Iopu
16 Ona tali atu lea o Iopu, ua faapea atu:
2 “Ua ou faalogo i le tele o mea faapenei.
O outou uma o tagata faamāfanafana faasoesa!+
3 Pe e iai ea se iʻuga i upu e lē aogā?+
Aiseā foʻi ua tupu ai lou ita ua e tali mai ai faapena?
4 E mafai foʻi ona ou tautala e pei ona outou faia.
Pe ana faapea e tou te iai i le tulaga lea ou te iai,
Po ou te tautala atu ea i ni upu maoaʻe iā te outou,+
Ma po ou te lūlū atu ea loʻu ulu iā te outou?+
5 Ou te faamalosia outou i upu a loʻu gutu,+
O faamāfanafanaga foʻi a oʻu laugutu e faaitiitia ai ou tigā—.
6 Afai ou te tautala, e lē taofia ai loʻu tigā,+
Ma afai foʻi ou te lē faia faapea, e faapefea ona aveesea ai loʻu tigā?
7 A o lenei, ua ia faavaivaia aʻu;+
Ua ia tuulafoaʻiina i latou uma o loo faatasi ma aʻu.
8 Ua e taofia foʻi aʻu. Ua fai lea ma molimau,+
O lea ua tulaʻi mai ai loʻu tino vale iā te aʻu. Ua molimau ai i oʻu luma.
9 Ua saeia aʻu e lona toʻasā, ma ua ia ʻinoʻino+ mai foʻi iā te aʻu.
Ua gu mai ona nifo iā te aʻu.+
Ua pulatoʻa ma le sauā mai foʻi loʻu fili ia te aʻu.+
10 Ua faamamaga tele o latou gutu ina ia folo iā te aʻu,+
Ua latou taia oʻu alafau i le faalumaina,
Ua latou faapotopoto faatasi i se aofaʻiga tele e faasagatau mai iā te aʻu.+
11 Ua tuuina atu aʻu e le Atua i tauleleʻa,
Ma ua ia lafo atu foʻi aʻu i lima o ē e amioleaga.+
12 Sa ou toʻafilemu, ae peitaʻi ua ia lūlūina aʻu;+
Ua ia uʻu foʻi loʻu tuāua ma nutililii iā te aʻu,
Ua taulaʻi mai ana aū iā te aʻu.
13 Ua siʻomia aʻu e ona tagata fanafana aū;+
Ua ia tui foʻi ua ati i oʻu fatugaʻo,+ ma e leai se alofa;
Ua ia sasaa i le eleele loʻu auona.
14 Ua ia gagauina aʻu i lona osofaʻi mai pea;
Ua ia momoʻe mai foʻi iā te aʻu e pei o se tagata malosi.+
15 Ua ou suʻi faatasi le ʻie talatala+ i loʻu paʻu,
Ma ua ou lafoaʻi foʻi loʻu mamalu i le efuefu.+
16 Ua mūmū oʻu foliga i le tagi,+
Ua iai foʻi i oʻu laumata le pogisa tele.+
17 E ui e lē o iai se faasauā i oʻu alofilima,
E mamā foʻi laʻu tatalo.+
18 Le eleele e, aua neʻi ufiufia loʻu toto!+
Aua foʻi neʻi mapu laʻu alaga!
19 O lenei foʻi, faauta! ua iai i le lagi o lē e molimau iā te aʻu,
Ua i mea maualuluga foʻi laʻu molimau.+
20 Ua tautatala faasagatau aʻu aumea iā te aʻu;+
Ua vaai atu oʻu mata i le Atua e aunoa ma se moe.+
21 E faia le filifiliga i le va o le tagata ma le Atua,
E pei ona faia i le va o se atalii o le tagata ma lona uso.+
22 Auā a mavae atu ni nai tausaga,
Ou te alu ese foʻi i le ala ou te lē toe foʻi mai ai.+