2 Nofoaiga a Tupu
16 I le tausaga lona tolu sefulu ono o le nofoaiga a Asa, na alu aʻe ai Paasa+ le tupu o Isaraelu e tau ma Iuta, ma ia fausia Rama+ ina ia lē faatagaina se tasi e alu i fafo pe sau i totonu iā Asa le tupu o Iuta.+ 2 Ua aumaia e Asa o siliva ma auro mai i ʻoa o le fale o Ieova+ ma le fale o le tupu,+ ma aauina atu iā Peniata+ le tupu o Suria,+ o lē na nofo i Tamaseko,+ ua faapea atu: 3 “O loo iai se feagaiga i lo ta va, ma le va foʻi o loʻu tamā ma lou tamā. O lenei, ua ou avatu iā te oe siliva ma auro. Inā alu ia e tatala la oulua feagaiga ma Paasa+ le tupu o Isaraelu, ina ia alu ese o ia mai iā te aʻu.”+
4 Ona faalogo lea o Peniata i le Tupu o Asa, ua ia aauina atu foʻi taʻitaʻi o ana ʻautau e faasagatau i aai o Isaraelu, ina ia o latou fasia Iono,+ o Tanu,+ o Apelamaima,+ ma nofoaga uma e teu ai oloa+ i aai o Nafatali.+ 5 Ina ua faalogo i ai Paasa, ona ia tuua loa lea o le fausiaina o Rama ma taofi lana galuega.+ 6 A ua ave e le tupu o Asa o Iuta uma,+ ma latou ave maa o Rama+ ma laupapa na fausia ai e Paasa,+ ma ua amata foʻi ona ia fausia ai i ia mea o Kepa+ ma Mesepa.+
7 O le taimi lea na alu atu ai Hanani+ le tagata e iloa faaaliga iā Asa le tupu o Iuta, ma faapea atu iā te ia: “Talu ai ua e faalagolago i le tupu o Suria+ ae e lē faalagolago iā Ieova lou Atua,+ o le mea lea, ua sosola ese ai mai i lou lima le ʻautau a le tupu o Suria. 8 Pe e lē o le ʻautau e matuā toʻatele ea Aitiope+ ma Lipua,+ o ē na iai kariota ma tagata tiʻetiʻe solofanua;+ ma ona o lou faalagolago iā Ieova, ua ia tuuina mai ai i latou i lou lima?+ 9 Auā e silasila+ solo fofoga o Ieova i le lalolagi+ uma, ina ia faaali atu lona malosi iā i latou e atoatoa o latou loto+ iā te ia. Ua e fai faavalea+ lenei mea, o le mea lea, e amata atu ai nei ona iai taua iā te oe.”+
10 A ua ita Asa i le tagata e iloa faaaliga, ma tuu atu o ia e faamau ona vae i le falepuipui,+ talu ai ua ita o ia iā te ia ona o lenei mea.+ Ua matuā faasauā+ foʻi Asa i nisi o le nuu i lenā lava taimi. 11 Faauta! o le olaga uma o Asa, o mea muamua ma mea mulimuli, ua tusia ia i le Tusi+ o Tupu o Iuta ma Isaraelu.
12 O le tausaga lona tolu sefulu iva o le nofoaiga a Asa, na maʻi ai o ia i ona vae ma ua oo ina tigāina;+ ae e leʻi saʻili atu o ia iā Ieova+ i le taimi o lona maʻi, a ua saʻili atu i ē e faia faamālōlōga.+ 13 Mulimuli ane, ua taoto Asa faatasi ma ona augātamā,+ ua oti foʻi i le tausaga lona fā sefulu tasi o lana nofoaiga. 14 Ua latou tanu o ia i lona tuugamau+ matagofie na ia eliina mo ia lava i le Aai a Tavita;+ ua latou faataoto o ia i le moega ua lilofia i le suāuu pasama,+ ma uu manogi+ eseese ua paluina i se suāuu faapitoa.+ Ua latou faia foʻi se falelauasiga e sili atu ona telē e susunu+ ai mea manogi mo ia.