Salamo

52 O oe na le tagata malosi, aiseā e te mitamita ai i mea leaga?+

E alofa faamaoni le Atua i le aso atoa.+

 2 Ua fafau e lou laulaufaiva mea leaga, ua maʻai e pei o se tafi,+

Ua galue taufaaʻoleʻole foʻi.+

 3 Ua sili atu lou fiafia i le mea leaga nai lo o le mea lelei,+

Ma le pepelo nai lo o upu faamaoni.+ Selā.

 4 Le laulaufaiva taufaaʻoleʻole e,+

Ua e fiafia i upu uma e faaleagaina ai.+

 5 E faaumatia oe e faavavau e le Atua;+

E na te aveeseina oe ma liaʻieseina oe mai i lou faleʻie,+

E na te liaʻieseina foʻi oe mai i le laueleele o ē o loo ola.+ Selā.

 6 E vāai i ai o ē e amiotonu ma fefefe ai,+

E featai foʻi i latou ona o ia.+

 7 O le tagata lenā e na te lē faia le Atua ma ona malosi,+

Ae e faatuatua i le tele o ana ʻoa,+

E faalagolago o ia i puapuaga e na te faatupuina.+

 8 Ae e avea aʻu e pei o le olive lauolaola+ i le fale o le Atua;

Ou te faatuatua atu foʻi i le alofa faamaoni o le Atua i aso uma lava, e oo i le faavavau.+

 9 Ou te faaneenee atu iā te oe i aso uma lava, ona ua e gaoioi;+

Ou te faamoemoe foʻi i lou suafa, auā e lelei lea i luma o ē e faamaoni iā te oe.+