Salamo

102 Ieova e, ia e faafofoga mai i laʻu tatalo;+

Ia oo atu foʻi iā te oe laʻu alaga mo se fesoasoani.+

 2 Aua neʻi natia ou fofoga mai iā te aʻu i le aso ou te puapuagatia ai.+

Ia liliu mai ou fofoga iā te aʻu;+

Ia e vave tali mai i le aso ou te valaau atu ai.+

 3 Auā ua oo mai le iʻuga o oʻu aso e pei o le asu,+

Ua aasa mai foʻi oʻu ivi e pei o se taʻinafi.+

 4 Ua taia i le lā loʻu loto ma ua magumagu e pei o se vao,+

Auā ua galo iā te aʻu ona ou ʻai o laʻu meaʻai.+

 5 Ona o loʻu ōi+

Ua pipii ai oʻu ivi i oʻu aano.+

 6 Ua pei aʻu o le kati* i le toafa.+

Ua avea foʻi aʻu e pei o le tamaʻi lulu o nofoaga tuufua.

 7 Ua ou vaivai

Ma ua pei aʻu o se manulele ua tuua toʻatasi i le taualuga o le fale.+

 8 Ua taufaifai mai iā te aʻu oʻu fili i le aso atoa.+

O ē e ula mai iā te aʻu, ua latou faaaogā loʻu igoa e tautō ai.+

 9 Auā ua ou ʻaina le lefulefu e pei o se meaʻai;+

O oʻu vaiinu foʻi ua fefiloi ia ma loimata,+

10 Ona o lou toʻasā ma lou toʻatamaʻi;+

Auā ua e sii aʻu i luga ina ia e lafoaʻiina aʻu.+

11 O oʻu aso ua pei o se ata lafoia ua mou atu,+

Ma o aʻu foʻi ua ou mago e pei o le vao.+

12 A o oe Ieova e, e te afio e faavavau lava,+

O lau faamanatuga foʻi e mai i lea tupulaga i lea tupulaga.+

13 E te tulaʻi lava, ma e te alofa mutimutivale iā Siona,+

Auā o le taimi lenei e te talileleia ai o ia,

Auā ua oo mai le taimi atofaina.+

14 Auā ua fiafia au auauna i ona maa,+

Ua latou fiafia foʻi i lona efuefu.+

15 Ona matataʻu ai lea o atunuu i le suafa o Ieova,+

Ma tupu uma o le lalolagi i lou mamalu.+

16 Auā e atiaʻe lava e Ieova o Siona;+

E faaali mai foʻi o ia i lona mamalu.+

17 E liliu mai lava o ia i le tatalo a ē ua aveesea a latou mea uma,+

E lē inosia foʻi e ia la latou tatalo.+

18 Ua tusia lenei mea mo le tupulaga i le lumanaʻi;+

E vivii foʻi iā Ioa le nuu e faia.+

19 Auā ua silasila ifo o ia mai i lona afioaga paia maualuga,+

Ua silasila ifo foʻi Ieova mai i le lagi i le lalolagi,+

20 Ina ia faafofoga mai ai i le ōi a le pagota,+

Ina ia tatalaina ai foʻi i latou ua tofia i le oti;+

21 Ina ia faalauiloa atu le suafa o Ieova i Siona+

Ma lona viiga i Ierusalema,+

22 Pe a faapotopotoina faatasi nuu uma,+

E auauna atu ai malo iā Ieova.+

23 Ua ia faavaivaia loʻu malosi i le ala,+

Ua ia faapuupuuina foʻi oʻu aso.+

24 Na ou faapea atu: “Loʻu Atua e,

Aua neʻi e aveeseina aʻu i le ʻafa o loʻu olaga;+

E āutupulaga lava ou tausaga.+

25 Na e faataatia le faavae o le lalolagi i aso anamua,+

Ma o le lagi o le galuega lea a ou aao.+

26 E fano ia mea, a o oe e te tumau pea;+

Ma e pala foʻi ia mea uma e pei o se ofu.+

E te suia na mea e pei o le ofu, ma e oo uma lava i lo latou iʻuga.+

28 E nonofo ai pea i inā atalii o au auauna;+

E matuā faatumauina foʻi a latou fanau i ou luma.”+