Salamo

21 Ieova e, ua olioli le tupu+ i lou malosi;

E matuā olioli pea o ia i lau faaolataga!+

 2 Ua e foaʻiina iā te ia o mea e naunau i ai lona loto,+

E te leʻi taofia foʻi mea na ōle atu ai ona laugutu.+ Selā.

 3 Auā ua e finagalo e faamanuia o ia i mea lelei,+

Ma faaee i lona ulu le pale o auro ua faamamāina.+

 4 Ua ia talosaga atu iā te oe ia faaumiumi lona ola. Ma ua e foaʻiina mai iā te ia,+

Le tele o aso e oo lava i le faavavau.+

 5 Ua tele lona mamalu i lau faaolataga.+

Ua e faaee i ona luga le malualii ma le matagofie.+

 6 Ua e tuuina iā te ia le manuia e oo i le faavavau;+

Ua e faafiafia foʻi iā te ia i le olioli o loo i ou luma.+

 7 Auā o loo faatuatua le tupu iā Ieova,+

E oo lava i le alofa faamaoni o Lē e Silisili Ese. E lē tautevateva foʻi o ia.+

 8 E maua e lou aao ou fili uma;+

E maua foʻi e lou aao taumatau i latou o ē e ita iā te oe.

 9 E te faia i latou e pei o se ogaumu aasa i le taimi ua atofaina e te faaali mai ai.+

E faaumatia e Ieova i latou i lona toʻasā, ma e fano foʻi i latou i le afi.+

10 E te faaumatia a latou fanau mai i le lalolagi,+

Ma ē e tupuga mai iā i latou mai i le fanau a tagata.+

11 Auā ua latou taumafai e faia mea leaga iā te oe;+

Ua latou mafaufau foʻi i mea e lē mafai ona latou faataunuuina.+

12 Auā e te faia i latou ia fulitua ma sosola ai+

I au ʻaufana ua e saunia faasaga iā i latou.+

13 Ieova e, ia faasilisiliina oe i lou malosi.+

E matou te pepese ma fai pesega i lou malosi.+