Faataoto
18 O lē e na te faaesea o ia lava, e saʻili o ia i lona lava faanaunauga;+ o le a tetee o ia i le atamai aogā uma.+
2 E lē fiafia le tagata valea i le faautaga loloto,+ seʻi vaganā ua faaali mai le mea o loo i lona loto.+
3 A sau le tagata amioleaga, e sau ai foʻi ma le ʻinoʻino;+ a ua ō faatasi le māsiasi+ ma le faalumaina.
4 O upu o le gutu o le tagata o vai loloto ia.+ O le vaieli o le atamai, o le vai tele lea e puna mai ai.+
5 E lē lelei le faaalia o le faaʻauʻau i le tagata leaga,+ po o le liliuese o le faamasinotonu mai i le tagata amiotonu.+
6 E aafia laugutu o le tagata valea i misa,+ ma e valaau atu foʻi lona gutu i tā.+
7 O le gutu o le tagata valea e faaleagaina ai o ia,+ ma o ona laugutu e maileia ai lona ola.+
8 O upu a le tagata faitala taufaaleaga e pei o mea e folo patatō,+ ma e ō ifo i vaega pito i totonu o le manava.+
9 O le tagata foʻi e faaalia le paiē i lana galuega,+ o ia o le uso o lē e faataugā mea.+
10 O le suafa o Ieova o le ʻolo malosi lea.+ E sola atu i ai o lē e amiotonu ma maua ai le puipuiga.+
11 O le oloa tāua a lē e mauʻoa o lona aai malosi lea,+ ua pei o se pā malupuipuia i lona lava manatu.+
12 E muamua le lotofefete o le tagata i le paʻū,+ e muamua foʻi le lotomaulalo i le mamalu.+
13 Pe a tali atu se tasi i se mataupu ae e leʻi faalogo i ai,+ o lona lava valea lea ma le faamāina.+
14 E mafai e le agaga o le tagata ona onosaia lona maʻi;+ ae o ai e mafai ona lavātia le agaga ua momomo?+
15 O le loto o le tagata malamalama e na te maua le poto,+ a o taliga o ē e atamamai e saʻili i le poto.+
16 O le meaalofa a se tagata e faalautele ai avanoa mo ia,+ e taʻitaʻiina ai o ia i luma o tagata maualuluga.+
17 O lē e tautala muamua e tusa ma lana tagi faaletulafono,+ e amiotonu o ia; e sau lona tuaoi ma suʻesuʻe auʻiliʻili o ia.+
18 E faatoʻafilemuina finauga i le faia o le vili,+ ma e tuueseeseina ai le tagata malosi mai i le isi tagata malosi.+
19 O le uso ua agaleagaina e sili ona faigatā o ia nai lo o se aai malosi;+ ma e iai maseiga e pei o pou faalava o faitotoʻa o se ʻolo.+
20 O le fua o le gutu o le tagata e maʻona ai lona manava;+ e maʻona foʻi o ia i fua o ona laugutu.+
21 O le ola ma le oti o loo i le malosi o le laulaufaiva,+ o lē e naunau i ai e ʻai o ia i lona fua.+
22 Po ua maua ea e se tasi se avā lelei?+ Ua maua e ia le mea lelei,+ ua maua foʻi e ia le finagalo malie o Ieova.+
23 E ʻaiʻoi atu le tagata ua itiiti ana mea,+ a o lē ua mauʻoa e tali malosi mai o ia.+
24 E iai uō e toe lavea le tasi i le isi,+ ae e iai foʻi le uō e sili ona alofa faamaoni nai lo o le uso.+