Teuteronome

23 “Aua neʻi avea se tane ua faaleagaina+ ona fuāmanava+ po ua tipi ese lona totogasā ma sui o le faapotopotoga a Ieova.

2 “Aua neʻi avea se tama o le pō+ ma sui o le faapotopotoga a Ieova. Aua foʻi neʻi avea se tasi o lona aiga ma sui o le faapotopotoga a Ieova e oo lava i le tupulaga lona sefulu.

3 “Aua lava foʻi nei avea se tagata Amoni po o se tagata Moapi ma sui o le faapotopotoga a Ieova.+ E oo lava i le tupulaga lona sefulu, aua neʻi avea se tasi o a latou fanau ma sui o le faapotopotoga a Ieova i aso uma lava, 4 talu ai na latou lē fesoasoani+ iā te outou ma avatu ni meaʻai ma ni vai ina ua outou ō ese mai i Aikupito,+ talu ai foʻi na latou totogia Palaamo le atalii o Peoro mai i Petoru i Mesopotamia, ina ia fetuu iā te oe.+ 5 E leʻi fia faafofoga Ieova lou Atua iā Palaamo;+ ae na suia e Ieova lou Atua le malaia i le manuia,+ auā e alofa Ieova lou Atua iā te oe.+ 6 Aua e te faia ni mea ina ia latou filemu ai ma tamaoaiga ai i latou i ou aso uma lava.+

7 “Aua e te ʻinoʻino i se tagata Etoma, auā o ia o lou uso.+

“Aua e te ʻinoʻino i se tagata Aikupito, auā na e aumau ai o se tagata ese i lona atunuu.+ 8 O atalii e fananau mai iā i latou i lona tolu o tupulaga, e mafai ona avea i latou ma sui o le faapotopotoga a Ieova.

9 “Afai e te siitaua atu i ou fili, ia e faaeteete foʻi neʻi e faia se mea leaga.+ 10 Afai ua iā te oe se tane ua lē mamā ona o se mea e lē mamā na tupu iā te ia i le pō,+ e ao ona alu o ia i tua o le togālauapi. Aua neʻi sau o ia i le togālauapi.+ 11 Pe a oo i le afiafi, e ao ona tāʻele o ia i le vai, a goto le lā e mafai ona toe sau o ia i le togālauapi.+ 12 E tatau ona iai se nofoaga faapitoa* mo oe i tua o le togālauapi, ma e tatau ona e alu i ai. 13 E tatau ona iai se tamaʻi suō faatasi ma au meafaigaluega, pe a e faatū i fafo, ia e eli se pū i lau suō ma liliu ma tanu ai ou otaotavale.+ 14 Auā o loo fesavaliaʻi Ieova lou Atua i totonu o lau togālauapi, ina ia laveaʻi iā te oe+ ma tuuina atu ou fili iā te oe;+ e ao ona mamā mea uma i lau togālauapi,+ ina neʻi silasila o ia i se mea leaga iā te oe ma liliuese ai ma lē ō faatasi ma oe.+

15 “Aua e te toe faafoʻi se pologa i lona matai pe a sola ese o ia mai i lona matai ma sau iā te oe.+ 16 Ia nofo faatasi pea o ia ma oe i so o se mea e filifili ai o ia i se tasi o ou aai,+ po o fea lava e manaʻo ai o ia. Aua e te agaleaga iā te ia.+

17 “Aua neʻi avea se tasi o afafine o Isaraelu ma fafine talitane o le malumalu,+ aua foʻi neʻi avea se tasi o atalii o Isaraelu ma tamāloa talitane o le malumalu.+ 18 Aua e te aumaia le totogi o se fafine talitane+ po o le tau o se maile*+ i le fale o Ieova lou Atua e fai ai se tautoga, auā o nei mea uma e lua e inosia e Ieova lou Atua.

19 “Aua e te manaʻo i se tupe faasili mai i lou uso,+ o tupe faasili i tupe, o se totogi faasili i meaʻai,+ o se totogi faasili i so o se mea e mafai ona tāpā mai e se tasi se mea faasili. 20 E mafai ona e manaʻo i se tagata mai i se isi atunuu+ e totogi mai se tupe faasili, ae aua e te manaʻo e totogi mai e lou uso se tupe faasili;+ ina ia faamanuia mai ai Ieova lou Atua iā te oe i mea uma e te faia i le laueleele e te alu atu i ai ina ia fai mo oe.+

21 “Afai e te faia se tautoga iā Ieova lou Atua,+ aua e te faifaiaga i lou faataunuuina,+ auā o le a tāpā mai lava e Ieova lou Atua mai iā te oe lou faia o lea mea, ma o se agasala lea iā te oe.+ 22 Ae afai e te leʻi faia se tautoga, e lē o se agasala lea iā te oe.+ 23 Ia e tausia au upu e te fai atu ai,+ ia e faia e pei ona e tautō ai iā Ieova lou Atua, o se taulaga tauofo lea ua tautala atu ai lou gutu.+

24 “Afai e te alu i le togāvine a lou tuaoi, ia e ʻai tau lava o fuifui vine e te maʻona ai, ae aua lava neʻi e fafao mai ni fuifui vine i lau ato.+

25 “Afai e te alu i le fanua o iai togāsaito a lou tuaoi, ia e tau mai na o fua matua i lou lima, ae aua e te sala i le selesaito le togāsaito a lou tuaoi.+