Faataoto

23 Afai e te nofo i lalo ina ia lua aai faatasi ma le tupu, e ao ona e mafaufau lelei i mea o loo i ou luma,+ 2 ma ia e tuu atu se naifi i lou ua, pe afai e te naunau tele i meaʻai.+ 3 Aua e te manaʻo tele i ana meaʻai susua, ona o meaʻai ia o le pepelo.+

4 Aua e te galue mamafa ina ia maua ai le tamaoaiga.+ Aua e te faalagolago i lou lava malamalama.+ 5 Pe e tulimataʻi ea e ou mata le mea e mou atu?+ Auā e mautinoa e fai ona apaʻau e pei o apaʻau o le aeto ma lele atu i le lagi.+

6 Aua e te ʻai i meaʻai a se tasi e mataū,+ pe manaʻo tele foʻi i ana meaʻai susua.+ 7 Auā e pei ona manatu o ia i lona loto e faapena lava o ia.+ Ua ia fai atu iā te oe: “Ia tausami ma inu,” ae e lē o iai lona loto iā te oe.+ 8 O le fasi meaʻai na e ʻai ai, e te luai mai i fafo, ma ua e faamaʻimau au upu mālie.+

9 Aua e te tautala atu i taliga o lē ua valea,+ auā e ʻinoʻino o ia i au upu faautauta.+

10 Aua e te toe sii i tua le tuaoi na faia i aso ua mavae,+ aua foʻi e te alu atu i le fanua o tama ua leai ni tamā.+ 11 Auā e malosi Lē e na te togiolaina i latou; o le a finau o ia ma oe e tusa ma la latou mataupu.+

12 Ia uaʻi mai lou loto i aʻoaʻiga ma faalogo ou taliga i upu e poto ai.+

13 Aua le taofia le aʻoaʻiga i le tama.+ Auā afai e te sasa iā te ia i le laau,* e lē oti o ia. 14 E te sasa iā te ia i le laau, ina ia laveaʻi ai lona ola mai i le Tuugamau.*+

15 Loʻu atalii e, afai e atamai lou loto,+ ona fiafia lava lea o loʻu loto.+ 16 E matuā olioli loʻu lotoatoa* pe a tautala ou laugutu i mea ua tonu.+

17 Aua neʻi leaga lou loto i ē e agasala,+ ae ia mataʻu iā Ieova i le aso atoa.+ 18 Auā a faia faapea o le a iai se lumanaʻi manuia,+ ma e lē mou atu lou faamoemoe.+

19 O oe loʻu atalii e, ia faalogo ma atamai ai, ma taʻitaʻi lou loto i le ala saʻo.+

20 Aua neʻi avea oe o sē e inu tele i le uaina,+ po o se tagata foʻi e soona ʻai tele i aano o manu.+ 21 Auā o le a mativa lē e onā ma lē e soona ʻai tele,+ ma o le a ofu i ʻieʻie masaesae lē e matamoe pea.+

22 Ia e faalogo i lou tamā o lē na māfua ai ona e fanau mai,+ aua foʻi e te ʻinoʻino i lou tinā ona ua loomatua o ia.+ 23 Ia faatau mai le upu moni+ ma aua neʻi toe faatau atu, atoa foʻi ma le atamai, o le aʻoaʻiga ma le malamalama.+ 24 E olioli le tamā o lē e amiotonu; o le tamā foʻi o lē e atamai,+ e olioli o ia iā te ia.+ 25 E olioli lou tamā ma lou tinā, e olioli foʻi o lē na fanaua oe.+

26 Loʻu atalii e, ia e tuu mai lou loto iā te aʻu, ma tau ina ia fiafia ou mata i oʻu lava ala.+ 27 Auā o le fafine talitane o le lua maulalo lea,+ ma le fafine ese o le vaieli vaitiiti lea. 28 Ua pei lenei fafine o le tagata faomea e lamalama;+ ma e na te faateleina le aofaʻi o tamāloloa e lē faamaoni.+

29 O ai ua iai le auēga? O ai ua iai le atugalu? O ai ua iai finauga?+ O ai ua iai popolega? O ai ua manuʻa fua? O ai ua iai mata mūmū? 30 O i latou ia ua umi ona inu i le uaina,+ o i latou ia ua ō mai e saʻili i le uaina ua suia.+ 31 Aua e te vaai i le uaina pe a mūmū mai pe iila mai i le ipu, ma pe a manaia tele le tofo. 32 Ae mulimuli ane, e taufeū e pei o le gata,+ ma e faamatuu atu mea oona e pei o le gata uogo.+ 33 E vaai ou mata i mea e mataʻutia, ma e tautala lou loto i mea leaga.+ 34 O le a pei oe o lē ua taoto i le ogatotonu o le sami, e pei foʻi o se tasi ua taoto i le tumutumu o le fanā.+ 35 “Ua latou fasia aʻu ae ou te leʻi afāina ai; ua latou sasa aʻu ae ou te leʻi iloaina. O afea ou te ala ai?+ Ona ou toe saʻilia lea.”+