuu. 21 Talu ai ua matataʻu ia fafine faatosaga i le Atua moni, ua ia faamanuia iā i laʻua e ala i le mauaina o ni aiga.+ 22 Mulimuli ane, ua poloaʻi atu Farao i ona tagata uma e faapea: “O pepe tama Eperu uma faatoʻā fananau, ia lafoaʻi i le vaitafe o le Naila, ae e faasao pepe teine uma.”+