Ieremia
23 “Oi talofa i leoleo mamoe o ē ua faaumatia ma faasalalau solo mamoe ua ou fafagaina!”+ ua fetalai mai ai Ieova.
2 O le mea lea ua fetalai mai ai Ieova le Atua o Isaraelu, faasaga i leoleo mamoe o loo leoleoina loʻu nuu: “Ua outou faasalalau solo aʻu mamoe; ua outou faataapeape pea i latou, ma ua outou lē tausia foʻi i latou.”+
“O lea, ou te liliu atu ai iā te outou ona o le leaga o a outou mea na fai,”+ ua fetalai mai ai Ieova.
3 “O aʻu lava ou te faapotopoto faatasi o ē o totoe o aʻu mamoe, mai i atunuu uma na ou faataapeape i ai i latou,+ ma ou toe aumaia i latou i lo latou laufanua e aai ai,+ latou te fanafanau ai lava ma faatoʻateleina ai.+ 4 Ou te faatūina mo i latou o leoleo mamoe e leoleoina lava i latou;+ e lē toe fefefe ai i latou pe matataʻu,+ e leai foʻi se tasi e leiloa,” ua fetalai mai ai Ieova.
5 “Faauta! E oo mai aso,” ua fetalai mai ai Ieova, “ou te faatūina ai mo Tavita se tātupu amiotonu.+ E pule lava le tupu,+ e gaoioi ma le faautauta, ma faia le faamasinogatonu ma le amiotonu i le nuu.*+ 6 E faaolaina Iuta i ona aso, e nonofo foʻi Isaraelu+ ma le saogalemu.+ O le suafa foʻi lenei e faaigoa ai o ia, o Ieova o La Tatou Amiotonu.”+
7 “O le mea lea, faauta! e oo mai aso,” ua fetalai mai ai Ieova, “e lē toe faapea ane ai i latou, ‘O loo soifua Ieova o lē na aveina aʻe le fanauga a Isaraelu mai i le nuu o Aikupito,’+ 8 ae e faapea, ‘O loo soifua Ieova o lē na aveina aʻe ma o lē na aumaia le fanauga a le aiga o Isaraelu mai i le nuu o le itu i mātū, ma nuu uma na ou faataapeape i ai i latou,’ ona nonofo ai lava lea o i latou i lo latou laueleele.”+
9 A ua momomo loʻu loto i totonu iā te aʻu ona o perofeta. Ua gatete oʻu ivi uma. Ua pei aʻu o se tagata ua onā,+ ma ua pei foʻi o se tagata ua faatoʻilaloina i le uaina, ona o Ieova ma ana afioga paia. 10 Auā ua tumu le nuu+ i tagata mulilulua.+ Ona o le malaia, ua faavauvau ai le nuu,+ ua mamago fanua o le toafa e aai ai lafumanu;+ ua leaga lava o latou ala, ma ua lē tonu foʻi lo latou malosi.
11 “Auā o perofeta atoa ma ositaulaga, ua amioleaga i latou.+ Ua ou iloa foʻi i loʻu fale lo latou leaga,”+ ua fetalai mai ai Ieova. 12 “O le mea lea e avea ai lo latou ala iā i latou e pei o mea maseesee i le pōuliuli,+ e tuleia i ai i latou ma paʻuʻū ai lava.”+
“Auā ou te faaoo atu iā i latou le malaia, i le tausaga e faasalaina ai i latou,”+ ua fetalai mai ai Ieova. 13 “Ua ou iloa amioga lē talafeagai a perofeta o Samaria.+ Ua fai i latou ma perofeta ua uunaʻia e Paala,+ ua faia pea e i latou loʻu nuu o Isaraelu ina ia feoaʻi solo.+ 14 Ua ou vaaia foʻi mea mataʻutia i perofeta o Ierusalema,+ ua latou faia le mulilua+ ma savavali i le pepelo;+ ua latou faamalosia lima o ē e faia mea leaga ina ia lē toe foʻi mai ai i latou,+ e taʻitasi mai i lona leaga. Ua pei i latou uma iā te aʻu o Sotoma,+ ma ua pei ē uma o loo nonofo ai o Komoro.”+
15 O le mea lenei ua fetalai mai ai Ieova o ʻau faasaga i perofeta: “O lenei, ou te fafaga iā i latou i mea oona, ma ou avatu iā i latou vai oona e feinu ai.+ Auā o perofeta o Ierusalema ua māfua ai ona fulitua+ le nuu uma.”
16 O le mea lenei ua fetalai mai ai Ieova o ʻau: “Aua tou te faalogo atu i upu a perofeta o ē o loo vavalo atu iā te outou.+ Ua latou taʻitaʻia outou i mea e lē aogā.+ Ua latou tautatala+ atu i faaaliga mai i o latou lava loto, ae e lē mai i le fofoga o Ieova.+ 17 Ua latou fai atu pea lava pea iā i latou o ē e lē faaaloalo mai iā te aʻu, ‘Ua fetalai Ieova: “E oo le filemu iā te outou.”’+ Ua latou faapea atu foʻi iā i latou uma o loo savavali i le maaa o o latou loto,+ ‘E leai se mala e oo iā te outou.’+ 18 O ai ea e tū atu i le faapotopotoga o uō mamae+ a Ieova, ina ia vaai o ia ma faalogo ai i lana afioga?+ O ai ea foʻi ua uaʻi atu i lana afioga ina ia lagona ai e ia?+ 19 Faauta! Ua alu atu le matagi malosi mai iā Ieova, e alu atu lava lona maʻemaʻeā e pei o se afā mataʻutia.+ E taavili atu i ulu o ē e amioleaga.+ 20 E lē toe liliu le toʻasā o Ieova+ seʻia faia e ia, seʻia faataunuu foʻi e ia manatu o lona finagalo.+ E tou te malamalama lelei foʻi i ai i aso e gata ai.+
21 “Ou te leʻi aauina atu na perofeta, a ua latou taufetuli. Ou te leʻi tautala atu foʻi iā i latou, a ua latou faia valoaga.+ 22 Ae pe ana tutū i latou i le faapotopotoga o aʻu uō mamae,+ semanū ua latou faailoa atu i loʻu nuu aʻu upu, ma latou faaliliuese i latou mai i lo latou ala leaga ma le leaga o a latou mea na fai.”+
23 “Po o aʻu ea o se Atua e latalata, ae e lē o se Atua e mamao?” ua fetalai mai ai Ieova.+
24 “Pe e mafai ea ona lafi se tagata i nofoaga lilo, ae ou te lē iloa o ia?”+ ua fetalai mai ai Ieova.
“E lē ua tumu ea le lagi ma le lalolagi iā te aʻu?”+ ua fetalai mai ai Ieova. 25 “Ua ou faalogo i mea ua fai atu ai perofeta, o ē ua vavalo ma le pepelo i loʻu igoa,+ ua faapea atu, ‘Ua fai laʻu miti! Ua fai laʻu miti!’+ 26 O le ā le umi e iai pea i loto o le ʻauperofeta o ē o loo vavalo atu i mea pepelo, ma o perofeta lava i latou o le taufaaʻoleʻole o o latou loto?+ 27 Ua mafaufau i latou ina ia faagalo e loʻu nuu loʻu igoa e ala i a latou miti ua latou faamatala atu i le tasi i le isi,+ e pei foʻi ona faagalo e o latou tamā loʻu igoa ona o Paala.+ 28 O le perofeta ua fai lana miti, ia faamatala atu e ia le miti; a o lē ua iā te ia laʻu upu, ia tautala atu o ia i laʻu upu ma le faamaoni.”+
“E faapefea ona tutusa ʻau mamago o saito ma fatu o le saito?”+ ua fetalai mai ai Ieova.
29 “Pe e lē pei ea laʻu upu o le afi,”+ ua fetalai mai ai Ieova, “ma e pei o le samala e tuʻininii ai le papa?”+
30 “O le mea lea ou te tetee atu ai i perofeta,”+ ua fetalai mai ai Ieova, “o ē ua gaoia aʻu upu, e taʻitasi mai i lana aumea.”+
31 “O le mea lea ou te tetee atu ai i perofeta,” ua fetalai mai ai Ieova, “o ē ua faaaogā o latou laulaufaiva e faapea atu ai, ‘Ua fetalai mai o ia!’”+
32 “O le mea lea ou te tetee atu ai i perofeta o ē e faia miti pepelo,” ua fetalai mai ai Ieova, “o ē ua faamatala atu na miti ma faasesēina ai loʻu nuu ona o a latou mea pepelo,+ ma lo latou gugutu.”+
“Ae ou te leʻi aauina atu i latou pe poloaʻia foʻi i latou. O le mea lea e lē aogā ai i latou i lenei nuu,”+ ua fetalai mai ai Ieova.
33 “Afai e fesili mai lenei nuu, o le perofeta, po o le ositaulaga iā te oe, e faapea, ‘O le ā le avega mai iā Ieova?’+ ona e fai atu lea iā i latou, “‘O outou na o le avega!+ Ou te tuulafoaʻiina lava outou,”+ ua fetalai mai ai Ieova.’ 34 A o le perofeta, o le ositaulaga, po o le nuu o ē e faapea mai, ‘O le avega mai iā Ieova!’ Ou te liliu atu foʻi i lenā tagata ma lona aiga.+ 35 O le mea lenei e tou te fesili atu ai pea, e taʻitasi i lona tuaoi, e taʻitasi foʻi i lona uso, ‘O le ā le tali mai a Ieova? O le ā foʻi le mea na fetalai mai ai Ieova?’+ 36 E tou te lē toe taʻua+ le avega+ mai iā Ieova, auā e taʻitasi le tagata ma fai lana lava upu ma avega,+ ma ua outou suia foʻi afioga a le Atua soifua,+ o Ieova o ʻau, o lo tatou Atua.
37 “O le mea lenei e te fai atu ai i le perofeta, ‘O le ā le tali na tuuina mai e Ieova iā te oe? O le ā na fetalai mai ai Ieova?+ 38 Afai foʻi e tou te faapea ane pea, “O le avega mai iā Ieova!” o le mea lenei ua fetalai mai ai Ieova: “Ona o lo outou fai mai, ‘O le upu lenei o le avega lava mai iā Ieova,’ a ua ou auina atu pea le upu iā te outou, e faapea, ‘Aua tou te faapea ane: “O le avega mai iā Ieova!”’ 39 o le mea lea, ou te matuā tuulafoaʻiina ai outou, ou te lafoaʻiina foʻi outou mai i oʻu luma,+ ma le aai na ou avatu iā te outou ma o outou augātamā.+ 40 Ou te faaee atu iā te outou le faalumaina i aso uma lava, ma le māsiasi i aso uma, e lē toe faagaloina lava.”’”+