Teuteronome
19 “Pe a faaumatia e Ieova lou Atua o nuu+ e ona laueleele e tuuina mai e Ieova lou Atua iā te oe, pe a e faatoʻilaloina foʻi i latou ma nonofo i o latou aai ma o latou fale,+ 2 ia e tuu ese ni aai se tolu mo oe lava mai i ou laueleele e tuuina mai e Ieova lou Atua iā te oe e fai mo oe.+ 3 E te saunia mo oe le auala, e te vaevaeina foʻi fanua o lou laueleele ua tuuina mai e Ieova lou Atua iā te oe e fai mo oe i ni vaega se tolu, ma o i inā e sola atu i ai le fasioti tagata paʻivalea.+
4 “O le mea lenei e tupu i le fasioti tagata paʻivalea o lē e sola i inā ma ola ai: Pe a ia fasiotia lona tuaoi e aunoa ma le fuafuaina ma e leʻi ʻinoʻino muamua foʻi iā te ia;+ 5 pe afai e ō foʻi ma lona tuaoi i le vaomatua e fai fafie, ma ua sii aʻe lona lima o loo iai le toʻi e tā ai le laau a ua see ese le uʻamea mai i le ʻau o le toʻi,+ ma lavea ai lona tuaoi ma oti ai, e tatau ona sola atu o ia i se tasi o na aai ma ola ai.+ 6 A leai, o le a tuliloaina le fasioti tagata paʻivalea e lē na te tauimasui i le toto+ ona ua ita lona loto, ma maua atu o ia ona e mamao le ala; ma e fasiotia lava o ia, ae e leai se faasalaga o le oti+ mo ia auā e leʻi ʻinoʻino muamua o ia iā te ia. 7 O le mea lea ua ou poloaʻi atu ai iā te oe e faapea, ‘Ia e tuu ese ni aai se tolu mo oe.’+
8 “Afai e faalauteleina e Ieova lou Atua lou fanua e tusa ma le mea na ia tautō ai i ou augātamā,+ ma ua ia tuuina mai iā te oe le laueleele uma na ia folafola mai e avatu i ou augātamā,+ 9 ma afai e te tausia poloaʻiga uma ua ou poloaʻi atu ai iā te oe i le asō ma e faia, ina ia e alofa iā Ieova lou Atua ma savali pea i ona ala,+ ia e faaopoopo isi aai e tolu i nei aai e tolu mo oe,+ 10 ina ia aua neʻi faamaligiina le toto o se tasi ua lē sala+ i lou laueleele e tuu mai e Ieova lou Atua iā te oe e fai ma ou tofi, ma e te lē nofosala ai i le faamasaatoto.+
11 “Ae afai e ʻinoʻino+ se tagata i lona tuaoi, ma ua lamalama o ia iā te ia ma ua tulaʻi atu ma fasi iā te ia, ma ua oti ai o ia,+ a ua sola atu le tagata i se tasi o nei aai, 12 e aauina e toeaina o lona aai nisi e aumai o ia mai i inā, e latou te avatu o ia i lima o le tauimasui i le toto ma e ao ona oti o ia.+ 13 Aua e te vaai ma le alofa iā te ia,+ ia e aveesea mai i Isaraelu le nofosala i le toto o sē ua lē sala,+ ina ia e lelei ai.
14 “Aua e te tuu i tua pine o le tuaoi o lou uso a tagata+ ia ua uma ona faatulaga e ē na muamua i lo o oe e tusa ma ou tofi i le laueleele e tuuina mai e Ieova lou Atua iā te oe e fai mo oe.
15 “Aua neʻi tulaʻi atu se molimau e toʻatasi e molimau i so o se sesē po o se agasala a se tagata,+ e tusa ai ma so o se agasala e na te faia. E faamaonia le mataupu i le molimau a le toʻalua po o le toʻatolu.+ 16 Afai e tulaʻi se molimau ua faufau leaga faasaga i se tagata ina ia molia o ia ona o se amioleaga,+ 17 e ao ona tutū i luma o Ieova o tane e toʻalua ua feeseeseaʻi, i luma o ositaulaga ma faamasino o ē o le a auauna i na aso.+ 18 E ao i faamasino ona saʻiliʻili māeʻaeʻa,+ pe afai e pepelo le molimau ma ua ia aumaia se moliaga pepelo e faatatau i lona uso, 19 ia outou faia iā te ia e pei ona ia faufau e faia i lona uso,+ ia e aveesea le mea leaga mai i lou nuu.+ 20 Ona fefefe ai lea o ē ua totoe o le a faalogo i ai, ma latou lē toe faia ai se mea leaga faapea i lou nuu.+ 21 Aua e te vaai ma le alofa iā te ia:+ ae o le ola e sui ai le ola, o le mata e sui ai le mata, o le nifo e sui ai le nifo, o le lima e sui ai le lima, o le vae e sui ai le vae.+