Teuteronome

14 “O outou o fanau a Ieova lo outou Atua.+ Aua neʻi o outou selei+ i o outou tino pe sele mamā+ o outou muāulu ona o se tagata ua oti. 2 Auā o oe o le nuu paia+ iā Ieova lou Atua, ma na filifilia oe e Ieova e fai ma ona nuu, o le oloa tāua+ mai i tagata uma i le fogāeleele.

3 “Aua e te ʻai i so o se mea e inosia.+ 4 O ituaiga o manu nei e tou te aai ai:+ o le povi poʻa, o le mamoe, o le ʻoti, 5 o le ʻaila, o le sevi, o le imura,+ o le ʻoti vao, o le tisona, o le mamoe vao, ma le somera; 6 o manu uma foʻi e magalua atigivae ma ua iai le va i atigivae,+ ma toe ʻai i lana mama, e tou te aai ai. 7 E na o ituaiga o manu nei e aua tou te aai ai mai i manu e toe aai i a latou mama pe magalua o latou atigivae: o le kamela,+ o le lapiti,+ o le sefanai,+ auā e toe aai ia manu i a latou mama, ae e lē magalua atigivae. E lē mamā ia manu mo outou. 8 E faapena foʻi le puaa,+ auā e magalua ona atigivae ae e lē toe ʻai i lana mama. E lē mamā lea manu mo outou. Aua tou te aai i lona aano, aua foʻi tou te paʻi i tino mamate o ia manu.+

9 “O ituaiga meaola nei o loo i le vai e tou te aai ai: O meaola uma e iai ʻapaʻapa ma una e tou te aai ai.+ 10 O meaola uma e leai ni ʻapaʻapa po o ni una, aua tou te aai ai.+ E lē mamā ia meaola mo outou.

11 “O so o se manulele e mamā, ia outou aai ai. 12 Ae o manulele nei aua tou te aai ai: o le aeto, o le perese, o le oseni uliuli,+ 13 o le aia mūmū, o le aia uliuli,+ o le kite e tusa ma lona ituaiga; 14 o oreva+ uma e tusa ma lona ituaiga; 15 o le iaena,+ o le lulu, o le saape, o le nesa e tusa ma lona ituaiga; 16 o le lulu laʻitiiti, o le lulu e uumi taliga,+ o le tanisamiti, 17 o le kati,+ o le oseni, o le saleka, 18 o le kasita, o le matuu e tusa ma lona ituaiga, o le tukapiti ma le peʻa.+ 19 O meaola fai apaʻau uma e feoaʻi e lē mamā ia mo outou.+ Aua le aai ai. 20 O manulele mamā uma e tou te aai ai.

21 “Aua tou te aai i se manu ua mate fua.+ Ia outou avatu lea tino mate i le tagata ese ua aumau i o outou aai, e ao foʻi ona ʻai ai o ia; pe faatau atu foʻi i se tagata mai i se isi atunuu, auā o oe o le nuu paia iā Ieova lou Atua.

“Aua e te saka se tamaʻi ʻoti i le suāsusu o lona tinā.+

22 “E ao lava ona e avatu le sefuluaʻi o au fatu uma, ia e fua mai i le fanua i lea tausaga ma lea tausaga.+ 23 I luma o Ieova lou Atua, i le nofoaga o le a ia filifilia e tuu ai lona suafa, e ao ona e ʻai ai le vaega lona sefulu o au fatu,+ o lau uaina fou, o lau suāuu, o ulumatua o lau lafu povi ma lau lafu mamoe;+ ina ia e iloa ai ona mataʻu pea iā Ieova lou Atua.+

24 “Pe afai o le a mamao tele le malaga iā te oe,+ auā e lē mafai ona e aveina na mea uma, talu ai e mamao tele le nofoaga o le a filifilia e Ieova lou Atua e tuu ai lona suafa,+ (auā e faamanuia Ieova lou Atua iā te oe,)+ 25 ia e faaliliuina na mea i tupe, ma e ao ona tuu i se ato ma uu i lou lima, ma e alu atu i le nofoaga o le a filifilia e Ieova lou Atua. 26 Ia e faaalu le tupe e faatau mai ai so o se mea e te manaʻo i ai,+ e pei o povi, o mamoe, o ʻoti, o uaina ma ʻava malosi+ ma so o se mea lava e te loto i ai; e ao foʻi ona e ʻai i luma o Ieova lou Atua ma le fiafia,+ o oe ma lou aiga. 27 Aua e te tuulafoaʻiina le sa Levī o loo i totonu o ou aai,+ auā e leai sana vaega po o sona tofi faatasi ma oe.+

28 “I le faaiʻuga o le tolu tausaga, e te aumai ai le sefuluaʻi o au faaeleeleaga uma i lenā tausaga,+ e ao foʻi ona e teua i ou aai. 29 E ao ona ō mai le sa Levī+ e leai sana vaega po o sona tofi faatasi ma oe, o le tagata ese e aumau,+ o le tama e leai se tamā, o le fafine ua oti lana tane,+ o i latou ia o loo i totonu o ou aai, e latou te aai foʻi ma maoona ai; ina ia faamanuia+ Ieova lou Atua iā te oe i galuega+ uma e faia e ou lima.