Iopu
20 Ona tali mai lea o Sofara le Naama, ua faapea mai:
2 “O le mea lea ua tali mai ai oʻu lava manatunatuga iā te aʻu,
Ua faia faapea ona o loʻu popole.
3 Ua ou faalogo atu i apoapoaʻiga e faamāina ai aʻu;
O oʻu manatunatuga foʻi e aunoa ma le malamalama, ua tali mai iā te aʻu.
4 Pe na e iloa ea lenei mea talu mai le amataga,
Talu ona tuu le tagata i luga o le lalolagi,+
5 E puupuu le alaga fiafia o tagata amioleaga+
E lē umi foʻi le olioli o lē ua fulitua i le Atua?
6 E ui ina oo lona faamaualuga i le lagi,+
Ma papaʻi atu lona ulu i ao,
7 Ae e faaumatia o ia e faavavau e pei o lona otaota;+
E faapea ane foʻi i latou na vāai iā te ia, ‘O fea o iai o ia?’+
8 E lele ese o ia e pei o se miti, ma e latou te lē maua o ia;
E tuliesea foʻi o ia e pei o se faaaliga o le pō.+
9 O mata na vāai iā te ia e lē toe iloa o ia,+
E lē toe iloa foʻi o ia i le mea sa iai.+
10 E saʻili atu ona atalii ina ia faamalie i tagata faatauvaa,
E toe faafoʻi atu foʻi e ia i isi a latou mea tāua.+
11 Ua tutumu ona ivi i le malosi o lona tauleʻaleʻa,
Ae e taooto faatasi ma ia i le efuefu.+
12 Afai e suamalie le mea leaga i lona gutu,
Afai foʻi e na te faaliusuavaia i lona laulaufaiva,
13 Afai e alofa mutimutivale o ia i ai ma e lē tuua o ia,
Ma afai e na te taofia pea i lona gutu,
14 E liua lava ana meaʻai i lona manava;
E avea ma mea oona o asipi* i totonu iā te ia.
15 Ua ia foloina le oloa, a ua ia toe puaʻina mai;
Ma e aveesea e le Atua mai i lona manava.
16 E na te mitiia le mea oona o asipi;
E oti foʻi o ia i le laulaufaiva o le gata feʻai.+
17 E lē vaai lava o ia i alāvai,+
E tafe mai ai le meli ma le suāsusu.*
18 E na te toe avatu mea na ia maua, ma e na te lē foloina foʻi;
E pei o oloa mai i lana fefaatauaʻiga, ae e lē o faamalieina ai.+
19 Auā ua tuʻimomomoina o ia, ua ia tuua o ē e faatauvaa;
Ua ia faoa le fale e na te leʻi fauina.+
20 Auā e lē iloa lava e ia se filemu i totonu iā te ia;
E lē sao foʻi o ia ona o ʻoa ua iā te ia.+
21 Ua leai lava se mea o totoe mo ia e faaumatia;
O le mea lea, e lē tumau ai lona manuia.
22 A o matuā tele lava ana mea, e oo iā te ia le popole;+
E oo atu foʻi iā te ia le malosi uma o puapuaga.
23 Ina ia tumu lona manava,
E na te faaoo mai lona toʻasā aasa i ona luga+
Ma faatotō ifo i ona luga e oo ina tumu ai lona gaʻau.
24 E sola ese+ o ia mai i le auupega uʻamea;
E tuia o ia i le aū fanafana ʻapamemea.
25 E ati le aū fanafana i lona tua,
E ati le auupega iila i lona auona;+
E faasaga atu iā te ia mea mataʻutia.+
26 E teua le pōuliuli uma mo ana oloa;
E ʻaina foʻi o ia+ e le afi e lē o tapiliina;
E matuā leaga ai lava lē o loo totoe i lona faleʻie.
27 E faaalia e le lagi lana mea sesē,+
E tetee atu le lalolagi iā te ia.
28 E tafiesea lona fale e timuga tetele;
E liligi ifo foʻi mea i le aso o lona toʻasā.+
29 O le taui lenei o le tagata amioleaga mai i le Atua,+
O lona tofi lea ua tofia mai i le Atua.”