Isaia

24 Faauta! O loo faagaogaoina e Ieova le atunuu ma faatafunaina,+ ua ia faafaō+ le atunuu ma faataapeapeina ē o loo nonofo ai.+ 2 O le a tutusa le mea e oo i tagata lautele ma le faitaulaga; e tutusa le mea e oo i le auauna ma le matai; e tutusa le mea e oo i le auauna teine ma lona matai fafine; e tutusa le mea e oo i lē e faatau mai ma lē e faatau atu oloa; e tutusa le mea e oo i le tagata e nonō atu tupe ma lē e aitalafu tupe; e tutusa foʻi le mea e oo i lē e talia pasene ma lē e totogia le pasene.+ 3 E mautinoa lava o le a faagaogaoina le atunuu, e mautinoa lava o le a faoa,+ auā o le mea lava lea ua fetalai mai ai Ieova.+ 4 Ua faavauvau le atunuu, ua mou atu.+ Ua mamae le laueleele ua fua mai, ua mou atu. Ua vaivai o ē e maualuluga i le atunuu.+ 5 Ua leaga le atunuu ona o ē o loo nonofo ai,+ auā ua latou lē tausia tulafono,+ ua latou suia tuutuuga,+ ua latou solia le feagaiga lea na osia mo se taimi umi.+ 6 O le mea lea ua ʻaina ai le atunuu i le faafanoga,+ ma ua nofosala ai ē o loo nonofo ai. O le mea foʻi lea ua faaitiitia ai le aofaʻi o i latou o ē o loo nonofo i le atunuu, ma e toʻaitiiti lava tagata ua totoe.+

7 Ua faavauvau le uaina fou, ua mamae le vine,+ ma ua mapuitigā i latou uma o ē sa fiafia o latou loto.+ 8 Ua muta musika mālie o le topa,* ua uma le pisa o ē na matuā fiafia, ua muta foʻi musika mālie o le kitara.+ 9 E latou te inu a latou uaina e aunoa ma ni pesepesega; ua oona foʻi le ʻava malosi iā i latou o ē e feinu ai. 10 Ua lepetia i lalo le aai ua gaogao;+ ma ua tapunia fale uma e lē toe ulu atu i ai. 11 Ua iai se alaga i le ala tele mo le uaina. Ua mavae atu le olioli uma; ua mou atu foʻi le fiafia o le atunuu.+ 12 Ua mataʻutia tulaga leaga ua totoe i le aai; ua matuā nutililiia le faitotoʻa o le aai.+

13 Auā o le mea o le a oo i totonu o le atunuu, atoa foʻi ma tagata, o le a pei o le sasaina o le laau o le olive,+ e pei foʻi ona iai fuifuivine e totoe pe a uma ona aoaoina vine.+ 14 O le a latou leotetele, e latou te alalaga atu ma le olioli. O le a latou alalaga fiafia foʻi mai i le sami ona o le silisili ese o Ieova.+ 15 O le mea lea, e latou te faamamaluina ai Ieova i le itu*+ ua iai le malamalama,+ e faia foʻi i motu o le sami, o le suafa lava o Ieova+ le Atua o Isaraelu. 16 Ua tatou faalogo i pesega mai i tuluʻiga o le atunuu:+ “O Viiga i Lē e Amiotonu!”+

Ae ou te fai atu: “Oi talofa iā te aʻu! Auā ua fai ifo loʻu malosi, ua fai ifo loʻu malosi!+ Ua fai mea lē faamaoni i latou e lē faamaoni.+ Ua fai mea lē faamaoni ē e lē faamaoni i a latou gaoioiga lē faamaoni.”+

17 O oe lē ua nofo i le atunuu, ua oo iā te oe le mataʻu tele, ma le lua, ma le mailei.+ 18 O le mea lea, o so o se tasi e sola mai i le leo o le mea e mataʻutia o le a paʻū i le lua, o so o se tasi foʻi e alu aʻe mai i le lua e maua o ia i le mailei.+ Auā o le a tatalaina pupuni o vai i lugā,+ e lūlūina foʻi faavae o le laueleele.+ 19 Ua matuā māvaevae le laueleele, ua matuā lūlūina, ua matuā gatete le laueleele.+ 20 Ua tau paʻū le atunuu e pei o se tagata onā, ua maluelue e pei o se tamaʻi fale e leoleo ai le fanua.+ Ua mamafa lana agasala iā te ia,+ ma e ao ona paʻū ma lē toe tulaʻi ai.+

21 O lea aso, o le a uaʻi atu ai le silafaga a Ieova i ʻautau i lugā i le mea maualuga, atoa ma tupu o le lalolagi i luga o le lalolagi.+ 22 O le a faapotopotoina i latou e pei ona faapotopotoina o pagota i le lua,+ ma loka ai i le falepuipui;+ a mavae foʻi aso e tele ona toe uaʻi atu ai lea iā i latou.+ 23 Ua faamāina le masina ua atoa, ua māsiasi foʻi le lā ua susulu malosi,+ auā ua avea Ieova o ʻau ma tupu+ i lona mamalu i le Mauga o Siona,+ ma Ierusalema, ma luma o ona toeaina.+