Sapakuka

1 O le feʻau na taʻu atu i le perofeta o Sapakuka i se faaaliga: 2 Ieova e, o le ā le umi ou te alaga atu ai mo se fesoasoani ae e te lē faafofoga mai?+ O le ā le umi ou te alaga atu ai iā te oe ona o faiga sauā, ae e te lē faaola mai?+ 3 Aiseā ea ua e faaali mai ai iā te aʻu o mea tigā ma ua e silasila mai ai pea i puapuaga? Aiseā ua faoa ai mea ma faia faiga sauā i oʻu luma, aiseā foʻi ua faia ai fefinauaʻiga ma tulaʻi mai ai misa?+

4 O le mea lea ua lē toe faamalosia ai le tulafono, ma ua lē faia ai foʻi le faamasinotonu.+ Auā ua siʻomia lē ua amiotonu e lē ua amioleaga, o le mea lea ua faia ai le faamasinoga faapiʻopiʻo.+

5 “O outou, ia outou vāai atu i nuu, ma ia mātauina, ia pulatoʻa atu foʻi ma le matuā taufaiofo o le tasi i le isi.+ Ia matuā ofo; auā e iai se galuega e faia e se tasi i o outou aso, lea e tou te lē talitonu i ai e ui lava ina taʻu atu.+ 6 Auā ou te faatulaʻi atu tagata Kaletaia,+ o le nuu e sauā ma osovale, e alu atu i fanua taalaelae o le lalolagi ina ia fai mo ia mea e nonofo ai ae e lē o ia e ona.+ 7 O lea foʻi nuu e mataʻutia ma e fefefe i ai tagata. E tupu mai iā te ia lana lava tulafono ma lona lava mamalu.+ 8 E sili ona saoasaoa ana solofanua nai lo o nameri,* e sili foʻi ona feʻai i latou nai lo o luko o le afiafipō.+ E tatū foʻi alofivae o ana solofanua i le eleele ma e mamao tele le mea ua ō mai ai ana solofanua. E felelei e pei o aeto, e televavave atu e aai i se mea.+ 9 E ō mai ma ana ʻau uma ina ia faasauā.+ Pe a faasasaga i luma o latou mata e pei i latou o le matagi mai i sasaʻe,+ ma e aoaoina pagota e pei o le oneone. 10 A o lenei nuu, e faatauemu i tupu, e taliē foʻi i alii sili.+ E taliē foʻi i nofoaga malupuipuia uma,+ ma e na te tanuina mea maupuʻepuʻe ma manumalo ai. 11 I lenā taimi, e agaʻi atu ai i luma e pei o se matagi ua ui ane ma nofosala ai.+ O lona malosi, o lona atua lea.”+

12 Ieova e, e te lē mai le faavavau ea?+ Loʻu Atua e, o Lē e Paia iā te aʻu, e te lē maliu lava.+ Ieova e, ua e saunia lea nuu ina ia faaoo i ai le faasalaga; le Papa e,+ ua e faavaeina ina ia fai ai aʻoaʻiga.+

13 E matuā mamā ou fofoga, ma e te lē fia silasila i mea leaga; e lē mafai foʻi ona e silasila i mea faalētonu.+ Aiseā la ua e silasila ai iā i latou o ē ua faia mea e lē faamaoni+ ma e lē fetalai ai pe a faatamaʻia e lē e amioleaga o lē ua sili ona amiotonu nai lo o ia?+ 14 Aiseā foʻi ua e faia ai tagata e pei o iʻa o le sami, e pei o mea fetolofi e leai se tasi e pule ai?+ 15 Ua ave aʻe i latou uma e le fili i le mātau;+ ua ia tosoeseina i latou i lana upega, ma ua ia aoaoina i latou i lana upega fagota.+ O le mea lea ua ia olioli ma fiafia ai.+ 16 O le mea lea ua ia avatu ai taulaga i lana upega ma faamū ai mea manogi i lana upega fagota; auā o mea ia ua faasuāuu lelei ai ana mea ua maua, ma o lana meaʻai e malosi ai le tino.+ 17 Po o le mea ea lea e na te faagaogao ai lana upega, ma na te faaumatia ai pea nuu e aunoa ma sona alofa mutimutivale?+